ބަންދުކޮށްފައި ހުރި ސައުދީގެ ތިން އަންހެން އެކްޓިވިސްޓަކު ދޫކޮށްލައިފި
30 މާރިޗު 2019 | ހޮނިހިރު 05:34ތިނިް މީހުން ވެސް ދޫކޮށްލާފައި ވަނީ ޝަރުތުތަކާއި އެކު
ދޫކޮށްލި ތިން އަންހެން އެކްޓިވިސްޓުން
އަހަރަކަށް ވުރެ ގިނަ ދުވަސް ވަންދެން ސައުދީން ބަންދު ކޮށްފައިވާ ތިން އަންހެން އެކްޓިވިސްޓަކު ވަގުތީގޮތުން ދޫކޮށްލަން އެ ގައުމުގެ ސަރުކާރުން ނިންމައިފިއެވެ.
މި އެކްޓިވިސްޓުންތައް ދޫކޮށްލާފައި ވަނީ އެއްމެ ފަހުން ކޯޓުން ބޭއްވި އަޑުއެހުމުގެ ތެރޭގައި، އެ މީހުން ބަންދުގައި ތިބި ދުވަސްވަރު ތަހުގީގުކުރުމުގެ ނަމުގައި އަނިޔާކޮށް އަދި ޖިންސީ ގޯނާ ވެސް ކޮށްފައިވާ އެ ފަރާތްތަކުން ތުހުމަތުކޮށްފައި ވަނިކޮށެވެ. އެއްވެސް މީހަކަށް ނުވަދެވޭ ގޮތަށް ބޭއްވި އަޑުއެހުންތަކަށް ފަހު ދޫކޮށްލި އަންހެނުންގެ މައްޗަށް ކޮށްފައި ވަނީ ދީނާ ދެކޮޅަށް މަަސައްކަތް ކުރުމުގެ ތުހުމަތު ކަމަށެވެ.
ދޫކޮށްލި އަންހެނުންގެ މައުލޫމާތު ހާމަކޮށްފައި ނުވި ނަމަވެސް، އެ މީހުންނަކީ ބްލޮގަރު އީމާން އަލް-ނަޖްފާން އާއި އަޒީޒާ އަލް-ޔޫސުފް އަދި ކުރީގެ ކިންގް ސައުދް ޔުނިވަރސިޓިގެ ލެކްޗަރަރއިން ރުގިއްޔާ އަލް-މުހާރެބް ކަމަށް ރިޕޯޓްތަކުން ވަނީ ބުނެފައެވެ.
ސައުދީ ނޫސް އެޖެންސީ ސްޕާއިން ރިޕޯޓް ކޮށްފައިވާ ގޮތުގައި އެމީހުން ދޫކޮށްލާފައި ވަނީ ކޯޓު ތެރޭގައި ދެއްކި ވާހަކަތަކަށް ރިއާޔަތް ކުރުމަށް ފަހު ޝަރުތުތަކާއި އެކު ކަމަށެވެ. މީގެ ތެރޭގައި މައްސަލަ ކޯޓުން ވަކިި ގޮތަކަށް ނިމެންދެން ހުރިހާ އަޑުއެހުންތަކަަަކަށް ހާޒިރުވުމަށް ވެސް އެމީހުންގެ މައްޗަށް ވަނީ ޝަރުތު ކޮށްފައެވެ.
ސައުދީން އެމީހުން ހައްޔަރުކޮށްފައި ވަނީ މިދިޔަ އަހަރުގެ ތެރޭގައި އަންހެނުންގެ ހައްގުތަކަށް މަސައްކަތް ކުރާ މީހުންނާ ދެކޮޅަށް އެ ގައުމުގެ ސަރުކާރުން ހިންގި ކެމްޕޭނެއްގެ ތެރެއިންނެވެ. އެމީހުން ހައްޔަރު ކޮށްފައިވަނީ ޒަމާންތަކެއް ވަންދެން ސައުދީގައި އަންހެނުންނަށް އެއްގަމު އުޅަނދު ދުއްވުން މަނާކޮށްފައި އޮތް އޮތުން ނިމުމަކަށް ގެނައުމުގެ ދުވަސްތަކެއް ކުރިންނެވެ. އެ މީހުން ވަކާލާތު ކުރި ބައެއް ކަންކަމުގެ ތެރޭގައި މިކަމާއި ދެކޮޅަށް މަަސައްކަތް ކުރުން ހިމެނެއެވެ.
