އދ. ގެ ހައިކޮމިޝަނަރ ފޯ ހިއުމަން ރައިޓްސްއާ ރައީސް ނަޝީދު ބައްދަލުކުރައްވައިފި
ސިޔާސީ މަޝްރަޙާ ގުޅޭ ގޮތުން ވަނީ މަޝްވަރާކުރައްވާފަ
ޒައިދު ރައާދު އަލް ޙުސައިންއާއި ކުރީގެ ރައީސް މުޙައްމަދު ނަޝީދު
އދ. ގެ ހައިކޮމިޝަނަރ ފޯ ހިއުމަން ރައިޓްސް ޒައިދު ރައާދު އަލް ޙުސައިންއާއި ކުރީގެ ރައީސް މުޙައްމަދު ނަޝީދު ބައްދަލުކުރައްވައިފިއެވެ.
އަންގާރަ ދުވަހު ހެނދުނު ޖެނީވާގައި އޮތް މި ބައްދަލުކުރެއްވުމުގައި ދިވެހިރާއްޖޭގެ ހީނަރުވަމުން އަންނަ ސިޔާސީ މަޝްރަޙާ ގުޅޭ ގޮތުން ޒައިދު ރައާދު އަލް ޙުސައިންނާއި ރައީސް ނަޝީދު ވަނީ މަޝްވަރާކުރައްވާފައެވެ.
ހައިކޮމިޝަނަރ ވިދާޅުވީ ދިވެހިރާއްޖޭގައި ހިނގަމުން އަންނަ ކަންކަން ގާތުން ބައްލަވާ ކަމަށާއި، ކުރިއަށް އޮތް ރިޔާސީ އިންތިޚާބަކީ މިނިވަން އިންސާފުވެރި އަދި ހުރިހާ ފަރާތްތަކަށް ޖާގަ ދެވޭނެ އިންތިޚާބަކަށް ހެއްދެވުމަށް މަސައްކަތް ކުރައްވާނެ ކަމަށެވެ. އަދި ދިވެހިރާއްޖޭގައި މިހާރު މިހިނގާ ކަންކަމާ މެދު އިންތިހާއަށް ކަންބޮޑުވެވެޑައިގަންނަވާ ކަމަށާއި ސިޔާސީ ކަންކަމާ ގުޅިގެން ހައްޔަރުކުރެވި ޖަލަށްލާފައިވާ ސިޔާސީ ކުށްވެރިން މިނިވަން ކުރުމަށް މަސައްކަތް ކުރައްވާނެ ކަމުގައިވެސް ހައިކޮމިޝަނަރު ވިދާޅުވިއެވެ.
