ޑަބްލިއު.ޑީ.ސީން ވިލިމާލޭގައި ގަސް ވިއްކުމުގެ ހަރަކާތެއް ކުރިއަށް ގެންދަނީ
މި މަހުގެ 29 ވާ ހުކުރު ދުވަހުގެ 2:00 އިން ފެށިގެން 6:00 އަށް
ވިލިމާލޭގައި އިންދާފައިވާ ގަސްތަކެއް
މާލޭ ސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމެޓީ (ޑަބްލިއުޑީސީ) އިން އިސްނަގައިގެން ވިލިމާލޭގައި ގަސް ވިއްކުމުގެ ޕްރޮގްރާމެއް ކުރިއަށް ގެންދަން ނިންމަވާފައި ވާކަމަށް އެ ކޮމެޓީގެ ނައިބުރައީސާ ޒުލައިޚާ އަލީ ވިދާޅުވެއްޖެއެވެ.
ރާއްޖެޓީވީއަށް މައުލޫމާތު ދެއްވަމުން ޒުލައިޚާ ވިދާޅުވީ ޑަބްލިއުޑީސީން އިސްނަގައިގެން މިފަދަ ޕްރޮގްރާމެއް ވިލިމާލޭގައި ކުރިއަށް ގެންދިއުމުގެ މަގުސަދަކީ އެ އަވަށުގައި ދިރިއުޅޭ ރައްޔިތުން ޚާއްސަ ގޮތެއްގައި އަންހެން ކަނބަލުން ގޭގައި ތިބެގެން ކުރާ މަސައްކަތްތައް އާންމު ރައްޔިތުންނަށް ދައްކާލުމާއި އަދި އެ މަސައްކަތުން އެފަދަ ފަރާތްތަކަށް ނަފާއެއް ހޯދައިދިނުމުގެ މަގު ތަނަވަސް ކޮށްދިނުމެވެ.
ޒުލައިޚާ ވިދާޅުވީ ވިލިމާލެއަކީ ތިމާވެއްޓައް ޚާއްސަ ސަމާލުކަމެއް ދޭ ރައްޔިތެއް ދިރިއުޅޭ އަވަށެއް ކަމަށެވެ. އެ އަވަށުގައި ދިރިއުޅޭ ރައްޔިތުންނަކީ ތަފާތު އެކި ކަހަލަ ބާވަތްތަކުގެ ގަސް ހެއްދުމަށް ވަރަށް ބޮޑު ސަމާލު ކަމެއް ދޭ ބައެއް ކަމަށާއި އަދި އެކަމަށް ވަރަށް ބޮޑު ޝައުގުވެރިކަމެއް ބަހަށްޓާ ބައެއް ކަމަށެވެ.
އެގޮތުން އެ އަވަށުގެ ގޭގޭގަ އޮންނަ ހުސްބިން ކޮޅުގަޔާއި، ފުރާޅުމަތީގަޔާއި މަގުމަތީގައި އެކި ބާވަތްތަކުގެ އެތައްހާސް ގަހެއް އިންދާ ހައްދާފައި ވާކަމަށާއި ނަމަވެސް އެފަރަތްތަކަށް އެތަކެތި ވިއްކައިގެން ނަފާއެއް ހޯދުމުގެ ފުރުސަތު ކުޑަ ކަމަށް ޒުލައިޚާ ވިދާޅުވިއެވެ.
އަދި އެފަރަތްތަކުން ގަސްތައް އިންދާ ހައްދަނީ އެކަމަށް ވަރަށް ބޮޑު ހޭދައެއްކޮށް އަދި ވަރަށް ބުރަ މަސައްކަތުން ކަން ވެސް ޒުލައިޚާ ވަނީ ފާހަގަ ކުރައްވަފައެވެ.
އެހެންކަމުން މިފަދަ ފަރާތްތަކުން ކުރަމުންދާ ބުރަ މަސައްކަތަށް އެކަށީގެންވާ ނަފާއެއް އެ ފަދަ ފަރާތްތަކަށް ލިބެންޖެހޭ ކަމަށް ގަބޫލު ކުރެވޭ ކަމަށް ވެސް އޭނާ ވިދާޅުވިއެވެ.
މާރޗު މަހުގެ 29 ވާ ހުކުރު ދުވަހުގެ 2:00 އިން ފެށިގެން 6:00 ގެ ނިޔަލަށް ވިލިމާލޭގައި ކުރިއަށް ގެންދިއުމަށް ހަމަޖެހިފައިވާ ގަސް ވިއްކުމުގެ މި ޕްރޮގްރާމްގައި ގަސްތައް ވިއްކުމަށް ހަމަޖެހިފައި ވަނީ 25 ރުފިޔާ އިން ފެށިގެން 100 ރުފިޔާއާ ދެމެދުގެ އަގުތަކެއްގައި ކަމަށް ޑަބްލިއުޑީސީން މައުލޫމާތު ދެއެވެ.
މި ހަރަކާތުގައި އެކި ބާވަތުގެ މާ އަޅާ ގަހާއި، ތަރުކާރީ ގަހުގެ އިތުރުން ފަތްޕިލާވެލީގެ ގަސްތަކާއި މޭވާ ގަސް ވިއްކުމަށް ހަމަޖެހިފައި ވެއެވެ.
