މަޖިލިސް އިންތިޚާބުގައި ވާދަކުރައްވާ ކެންޑިޑޭޓުންގެ އަދަދު 386 އަށް
21 މާރިޗު 2019 | ބުރާސްފަތި 06:44މިފަހަރުގެ އިންތިޚާބުގައި 87 ދާއިރާއަކަށް މެމްބަރުން މަޖިލީހަށް އިންތިޚާބު ކުރާނެ
ނިމިދިޔަ ރިޔާސީ އިންތިޚާބުގައި މީހަކު ވޯޓުލަނީ
އެޕްރީލް 6 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާ ކެންޑިޑޭޓުންގެ އަދަދަކީ 386 ކަމަށް އިލެކްޝަންސް ކަމިޝަން(އީސީ) އިން ބުނެފިއެވެ.
މަޖިލީހުގެ އިންތިހާބަށް ވޯޓު ކަރުދާސް ޗާޕް ކުރުމާއި ހަމައަށް ކެންޑިޑޭޓުންގެ ނަން އަނބުރާ ގެންދިޔުމުގެ ފުރުސަތު އޮންނާނެ ކަމަށާއި އޭގެ ފަހުން ކެންޑިޑޭޓުންގެ ނަން ނުނެގޭނެ ކަމަށް އީސީ އިން ވަނީ ކަނޑައަޅާފައެެވެ.
އީސީއިން ބުނީ ކެންޑިޑޭޓް ނަމްބަރުތައް ތަރުތީބު ކުރި އިރާއި ހަމައަށް ތިބީ 389 ކެންޑިޑޭޓުންނެވެ. އެހެން ނަމަވެސް ނަންބަރު ތަރުތީބު ކުރި ފަހުން ތިން ކެންޑިޑޭޓުން ނަން އަނބުރާ ގެންގޮސްފައި ވުމުން އިންތިޚާބުގައި ވާދަކުރާނީ 386 ކެންޑިޑޭޓުން ކަމަށް އީސީއިން ބުނެއެވެ.
ނަން އަނބުރާ ގެންދިޔައީ މަހިބަދޫ ދާއިރާއަށް އެމްޑީޕީން ވާދަކުރަން ނިންމި އަލީ އަހްމަދު އާއި ހިތަދޫ މެދުދާއިރާއަށް އަމިއްލަ ގޮތުން ވާދަކުރަން ނިންމި ޒާހިދު ރަމީޒު އާއި ލޭބަރ ޕާޓީން ގެމަނަފުށީ ދާއިރާއަށް ވާދަކުރަން ނިންމި މުހައްމަދު އިލްހާމްއެވެ.
އޭޕްރީލް މަހުގެ 6 ވަނަ ދުވަހު ބޭއްވުމަށް ހަމަޖެހިފައިވާ މަޖިލީހުގެ އިންތިޚާބުގައި ވޯޓު ލުމުގެ ހައްގު 264،589 މީހުންނަށް ލިބިފައިވެއެވެ. މިފަހަރުގެ އިންތިޚާބުގައި 87 ދާއިރާއަކަށް މެމްބަރުން މަޖިލީހަށް އިންތިޚާބު ކުރާނެއެވެ.
