ރައީސް ޔާމީން ގެންދަވަނީ ގާސިމް ގުނބޯ ހައްދަވަމުން: ރައީސް ނަޝީދު

ކުރީގެ ރައީސް އަބްދުﷲ ޔާމީން އުޅުއްވަނީ ޖުމްހޫރީ ޕާޓީގެ ލީޑަރު ޤާސިމް އިބްރާހިމް ގުނބޯ ހައްދައިގެން ކަމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ އިންތިޚާބުގައި ނޮޅިވަރަމް ދާއިރާގެ އެމްޑީޕީގެ ކެންޑިޑޭޓް އަހްމަދު އަލީއަށް ތާއީދު ހޯއްދެވުމަށް ނޮޅިވަރަމަށް ވަޑައިގެން އެ ރަށުގައި ބޭއްވި ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ ރައީސް ޔާމީން އަލުން އަނބުރާ ގާސިމް ގުނބޯ ހައްދަވަމުން ގޮސް އެ މަނިކުފާނު ޖަލަށް ލެއްވުމަށް މަސައްކަތް ކުރައްވަމުން ގެންދަވާ ކަމަށެވެ. ރައީސް ނަޝީދު ވިދާޅުވީ ރައީސް ޔާމީނަށް ސިޔާސީ ލީޑަރުން ޖަލަށް ލެވުނު ޒަމާން މާޒީއާ އެކުވެގެން ހިގައްޖެ ކަމަށާއި، ދެން ރާއްޖޭގެ އެއްވެސް ސިޔާސީ ލީޑަރެއް ރައީސް ޔާމީނަށް ޖަލަށް ނުލެއްވޭނެ ކަމަށެވެ.

ނޮޅިވަރަމް ޖަލްސާގައި ވާހަކަފުޅު ދައްކަވަމުން އެ މަނިކުފާނު ވިދާޅުވީ 19 ވަނަ ރައްޔިތުންގެ މަޖިލީހުގެ މެޖޯރިޓީ އެމްޑީޕީއަށް ނުހަނު ބޭނުންވާ ކަމަށެވެ. ކުރިއަށް އޮތް 19 ވަނަ ރައްޔިތުންގެ މަޖިލީހުގައި ނޮޅިވަރަމް ދާއިރާގެ އެންމެނަށް ވަޒީފާ ކަށަވަރުވާނެ ކަމަށް ރައީސް ނަޝީދު ވިދާޅުވިއެވެ. އަދި 19 ވަނަ ރައްޔިތުންގެ މަޖިލީހަށް އެމްޑީޕީން ހުށަހަޅާ މިނިމަމް ވޭޖް ބިލްގެ ސަބަބުން، މުވައްޒިފުންނަށް ދެވޭނެ އެންމެ ކުޑަ އުޖޫރަ ވެސް ކަނޑައެޅިގެންދާނެ ކަމަށެވެ.

ރައީސް ނަޝީދު ވިދާޅުވީ "މިނިމަމް ވޭޖް" ކަނޑައެޅުމުން ރިސޯރޓްތަކުގައި މަސައްކަތް ކުރާ މީހުންނަށް އެންމެ ކުޑަ އުޖޫރަ ކަނޑައެޅި ގެންގޮސް، ރިސޯރޓްތަކުގައި މަސައްކަތް ކުރާ މީހުންނަށް ސާރވިސް ޗާރޖާ ނުލައި މުސާރައިގެ ގޮތުގައި 10000ރ. އި ލިބިގެންދާނެ ގޮތް 19 ވަނަ ރައްޔިތުންގެ މަޖިލީހުގައި ހައްދަވައިދެއްވާނެ ކަމަށެވެ.

ރާއްޖޭގެ ހުރިހާ ކައުންސިލެއްގައި ވަޒީފާ ބޭނުންވާ މީހުންގެ ދަފްތަރެއް އެކުލަވާލައި، ވަޒީފާ ބޭނުންވާ އެންމެނަށް ވަޒީފާ ލިބޭނެ ގޮތް، އެމްޑީޕީގެ މެޖޯރިޓީ އޮންނަ 19 ވަނަ ރައްޔިތުންގެ މަޖިލީހެއްގައި ހައްދަވައިދެއްވާނެ ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ ތަރައްގީއަކީ އުސް އިމާރާތްތަކާއި، ކޮންކްރީޓްތަކެއް ނޫން ކަމަށާއި، ތަރައްގީއަކީ މީހާއަށް އަންނަ އެއްޗެއް ކަމަށެވެ. ރާއްޖެ ތަރައްގީ ކުރަން ބޭނުންވާ ނަމަ، ފުރަތަމަ ޖެހޭ ކަމަކީ ރައްޔިތު މީހާއަށް ތަރައްގީ ގެނައުން ކަމަށް ރައީސް ނަޝީދު ވިދާޅުވިއެވެ.

ތިލަފަތައް ވޯޓް ދެއްވުމަށް ރައީސް ނަޝީދު ވަނީ ނޮޅިވަރަމް ދާއިރާގެ ރައްޔިތުންގެ ފަރާތުން އެދިވަޑައިގެންފައެވެ.