ޖުމްހޫރީޕާޓީ ނާކާމިޔާބީއާއި ކުރިމަތިލާން ޖެހުނީ ވަގެއްގެ އަތުގައި ހިފައިގެންނޫން ކަމަށާއި އެމްޑީޕީން ފައިސާ ބެހީމަ ކަމަށް އެޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.

ގާސިމް މިހެން ވިދާޅުވެފައި ވަނީ ޖޭޕީއަށް ނާކާމިޔާބާއި ކުރިމަތިލާން ޖެހުނީ "ވަގެއް"ގެ އަތުގައި ހިފުމުން ކަމަށް އެޕާޓީގެ ކައުންސިލް މެންބަރު އަދި މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ ސްޓޭޓް މިނިސްޓަރު އަލީ ސޯލިހު ވިދާޅުވުމާއި ގުޅިގެން ޖުމްހޫރީ ޕާޓީގެ ކައުންސިލް ވަޓްސް އެޕް ގުރޫޕްގައި އެޕާޓީގެ ސްލޮޓްގައި މިހާރުގެ ސަރުކާގެ އިސް މަގާމްތަކުގައި ތިއްބެވި ބޭފުޅުންނަށް ރައްދު ދެއްވަމުންނެވެ.  

އެންމެ ފަހު ދުވަހު ވާރޭފެންހެން ފައިސާ އޮއްސަމުން ދިއުމުގެ އިތުރުން ސަރުކާރުން އެކި ވަޒީފާތައް ދޭނެ ކަމުގެ ޔަގީންކަން އެމްޑީޕީން އެކި ފަރާތްތަކަށް ދީފައިވާ ކަމަށް ވިދާޅުވެ  ގާސިމް ވަނީ  އެމްޑީޕީގެ މައްޗަށް ބޮޑެތި ތުހުމަތު ތަކެއް ކުރައްވައިފައެވެ. އަދި އެއީ ޖޭޕީ ބަލިވި ސަބަބުތަކުގެ ތެރެއިން އެއް ސަބަބުކަމުގައި ގާސިމް ވަނީ ފާހަގަ ކުރައްވައިފައެވެ.

އިންތިޚާބުގައި ނާކާމިޔާބީއާއި ކުރިމަތިލާން ޖެހުނު ދެވަނަ ކަމެއްގެ ގޮތުގައި ގާސިމް ފާހަގަ ކުރައްވާފައިވާ ކަމަކީ  މިހާރުގެ ސަރުކާރުގެ އިސްމަގާމްތަކުގައި ތިބި ޖުމްހޫރީ ޕާޓީގެ މީހުން ޖޭޕީއަށާއި ގާސިމަށް އެއްޗެހި ގޮވަމުން  ދިޔުން ކަމަށެވެ.

ގާސިމް އިތުރަށް ވިދާޅުވީ 2009 ވަނަ އަހަރު އެއްވެސް ޕާޓީއަކާއި ނުގުޅި 30 ދާއިރާއެއްގެ ކެނޑިޑޭޓުންނަށް ޖޭޕީން ޓިކެޓް ދީގެން ބޮޑު ޚަރަދެއް ކޮށްގެން ވެސް ހޮވުނީ ގާސިމް އެކަނި ކަމަށް ވިދާޅުވެ އެއީ ކީއްވެގެން ވީކަމެއްތޯ ސުވާލު އުފައްދަވާފައެވެ.  

ވާހަކަތަކެއް ދެއްކުމަކުން ނުސިހޭނެ ކަމަށް ވިދާޅުވެ  އެއިން އެއްވެސް ފަރާތަކުން ނިމިގެން ދިޔަ އިންތިޚާބު ކާމިޔާބު ކުރުމަށް ކޮށްދިން އެއްވެސް ކަމެއް ނެތް ކަމަށް ވިދާޅުވެ ގާސިމް ވަނީ އެފަރާތްތަކަށް ވަޓްސްއެޕް ގުރޫޕްގައި ވަރަށް ބޮޑަށް ފާޑު ވިދާޅުވެފައެވެ.

މިހާތަނަށް ނަތީޖާތައް ދައްކާ ގޮތުން އިންތިޚާބުގައި ކާމިޔާބު ހޯދުނީ ޖޭޕީގެ ފަސް ކެންޑިޑޭޓަކަށެވެ. އެ ޕާޓީއިން ޖުމްލަ 41 ކެންޑިޑޭޓަކު އިންތިޚާބުގައި ވާދަކުރި އެވެ.

އަދި އެމްޑީޕީން 85 ދާއިރާއަށް ވާދަކޮށްގެން 69 ގޮނޑި ކާމިޔާބު ކޮށްފައިވާ ކަން ފާހަގަ ކޮށްލެވެއެވެ.