ސްޕެނިޝް ލަލީގައި ރެއާލް މެޑްރިޑަށް ކުރިން ކުޅުނު ޔުވަންޓަސްގެ ފޯވާޑް ކްރިސްޓިއާނޯ ރޮނާލްޑޯ ނެތުމުން ހަނދާންވާ ކަމަށް ބާސެލޯނާއަށް ކުޅެމުން އަންނަ ލިއޮނެލް މެސީ ބުނެފިއެވެ.

އެފްއެމް ކްލަބް 947 އަށް ދިން އިންޓަވިއުއެއްގައި މެސީ ބުނީ، ލަލީގާގައި ރޮނާލްޑޯ ތަށިތައް ކާމިޔާބުކުރާތަން ދެކެން އުނދަގޫވި ނަމަވެސް އޭނާ ނެތުމުން ހަނދާންވާ ކަމަށާއި، ރޮނާލްޑޯއާ އެކު ލަލީގާގެ ފެންވަރު މަތިވި ކަމަށެވެ.

މެސީ ބުނީ، ޔުވަންޓަސްއާ ރޮނާލްޑޯ ގުޅުނު ހިސާބުން މިފަހަރުގެ ޗެމްޕިއަންސް ލީގު ކާމިޔާބުކުރުން އެންމެ ގާތީ ޔުވަންޓަސްކަމަށް ދެކޭ ކަމަށާއި، އެޓްލެޓިކޯ މެޑްރިޑްއާ ދެކޮޅަށް ޔުވަންޓަސް ހޯދި ނަތީޖާއާ އެކު އެ އިތުބާރު ބޮޑުވެފައިވާ ކަމަށެވެ.

ދުނިޔޭގައި މިވަގުތު ތިބި އެންމެ މޮޅު ކުޅުންތެރިންނަކީ ނޭމާ އާއި ކީލިއަން އެމްބަޕޭ އާއި އެޑެން ހަޒާޑްގެ އިތުރުން ސާޖިއޯ އަގުއެރޯ ކަމަށް މެސީ ބުނެއެވެ. އަދި ލިސްޓްގައި ރޮނާލްޑޯގެ ނަން ނުހިމެނީ އެއީ އަބަދުވެސް އޭނާއާ އެކު ލިސްޓުން ބޭރުވާންޖެހޭ ކުޅުންތެރިޔަކަށް ވާތީ ކަމަށް މެސީ ބުންޏެވެ.

މި ސީޒަނުގައި މިހާތަނަށް ރޮނާލްޑޯ 36 މެޗު ކުޅެފައިވާއިރު، އޭނާ ވަނީ 24 ލަނޑު ޖަހާފައެވެ. ނަމަވެސް މެސީ ވަނީ އޭނާ ކުޅުނު 37 މެޗުގައި 39 ލަނޑު ކާމިޔާބުކޮށްފައެވެ.