ހަތް ގޮނޑި ދިނީ އައްޑޫ ސިޓީ ތަރައްގީ ކުރަން: ސޯބެ

އައްޑޫ ސިޓީގެ ހަތް ގޮނޑި ފުރަތަމަ ފަހަރަށް އެ ސިޓީގެ ރައްޔިތުން އެމްޑީޕީއަށް ދިނީ، އައްޑޫސިޓީ ތަރައްގީ ކުރުވަން ކަމަށް އައްޑޫ ސިޓީގެ މޭޔާރ އަބްދުﷲ ސޯދިގު (ސޯބެ) ވިދާޅުވެއްޖެއެވެ.

ފުރަތަމަ ފަހަރަށް އައްޑޫ ސިޓީގެ ހަތް ދާއިރާގެ ހަތް ގޮނޑި އެމްޑީޕީއަށް ލިބުމާ ގުޅިގެން ރާއްޖެއެމްވީއަށް ދެއްވި އިންޓަރވިއުއެއްގައި ސޯބެ ވިދާޅުވީ އައްޑޫ ސިޓީގެ ހަތް ދާއިރާގެ ހަތް ގޮނޑި އެ ސިޓީގެ ރައްޔިތުން އެމްޑީޕީއަށް ދިނީ، އެ ސިޓީ ތަރައްގީ ކުރުވަން ކަމަށާއި، އަދި އެކަން މި ސަރުކާރުން ކޮށްދޭނެ ކަމުގެ ޔަގީންކަން އައްޑޫސިޓީގެ ރައްޔިތުންނަށް އޮތުމުން ކަމަށެވެ.

މޭޔަރު ވިދާޅުވީ އާ ސަރުކާރު ފެށުނުތާ މަދު ދުވަސްކޮޅެއްގެ ތެރޭގައި އައްޑޫސިޓީގެ ތަރައްގީގެ ބައެއް މަޝްރޫއުތައް ފަށާފައިވާތީ، މި ސަރުކާރުގެ ފަސް އަހަރުގެ ތެރޭގައި އެ ސިޓީ ތަރައްގީކޮށްދޭނެ ކަމުގެ އުއްމީދު އައްޑޫސިޓީގެ ރައްޔިތުންނަށް އާވެފައިވާ ކަމަށެވެ. މި އަހަރުގެ ތެރޭގައި ފަށަން ރާވާފައިވާ މަޝްރޫއުތަކުގެ ތެރޭގައި ހިމެނޭ އައްޑޫ ސިޓީ މީދޫ މަގުގެ ތާރު އެޅުމުގެ މަސައްކަތް ފެށުމާއި، އައްޑޫ ސިޓީ ކުނި ނައްތާލުމުގެ މަސައްކަތް މިހާރު ވެސް ފެށިފައިވާ ކަން ސޯބެ ފާހަގަކުރެއްވިއެވެ.

ސޯބެ ވިދާޅުވީ އައްޑޫ ސިޓީގެ މެޖޯރިޓީ އެމްޑީޕީއަށް ދިނުމުގައި މަޖިލިސް އިންތިޚާބުގެ ކެމްޕެއިންއަށް އައްޑޫ ސިޓީއަށް ވަޑައިގެން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އިއުލާން ކުރެއްވި 5.4 ބިލިއަން ރުފިޔާގެ ބިޔަ ބޮޑު މަޝްރޫއުގެ ހިމެނޭ ކަމެކެއެވެ.

ސޯބެ ވިދާޅުވީ 5.4 ބިލިޔަން ރުފިޔާގެ މަޝްރޫއު އެކުލަވާލައި ނިމިފައިވާ ކަމަށާއި، ފަންޑު ހޯދުމުގެ މަސައްކަތް މިހާރު ކުރިއަށްދާ ކަމަށެވެ. އޭގެ ތެރޭގައި މި އަހަރަށް ޕްލޭންކޮށްގެން ކުރިއަށް ގެންދަން ރާވާފައިވާ މަޝްރޫއުތައް ހިމެނޭ ކަމަށާއި، އޭގެ ތެރޭގައި ހުޅުދޫ ބޮޑު މަގު ހެދުމާއި، ރީޖަނަލް ޕޯޓެއް ހެދުމާއި، ބިން ހިއްކުމާއި، ކުނި ނައްތާލުމުގެ ނިޒާމާއި، ސިޓީ ހޮޓެލް އަދި ގެސްޓް ހައުސް ތަރައްގީ ކުރުމުގެ މަސައްކަތް ކަމަށެވެ.

އައްޑޫ ސިޓީގެ ރައްޔިތުންނަކީ ނަޒާހަތްތެރި، ކޮރަޕްޝަނާއި ދުރުހެލި މަޖިލީހެއް އަބަދުވެސް ބޭނުންވާ ސިޓީއެއް ކަމަށް ސޯބެ ވިދާޅުވިއެވެ.

މި މަހުގެ ހަވަނަ ދުވަހު ބޭއްވި 19 ވަނަ ރައްޔިތުންގެ މަޖިލީހުގެ ހަތް ދާއިރާގެ ހަތް ގޮނޑި ވެސް ކާމިޔާބުކޮށްފައި ވަނީ، އެމްޑީޕީގެ ޓިކެޓްގައި ވާދަކުރެއްވި ހަތް ކެނޑިޑޭޓުންނެވެ. އެއީ ހިތަދޫ ދެކުނު ދާއިރާގެ ގޮނޑި ކާމިޔާބުކުރެއްވި އިބްރާހިމް ނާޒިލާއި މަރަދޫ ދާއިރާގެ ގޮނޑި ދިފާއު ކުރެއްވި އިބްރާހީމް ޝަރީފު (މަވޯޓާ) އާއި ހިތަދޫ އުތުރު ދާއިރާގެ ގޮނޑި ކާމިޔާބު ކުރެއްވި މުހައްމަދު އަސްލަމާއި މީދޫ ދާއިރާގެ ގޮނޑި ކާމިޔާބުކުރެއްވި ރޮޒެއިނާ އާދަމް އާއި ހިތަދޫ މެދު ދާއިރާގެ ގޮނޑި ކާމިޔާބު ކުރެއްވި އަހްމަދު ރަޝީދާއި ހުޅުދޫ ދާއިރާގެ ގޮނޑި ކާމިޔާބު ކުރެއްވި އިލްޔާސް ލަބީބެވެ.