ޔޫޓްރެކްޓްގައި ދިން ބަޑީގެ ހަމަލާއާއި ޓެރަރިޒަމާ ގުޅުން ހުރި ކަމަށް ބެލެވޭ: ފުލުހުން

ނެދަލެންޑްސްގެ ޔޫޓްރެކްޓްގައި ބަޑިން ހަމަލާދީ ތިން މީހުން މަރާލި ކަމުގެ ތުހުމަތު ކުރެވޭ ގޮކްމަން ތާނިސް ފިލަން ގެންގުޅުނު ކާރުތެރެއިން ފެނުނު ސިޓީއެއްގެ ސަބަބުން އެ އަމަލަކީ ޓެރަރިސްޓް އަމަލެއްގެ ގޮތުގައި ބެލެވޭ ކަމަށް ޔޫޓްރެކްޓްގެ ފުލުހުން ބުނެފިއެވެ.

ފުލުހުން ބުނީ ގޮކްމަންގެ އިތުރުން 40 އަހަރުގެ މީހަކު ވެސް މި މައްސަލައާއި ގުޅިގެން މިހާރު ހައްޔަރުކުރެވިފައިވާ ކަމަށެވެ. އޭނާ މި ހަމަލާގައި ބައިވެރިވީ މިންވަރު ކަނޑައެޅުމަށް ތަހުގީގު ކުރަމުންދާ ކަމަށް ވެސް ފުލުހުން ވަނީ ބުނެފައެވެ. ހޯމަ ދުވަހު ހައްޔަރުކުރެވުނު އިތުރު ދެ މީހަކު މިހާރު ދޫކޮށްލެވިފައިވާ ކަމަށް ވެސް އެ ފަރާތުން ވަނީ ބުނެފައެވެ. ހަމަލާދިން ތާނިސްއަކީ ފުލުހުން ކުރިން ވެސް ބަލަމުން ދިޔަ މީހެއް ކަމަށް ފުލުހުން ކުރިން ވަނީ ބުނެފައެވެ.

ހައްޔަރު ކުރި ވަގުތު ތާނިސް އަތުން ބަޑިއެއް ފެނުނު ކަމަށް ޕްރޮސިކިއުޓަރުން ވަނީ ބުނެފައެވެ. އަދި އޭނާ ފިލަން މަސައްކަތް ކުރީ ހަމަލާދިން ސަރަހައްދުން ވަގަށް ނެގި ކާރެއްގައި ކަމަށް ވެސް ޕްރޮސިކިއުޓަރުން ވަނީ ހާމަކޮށްފައެވެ.

ޓެރަރިޒަމާ ގުޅުން ހުރި ކަމަށް ފުލުހުން ބުނެފައިވީ ނަމަވެސް ތާނިސް ދަންނަ ފަރާތްތަކުން ބުނެފައިވަނީ އޭނާއަކީ އަބަދުވެސް ކުށްކުރަމުން އަންނަ މީހެއް ކަމަށެވެ. އެގޮތުން އޭނާގެ މައްޗަށް ރޭޕްގެ ދައުވާއަކާއި އެހެނިހެން ކުދި މައްސަލަތަކުގައި ދައުވާ ކުރަން ފޮނުވާފައިވާ ކަން ފުލުހުން ވަނީ ކަށަވަރު ކޮށްދީފައެވެ.

ޔޫޓްރެކްޓްގައި ދިން ބަޑީގެ ހަމަލާގައި ތިން މީހުން މަރުވެ އިތުރު ތިން މީހަކަށް އެކިވަރުގެ ޒަހަމް ލިބިފައިވެއެވެ. މި ހަމަލާއާއި މުސްލިމުންނާ ގުޅުވާއިރު، ނިއުޒިލެންޑުގެ ކްރައިސްޗާޗްގައި މިދިޔަ ހުކުރު ދުވަހު މުސްލިމުންނަށް އަމާޒުކޮށް ދިން މި ކަހަލަ ހަމަލާއެއްގައި ވަނީ 50 މީހަކު މަރާލާފައެވެ.