ހޮނިހިރު ދުވަހަކީ ހިޔާނާތާއި ވައްކަމަށް އަނެއްކާވެސް ފުރުސަތު ދޭނީތޯ ނުވަތަ ނޫންތޯ ރައްޔިތުން ނިންމާނެ ދުވަސް: ރައީސް

ކުރިއަށް އޮތް ހޮޮނިހިރު ދުވަހަކީ ރައްޔިތުން މުހިންމު ނިންމުމެއް ނިންމަންޖެހޭ ދުވަސް ކަމަށާއި، އެ ދުވަހަކީ ހިޔާނާތާއި ވައްކަމަށް އަނެއްކާވެސް ފުރުސަތު ދޭނީތޯ ނުވަތަ ނޫންތޯ ރައްޔިތުން ނިންމާނެ ދުވަސްކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ.

ކެމްޕޭން ދަތުރުފުޅެއްގައި ދ. މީދޫ ވަޑައިގެން ވާހަކަފުޅުދައްކަވަމުން ރައީސް ސޯލިހް ވިދާޅުވީ ހޮނިހިރު ދުވަހު ރައްޔިތުން ނިންމާ ނިންމުމަކީ ވަރަށް މުހިންމު ނިންމުމެއް ކަމަށެވެ. އެގޮތުން ހޮނިހިރު ދުވަހު ރައްޔިތުން ނިންމާ ނިންމުމަކީ، ވައްކަމާއި ހިޔާނާތަށް ފުރުސަތުދޭނނީތޯ ނުވަތަ، ވައްކަމާއި ހިޔާނާތާއި ނުލާ، ރާއްޖެ ތަރައްޤީކުރާނީތޯ ނިންމާ ދުވަސްކަމަށް ރައީސް ވިދާޅުވި އެވެ. އަދި ރައީސް ސޯލިހް ވަނީ ނަޒާހަތްތެރި މަޖިލީހެއް ޤާއިމްކުރުމަށް އެމްޑީޕީގެ ކެނޑިޑޭޓަށް ވޯޓު ދެއްވުމަށް ތަކުރާރުކޮށް އެދިވަޑައިގެންފަ އެވެ.

ރައްޔިތުންގެ މަޖިލީހުގެ އިންތިހާބަކީ ވަރަށް މުހިންމު އިންތިހާބެއްކަން ފާހަގަކުރައްވާ އިތުރަށް ވާހަކަދައްކަވަމުން ރައީސް ސޯލިހް ވިދާޅުވީ ނިމިދިޔަ ރިޔާސީ އިންތިހާބބުގައި ވެވަޑައިގެންނެވި ވައުދުތައް ފުއްދުމަށް ރައްޔިތުންގެ މަޖިލީހުގެ މެޖޯރިޓީ ބޭނުންވާ ކަމަށެވެ. އެގޮތުން ލާމަރުކަޒީ ނިޒާމް ހަރުދަނާ ކުރުމާއި، އަސާސީ ހިދުމަތްތައް ކަށަވަރުކުރުމަށްވެސް މަޖިލީހުގެ މެޖޯރިޓީ މުހިންމުކަމަށް އެމަނިކުފާނު ވިދާޅުވި އެވެ.

މީީދޫއަކީ މަސްވެރި ރަށެއްކަން ފާހަގަކުރައްވާ ރައީސް ވިދާޅުވީ މީދޫ ބަނދަރު ބޮޑުކުރަންޖެހޭ ކަމަށެވެ. އަދި ސުކޫލަށް މަލްޓި ޕާރޕާސް ހޯލެއް މުހިންމުކަމަށާއި، ރައްޔިތުން ބޭނުންވާގޮތަށް އެ ހޯލު އިމާރަތްކުރުމުގެ މަސައްކަތް ކުރިއަށް ގެންދަވާނެ ކަމަށް ރައީސް ވިދާޅުވި އެވެ. އޭގެއިތުރުން ރިނބިދުއާއި، ހުޅުދެލީގެ ބަނދަރު ހެދުމުގެ މަޝްރޫއު މި އަހަރުގެ ތެރޭގައި ފެށިގެންދާނެކަމަށާއި، ބަނޑިދޫގެ ފެނާއި ނަރުދަމާގެ ނިޒާމް ޤާއިމްކުރުމުގެ މަޝްރޫއުވެސް މި އަހަރުގައި ފެށިގެންދާނެ ކަމަށް ރައީސް ވިދާޅުވި އެވެ.

ރައީސް ވިދާޅުވީ މަސްވެރިންނަށް ލުއި ފަސޭހަ ގޮތްތައް ހޯދައިދިނުމަށް ސަރުކާރުން ވަރަށް ގިނަ މަސައްކަތްތަކެއް ކުރަމުން އަންނަ ކަމަށެވެ. އެގޮތުން މަހަށް ހަމަ އަގު ވަރަށް އަވަހަށް ހޯދައިދެވޭނެކަމަށް ކަމަށް ރައީސް ސޯލިހް ވިދާޅުވި އެވެ. އަދި އޭގެއިތުރުން މަސްވެރިންނަށް ޑީސަލް ހެޔޮ އަގުގައި ފޯރުކޮށްދިނުމަށް ޑީސަލުން ނަގާ ޑިއުޓީ ކަނޑާލައިފައިވާ ކަމަށާއި، އޭގެ ފައިދާވެސް ވަރަށް އަވަހަށް ރައްޔިތުންނަށް ލިބޭނެކަމަށް ރައީސް ވިދާޅުވި އެވެ.