ކޯލިޝަންގެ ހަތަރު ލީޑަރުންގެ މެދުގައި މަޝްވަރާތައް ނުކުރެވިގެން އުޅެނީ ބަހުގެ ހަމަލާތައް ރައްދުކުރާތީ ކަމަށް ރައްޔިތުންގެ މަޖިލީހުގެ އިންތިހާބުގައި ގަލޮޅު ދެކުނު ދާއިރާއަށް ރައީސް މައުމޫންގެ ތާއީދާއެކު ވާދަކުރައްވާ އައިމިނަތު ނާދިރާ ވިދާޅުވެއްޖެއެވެ.
ހޯމަ ދުވަހުގެ ރޭ ރާއްޖެޓީވީގެ ފަލަސަރުހީ ޕްރޮގްރާމްގައި ވާހަކަ ދައްކަވަމުން ނާދިރާ ވިދާޅުވީ ހަތަރު ލީޑަރުންނަށް މަޝްވަރާތައް ކުރެވެން ޖެހޭނެ ކަމަށާއި އެ ލީޑަރުން ނިކުންނަވައިގެން އެ ތިއްބެވީ ރައްޔިތުންގެ ހައްޤުގައި ކަމަށެވެ.
"މަޝްވަރާތައް ނުކުރެވި އުޅެނީ ބަހުގެ ހަމަލާ ބޮޑުވެގެން ގޮސް، މަޖިލިސް އިންތިހާބުގެ ވާދަވެރިކަން ބޮޑުވުމުގެ ސަބަބުން ކަމަށް އަޅުގަނޑަށް ޤަބޫލުކުރެވެނީ. މަޖިލިސް އިންތިހާބު ނިމުމުން އޭރު އޮތް މަސްލަހަތު އޮންނާނެ ކަމަށް ޤަބޫލުކުރަނީ. މަޝްވަރާ ކުރެވިގެން ނޫނީ މިކަންކަން ރަނގަޅެއް ނުކުރެވޭނެ. ބަހުގެ ހަމަލާދީގެން ރައްޔިތުން މާޔޫސް ކުރާނީތޯ ނޫނީ އެއް މޭޒަކަށް އައިސް ރައްޔިތުންގެ އުންމީދުތައް އައު ކޮށްދޭނީތޯ ލީޑަރުން އަމިއްލައަށް ނިންމަވަންޖެހޭ. އެއްބަޔަކު އަނެއް ބަޔަކަށް ބަހުގެ ހަމަލާދީގެން މިކަން ހައްލެއް ނުކުރެވޭނެ" ނާދިރާ ވިދާޅުވިއެވެ.
ނާދިރާ އިތުރަށް ވިދާޅުވީ ރައްޔިތުންގެ އިތުބާރު ޖުޑިޝަރީއާ ދޭތެރޭގައި އަދިވެސް ގެއްލެމުންދާ ކަމަށާއި ސިޔާސީ މީހުންގެ ނުފޫޒް ޖުޑިޝަރީގެ ތެރެއަށް ވަރަށް ބޮޑަށް ފޯރާފައިވާ މަންޒަރު ފެންނަ ކަމަށެވެ. އާންމު ރައްޔިތު މީހާގެ މައްސަލައަށް ކޯޓުގައި ދިގުލައިގެންދާއިރު ސިޔާސީ މީހެއްގެ މައްސަލައިގައި ބާރުމިނުގައި ހުކުމް އިއްވާ މައްސަލަ ނިންމާ ކަމަށް ނާދިރާ ވިދާޅުވިއެވެ.
"އާދައިގެ އެންމެ ނިކަމެތި މީހާއަށް އަނިޔާ ލިބޭ ގޮތަށް ކަންކަން ބައްޓަންވެފައި އޮތް އޮތުން އަޅުގަނޑުމެން އެބަޖެހޭ މި ޤައުމުން ފޮހެލަން. ޒިންމާދާރު ކުރަންޖެހޭ. ޒިންމާ ނަގާނެ ފަރާތްތައް އަޅުގަނޑުމެންގެ ތެރޭގައި ތިބޭނެ މިކަންކަން ހިނގާދާއިރު. އެމީހުން ޒިންމާދުކުރާނެ މެކޭނިޒަމް އޮންނަނީ ރައްޔިތުންގެ މަޖިލީހުގައި. މަޖިލިސް ޒިންމާދާރު ކުރުވައިގެން މިކަންކަން ހައްލުކުރެވޭނީ" ނާދިރާ ވިދާޅުވިއެވެ.
މަޖިލީހުގެ އިންތިޚާބަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ޕީޕީއެމް/ޕީއެންސީއަށް ތާއިދުކުރަން ނިންމަވާފައިވާތީ އެކަމަށް އިޝާރަތް ކުރައްވާ ނާދިރާ ވިދާޅުވީ މަޖިލީހުގެ އިންތިޚާބުގައި ގޮނޑިތައް ނެގުމުގެ ނިޔަތުގައި އަނިޔާވެރިންނާ ގުޅުން އެއީ ރަނގަޅު ގޮތް ނޫންކަމުގައެވެ.
