ޔުނައިޓެޑުގެ އާ އެއްބަސްވުމުގައި ރަޝްފޯޑް ސޮއިކުރުމާ ގާތަށް

މެންޗެސްޓާ ޔުނައިޓެޑަށް ކުޅެމުން އަންނަ އިންގްލޭންޑްގެ ފޯވާޑް މާކަސް ރަޝްފޯޑް އެ ކްލަބްގެ އާ އެއްބަސްވުމުގައި ސޮއިކުރުމާ ގާތަށް ގޮސްފައިވާ ކަމަށް ރިޕޯޓްތައް ބުނެފިއެވެ.

ޔުނައިޓެޑާ އެކު ރަޝްފޯޑް ހަދާފައިވާ އެއްބަސްވުން މި ސީޒަނަށް ފަހު ހަމަވާއިރު، ޑެއިލީ މެއިލް އިން ބުނީ ޔުނައިޓެޑާ އެކު ރަޝްފޯޑް އާ އެއްބަސްވުން ހެދުމަށް ހަމަޖެހިފައި ވަނީ އިތުރު ފަސް އަހަރަށް ކަމަށެވެ.

ނަމަވެސް ބައެއް ރިޕޯޓްތައް ބުނާ ގޮތުން އުމުރުން 21 އަހަރުގެ ރަޝްފޯޑް ޔުނައިޓެޑާ އެކު ހަދާ އެއްބަސްވުން އިތުރުކުރަން ހަމަޖެހިފައި ވަނީ އެއް އަހަރަށެވެ.

ރަޝްފޯޑް ހޯދަން ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރެއިން ރެއާލް މެޑްރިޑުން އަންނަނީ ވަރަށް ބޮޑަށް އޭނާ ހޯދަން މަސައްކަތް ކުރަމުންނެވެ.

ޔުނައިޓެޑުގެ ފުރަތަމަ 11 އިން ޖާގަ ލިބުން ކުރިން ދަތިވެފައިވާ ރަޝްފޯޑަށް އާ ކޯޗު ސޮލްޝެއާ ޓީމާ ހަވާލުވި ފަހުން މިހާރު ފުރަތަމަ 11 އިން ފުރުސަތު ލިބުން ވަނީ ގިނަވެފައެވެ.

މެންޗެސްޓާ ޔުނައިޓެޑުން 2015 ވަނަ އަހަރުގެ ސީޒަނުގައި ސީނިއާ ކެރިޔަރު ފެށި ރަޝްފޯޑް ވަނީ ޔުނައިޓެޑަށް ކުޅުނު 161 މެޗުގައި 44 ލަނޑު ކާމިޔާބުކޮށްފައެވެ.

ރަޝްފޯޑް ވަނީ ޔުނައިޓެޑާ އެކު އެފްއޭ ކަޕް، ލީގް ކަޕް، އެފްއޭ ކޮމިއުނިޓީ ޝިލްޑް އަދި ޔުއެފާ ޔޫރޮޕާ ލީގު ވެސް ކާމިޔާބުކޮށްފައެވެ.

އިންގްލޭންޑް ގައުމީ ޓީމާ އެކު ނިމިގެންދިޔަ ފީފާ ވޯލްޑް ކަޕްގެ ހަތަރުވަނަ ހޯދި ރަޝްފޯޑް ވަނީ އެޓީމަށް ކުޅުނު 31 މެޗުގައި ހަ ލަނޑު ކާމިޔާބުކޮށްފައެވެ.