މެންޗެސްޓާ ޔުނައިޓެޑަށް ކުޅެމުން އަންނަ ފްރާންސްގެ މިޑްފިލްޑަރ ޕައުލް ޕޮގްބާ އެ ކްލަބުގައި މަޑުކުރާނެކަން ޔަގީންވާ ފަދަ ވާހަކަތަކެއް އެ ކްލަބުގެ ކޯޗް އޮލެގުނަ ސޮލްސްޖާ ބުނެފިއެވެ. 

ބީބީސީ ސްޕޯރޓްސްއަށް ދީފައިވާ އިންޓަރވިއުއެއްގައި ކޯޗް ސޮލްސްޖާ ބުނެފައިވަނީ ޕޮގްބާ ޔުނައިޓެޑުގައި ހުރީ އުފަލުން ކަމަށާއި އޭނާގެ ކުޅުން ވެސް ރަނގަޅު ކަމަށެވެ. 

މާރޗް މަސްތެރޭގައި ޔުނައިޓެޑާ އެކު ހަދާފައިވާ އެއްބަސްވުން ހަމަވަންދެން ކްލަބުގައި މަޑުކުރަން ޕޮގްބާ ނިންމާފައިވާ ކަމަށާއި، އެކަން ޔުނައިޓެޑްގެ ކޯޗު ސޮލްޝެއާއާ ވެސް އޭނާ ހިއްސާ ކޮށްފައިވާ ކަމަށް އޭރު މީޑިއާގައި ވާހަކަ ދެކެވެމުން ދިޔައެވެ، 

ސޮލްސްޖާ ސްލްސްޖާ ޕޮގްބާގެ ކުޅުމުގެ ވާހަކަ ބުނެފައި މިވަނީ ރެއާލްމެޑްރިޑްގެ ކޯޗް ޒައިނުއްދީން ޒިދާން ޕޮގްބާގެ ކުޅުން ފާހަގަކޮށް ޝައުގުވެރިކަން ފާޅުކޮށްފައި ވަނިކޮށެވެ. 

ޕޮގްބާ ހޯދުމަށް ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އެގޮތުން ޔުވަންޓަސް އިން ވަނީ މިދިޔަ ޖެނުއަރީ ޓްރާންސްފާގައި އޭނާ ހޯދަން 80 މިލިއަން ޔޫރޯ ހުށަހަޅާފައެވެ.

ޔުނައިޓެޑާ އެކު ޕޮގްބާ ހަދާފައިވާ އެއްބަސްވުން 2021 ވަނަ އަހަރު ހަމަވާ އިރު، އޭނާ އަށް މިހާރު ލިބެނީ ހަފްތާ އަކު 290،000 ޕައުންޑެވެ.

ޔުނައިޓެޑުން 2010 ވަނަ އަހަރު ކެރިޔަރު ފެށި އުމުރުން 25 އަހަރުގެ ޕޮގްބާ ވަނީ މިހާތަނަށް އެ ޓީމަށް ކުޅުނު 124 މެޗުގައި 29 ލަނޑު ކާމިޔާބުކޮށްފަ އެވެ. އޭނާ ވަނީ އެޓީމާއެކު ލީގް ކަޕް އަދި ޔޫރޮޕާ ލީގު ވެސް ކާމިޔާބުކޮށްފަ އެވެ.

ޕޮގްބާ ވަނީ ޔުވަންޓަސް އަށް ވެސް ކުޅެ ގިނަ ކާމިޔާބީތަކެއް ހޯދާފަ އެވެ. އޭނާ ވަނީ އެޓީމަށް ކުޅުނު 178 މެޗުގައި 34 ލަނޑު ކާމިޔާބުކުރުމުގެ އިތުރުން، އެ ޓީމާއެކު އިޓާލިއަން ލީގު ހަތަރު ފަހަރު، ކޮޕާ އިޓާލިއާ ދެ ފަހަރު އަދި އިޓާލިއަން ސުޕާކަޕް ދެ ފަހަރު ކާމިޔާބުކޮށްފަ އެވެ.

ފްރާންސާ އެކު 2013 ވަނަ އަހަރު 20 އަހަރުން ދަށުގެ ވޯލްޑްކަޕް ކާމިޔާބުކޮށްފައިވާ ޕޮގްބާ ވަނީ ސީނިއާ ޓީމުގައި ހިމެނި 64 މެޗު ކުޅެ 10 ލަނޑު ކާމިޔާބު ކޮށްފައެވެ.