ވަޒީރުކަން ދެއްވީ ގާސިމެއް ނޫން، ރައީސް ސޯލިހު: އަލީ ވަހީދު
4 އެޕްރީލު 2019 | ބުރާސްފަތި 15:51ރާއްޖެއަށް އަނބުރާ ވަޑައިގަތީ ގާސިމްގެ އެދިލެއްވުމުގެ މަތިން ކަމަަށް ވިދާޅުވި
ޖީހާންގެ ކެމްޕެއިންގައި ބައިވެރިވަޑައިގަތުމަށް އަލީ ވަހީދު ހިންނަވަރަށް ކުރެއްވި ދަތުރުފުޅުގެ ތެރެއިން
ޖުމްހޫރީ ޕާޓީގެ ސްލޮޓެއްގައި ވަޒީރުންގެ މަޖިލީހަށް ވަޑައިގެންނެވި ނަމަވެސް، ވަޒީރުކަން ދެއްވީ އެ ޕާޓީގެ ލީޑަރު ގާސިމް އިބްރާހިމް ނޫން ކަމަށާއި، ވަޒީރުކަން ދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކަމަށް ޓުއަރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
އެމްޑީޕީގެ ޓިކެޓްގައި ޅ. ހިންނަވަރު ދާއިރާ އަށް ވާދަކުރައްވާ ޖީހާން މަހްމޫދުގެ ކެމްޕެއިން ހަރަކާތުގައި އެ ރަށަށް ވަޑައިގެން ވާހަކުފުޅު ދައްކަވަމުން އަލީ ވަހީދު ވިދާޅުވީ ރާއްޖެ އިން ބޭރުގައި ހުންނަވަނިކޮށް އިނގިރޭސިވިލާތުގައި މަޑުކުރައްވަން ބޭނުންފުޅުވާ ކަމަށް ގާސިމް އަރިހުގައި ވިދާޅުވި ކަމަށެވެ. ނަމަވެސް އެ ނިންމުން ބަދަލުކޮށް ރާއްޖެއަށް އަނބުރާ އައީ، އެމަނިކުފާނަކީ މުހިންމު ބޭފުޅެއް ކަމަށް ވިދާޅުވެ ވަޒީރުންގެ މަޖިލިހަށް އެންމެ ފުރަތަމަ ފޮނުވާނީ އެމަނިކުފާނުގެ ނަަންފުޅު ކަމަށް ގާސިމް ވައުދުވެވަޑައިގެންނެވުމުން ކަމަށް އަލީ ވަހީދު ވިދާޅުވިއެވެ.
ކަން ނިމިގެން ދިޔަ އިރު އެންމެ ފަހުން ވަޒީރުންގެ މަޖިލީހަށް ފޮނުއްވެވީ އެމަނިކުފާނުގެ ނަން ކަމަށް ވިދާޅުވެ އަލީ ވަހީދު ވަނީ ގާސިމް އިތުރުފުޅު ހެއްދެވި ކަމަށް ތުހުމަތު ކުރައްވާފައެވެ. އަދި އިތުރުފުޅު ހެއްދެވީ ކީއްވެގެންތޯ އެއްސެވުމުން ސީދާ ޖަވާބެއް ގާސިމް ނުދެއްވާ ކަމަށް ވެސް އަލީ ވަހީދު ވިދާޅުވިއެވެ. ވަޒީރުންގެ މަޖިލީހަށް ނަން ފޮނުއްވެވީ ވެސް އެ ހިސާބުން ކަމަށް އަލީ ވަހީދު ވިދާޅުވިއެވެ.
ގާސިމް އިބްރާހިމަށް މިހާ ބޮޑަށް ފާޑު ވިދާޅުވާން ޖެހުނީ ފެނިވަޑައިގެންނެވި ފޮޓޯއެއްގެ ސަބަބެއް ކަމަށް އަލީ ވަހީދު ވިދާޅުވިއެވެ. ޕީއެންސީގެ ވަގުތީ ލީޑަރު އަބްދުއްރަހީމް އަބްދުﷲ އާއި ގާސިމް އެކުގައި ކާރުކޮޅުގައި އިންނަވާ މަންޒަރު ފެންނަ ފޮޓޯއެއް ސޯޝަލް މީޑިއާގައި ދަނީ ދައުރުވަމުންނެވެ.
މި ޖަލްސާގައި ދެއްކެވި ވާހަކަފުޅުގައި އަލީ ވަހީދު ވަނީ ހޯރަފުށީ ދާއިރާއަށް ވާދަކުރައްވާ މުހައްމަދު އިސްމާއިލަށް ޖޭޕީން ތާއީދުކުރައްވަން ނިންމެވި ނިންމެވުމަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ފައިސާ ގޯނި ހިފައިގެން ދިޔަކަމަށް ދަައުވާކުރެއްވި މީހާއަށް ތާއީދު ކުރަން ނިންމުމަކީ "އަމިއްލަ ގަޔަށް ކުޅު ޖެހުން" ފަދަ ކަމެއްގެ ގޮތުގައި އަލީ ވަހީދު ސިފަކުރެއްވިއެވެ. އަދި މިހާރު ޖޭޕީން ޓިކެޓު ދީފައިވާ ބައެއް ކެންޑިޑޭޓުންނަކީ ހުރިހާ ވައްކަމެއްގައި ބައިވެރިވެގެން ތިބި ބައެއް ކަމަށް ވިދާޅުވެ، އޭނާ ވަނީ ސެޕްޓެމްބަރު މަހު ބޭއްވުނު ރިޔާސީ އިންތިހާބުގެ ކުރިން ޖޭޕީއާ އެކު މަސައްކަތް ކުރެއްވި ބޭފުޅުން ކުރިމަތިލައްވާ ދާއިރާތައް ފިޔަވައި ދެން ހުރި ހުރިހާ ދާއިރާއަކުން އެމްޑީޕީއަށް ވޯޓު ދެއްވަން އެދިވަޑައިގެންފައެވެ.
ހޮނިހިރު ދުވަހު އޮތް ރައްޔިތުންގެ މަޖިލިސް އިންތިހާބުގައި ޖޭޕީން ޕްރޮގްރެސިވް ކޮންގްރެސް ކޯލިޝަނާ އެކު މަަސައްކަތް ކުރައްވަން ނިންމެވުމުން، ޖޭޕީގެ އިސް ގިނަ ފަރާތްތަކަކުން ވަނީ އެމްޑީޕީއަށް ފާޅުގައި ކެމްޕެއިން ކޮށްދެއްވަން ނިކުމެވަޑައިގެންފައެވެ. އޭގެ ތެރޭގައި އަލީ ވަހީދުގެ އިތުރުން، ނައިބު ރައީސް ފައިސަލް ނަސީމާއި އެންވަޔަރަމަންޓް މިނިސްޓަރު ޑރ. ހުސައިން ރަޝީދު ހަސަން އާއި ޓްރާންސްޕޯޓް މިނިސްޓަރު އަދި ގާސިމްގެ އަނބިކަނބަލުން އާއިޝަަތު ނަހުލާގެ އިތުރުން އެ ޕާޓީގެ ސެކެޓްރީ ޖެނެރަލްކަން ކުރިން ކުރެއްވި އަދި މިހާރު ރައީސް އޮފީހުގެ މިނިސްޓަރު އަހްމަދު ސަމީރު ހިމެނިވަޑައިގަންނަވައެވެ. މީގެ ތެރެއިން ގިނަ ބޭފުޅުން ހިންނަވަރަށް ވެސް ވަޑައިގެންފައިވާ އިރު ޖީހާން އަށް ތާއީދު ހޯއްދެވުމަށް އައިޝާ ވެސް ވަނީ ބުދަ ދުވަހު ހިންނަވަރަށް ދަތުރެއް ކުރައްވާފައެވެ.
