ހއ. ހޯރަފުށީގައި އެއާޕޯޓް މަޝްއުރޫއުގެ އަމަލީ މަސައްކަތް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙް ފައްޓަވައިދެއްވައިފިއެވެ.
އެމަނިކުފާނު މިމަޝްރޫއުގެ މަސައްކަތް ފައްޓަވައިދެއްވާފައިވަނީ ތިލަދުން މައްޗަށް މިހާރު ކުރައްވަމުން ގެންދަވާ ދަތުރުފުޅުގައި އާދިއްތަ ދުވަހުގެ ހެނދުނު ހޯރަފުއްޓަށް ވަޑައިގެންނެވުމަށް ފަހު އެވެ.
ރައީސް ސޯލިޙް ހޯރަފުށީގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ވިދާޅުވީ ހޯރަފުށީގެ އެއާޕޯޓް ހަގީގަތަކަށް ހައްދަވައިދެއްވާނެ ކަމަށެވެ. އަދި ހޯރަފުށީގެ އެއާޕޯޓާ އެކު އުލިގަމުގެ ސިޓީ ހޮޓާ ތަރައްގީ ކުރެވި، މި ސަރަހައްދުގައި ޓޫރިޒަމް ފުޅާވެ ވަޒީފާގެ ފުރުސަތުތައް ތަނަވަސް ވެގެންދާނެ ކަމަށް ވެސް ރައީސް ސޯލިޙް ވިދާޅުވިއެވެ.
އެއާޕޯޓް މަޝްއުރޫއުގެ އަމަލީ މަސައްކަތް ފައްޓަވައި ދެއްވާފައިވާއިރު ހޯރަފުށީގައި އެއާޕޯޓް އެޅުމުގެ އަމަލީ މަސައްކަތް ފެށުމަށްޓަކާ އެމްޓީސީސީއާ އެކު ޓްރާންސްޕޯޓް މިނިސްޓްރީން އެއްބަސްވުމުގައި ސޮއިކޮށްފައި ވަނީ މާރޗް މަހުގެ 25 ވަނަ ދުވަހުގައެވެ.
މިމަޝްރޫއުގެ މަސައްކަތާއި ގުޅޭގޮތުން ރާއްޖެއެމްވީއާއި ވާހަކަ ދައްކަވަމުން އެމްޓީސީސީގެ މެނޭޖިން ޑިރެކްޓަރު ހަސަން ޝާހު ވިދާޅުވީ އެއާޕޯޓް އެޅުމަށް ބޭނުންވާ ސާމާނު ދެ ފަހަރެއްގެ މަތިން ހޯރަފުށްޓަށް ގެންގޮސްފައިވާ ކަމަށާއި، ބޭނުންވާ އިތުރު މެޝިނަރީޒްތައް ގެންގޮސް މަސައްކަތް ފަށައިގަންނަން މިހާރު ތައްޔާރުވެފައިވާ ކަމަށެވެ.
އެގޮތުން ބިން ހިއްކުމާއި، ރަންވޭ ހެދުމާއި، ޓާރމިނަލްގެ މަސައްކަތް، 240 ދުވަހުގެ ތެރޭގައި ނިންމާނެ ކަމަށް ޝާހު ވިދާޅުވިއެވެ.
ޝާހު ވިދާޅުވީ މަޝްރޫއުގެ މަސައްކަތް އަވަހަށް ފެށިގެންދާ ސަބަބަކީ އެ ދާއިރާއަށް ވާދަ ކުރައްވާ ކެންޑިޑޭޓް އަހުމަދު ސަލީމް (ސައްލެ)ގެ ބުރަ މަސައްކަތުން މަޝްރޫއުގެ އީއައިއޭ ރިޕޯޓް ތައްޔާރުކޮށް ނިންމަވައި، ހުއްދަ ހޯއްދަ ހޯއްދެވުމުން ކަމަށެވެ.
ހޯރަފުށީގައި އަޅަން ނިންމި އެއާޕޯޓަކީ ނިމިދިޔަ ސަރުކާރުން މާފިނޮޅުގައި އަޅަން ނިންމި އެއާޕޯޓެކެވެ.
ހޯރަފުށީގައި އެއާޕޯޓް އެޅުމާ އެކު ރާއްޖޭގެ އެންމެ އުތުރަށް ދަތުރު ކުރުމަށް ލުއި ފަސޭހަކަން ލިބިގެންދާނެއެވެ.
އާބާދީގައި 3،000 ވުރެ ގިނަ މީހުން ރަޖިސްޓްރީވެފައިވާ ހޯރަފުށީގައި އެއާޕޯޓް އެޅުމުން، އެ ރަށާ ކައިރީގައި އޮތް އިހަވަންދޫއަށް ވެސް ފަސޭހަތަކެއް ލިބިގެންދާނެއެވެ.
އެގޮތުން ލޯންޗުގައި ތިން މިނެޓުން ފަސޭހަކަމާ އެކު އިހަވަންދޫއިން ހޯރަފުށީ އެއާޕޯޓަށް އާދެވޭނެއެވެ. އަދި ހޯރަފުށީ އެއާޕޯޓުގެ ސަބަބުން އެންމެ ބޮޑު ފަސޭހަތަކެއް ވެގެންދާނެ ދާއިރާގެ ދެ ރަށަކީ ތުރާކުނާއި އުލިގަމެވެ.
