ތޫފާނު އިޑާއީގައި މަރުވި މީހުންގެ އަދަދު 1000އަށް އަރާފާނެ: މޮޒަމްބީކުގެ ރައީސް

މޮޒަމްބީކަށް އެރި ތޫފާޏު އިޑާއީގައި މަރުވި މީހުންގެ އަދަދު 1000އަށް ވުރެ މައްޗަށް އަރާފާނެ ކަމަށް އެ ގައުމުގު ރައީސް ފެލީޕޭ ޔޫސީ ވިދާޅުވެއްޖެއެވެ.

ތޫފާނުގައި ގެއްލުން ލިބުނު ހިސާބުތައް ފްލައިޓެއްގައި ބެއްލެވުމަށް ފަހު ނޫސްވެރިންނާއި ވާހަކަފުޅު ދައްކަވަމުން ޔޫސީ ވިދާޅުވީ ރަސްމީ ހިސާބުތަކުން އަދި މިހާތަނަށް 84 މީހުން މަރުވެފައިވާކަމަށް ދެއްކި ކަމުގައިވީ ނަމަވެސް މި އަދަދު 1000އަށް އަރާފާނެ ކަމަށް ދެކިވަޑައިގަންނަވާ ކަމަށެވެ. ތޫފާނުގެ ސަބަބުން އެއްލައްކަ މީހުން އަދިވެސް ތިބީ ނުރައްކަލުގެ ތެރޭގައި ކަމަށް ވެސް ޔޫސީ ވިދާޅުވިއެވެ. އެ މަނިކުފާނު ވިދާޅުވީ ފްލައިޓުގައި މަތިން ދިޔަ ގަޑީގައި މަރުވެފައިވާ މީހުންގެ ހަށިގަނޑުތައް ފެނުނު ކަމަށެވެ.

މީގެ އިތުރުން ކޯރުތައް ބަންޑުން ޖެހުމާއި ގުޅިގެން ބައެއް އަވަށްތައް އެއްކޮށް ނެތި ގޮސްފައިވާ ކަމަށް ޔޫސީ ވިދާޅުވިއެވެ. އަދި ބައެއް ސަރަހައްދުތަކަށް ވަދެވޭ މަގުތައް އެއްކޮށް ބަންދުވެފައި ވުމުން އެހީ ފޯރުކޮށް ދިނުމުގައި ގިނަ ދަތިތަކާއި ކުރިމަތި ލާން ޖެހުފައިވާ ކަމަށް އެ މަނިކުފާނު ވިދާޅުވިއެވެ.

މި ތޫފާނުގައި އެންމެ ގެއްލުން ލިބުނު އެއް އަވަށަކީ މޮޒަމްބީކްގެ ބެއިރާއެވެ. އެ ސަރަހައްދުގެ ހުރިހާ ހިސާބުތަކެއް ކަހަލަ ގޮތަކަށް ހަލާކުވެފައިވާ އިރު، މުއާސަލާތީ ހިދުމަތް ވެސް ވަނީ މެދުކެނޑިފައެވެ. ތޫފާނު އިޑާއީގައި އެ އަވަށުގެ އެއަރޕޯޓާއި މަގުތައް ވެސް ވަނީ ބޭނުންނުކުރެވޭ ވަރަށް ހަލާކުވެފައި ކަމަށް އެ ސަރަހައްދުގައި ހަރަކާތްތެރިވަމުންދާ ރެޑް ކްރޮސްގެ އޮފިޝަލުން ވަނީ ބުނެފައެވެ.

ބުރާސްފަތި ދުވަހު މޮޒަމްބީކް އާއި އަވަށްޓެރި މަލާވީ އަދި ޒިމްބާބްވޭއަށް މި ތޫފާނުގެ އަސަރުކޮށްފައިވާ އިރު، މިހާތަނަށް 150 މީހުންގެ ފުރާނަ ގެއްލިފައިވާ ކަމަށް އދ.އިން ވަނީ ރިޕޯޓްކޮށްފައެވެ. ތޫފާނު އިޑާއީގެ އަސަރު 1.5 މިލިއަން މީހުންނަށް ކޮށްފައިވާ ކަމަށް ވެސް އދ.އިން ވަނީ އަންދާޒާ ކޮށްފައެވެ.