ކްރައިސްޓްޗާޗް ހަމަލާ: ހަމަލާ ދިން ވީޑިއޯގެ 1.5 މިލިއަން ކޮޕީ ފޭސްބުކުން ބޭރުކުރި

މިދިޔަ ހުކުރު ދުވަހު ނިއު ޒިލެންޑްގެ ކްރައިސްޓްޗަރޗުގައި ހުންނަ ދެ މިސްކިތަށް ދިން ބަޑީގެ ހަމަލާގެ ވީޑިއޯގެ 1.5 މިލިއަން ކޮޕީ ބޭރު ކޮށްފައިވާ ކަމަށް ފޭސްބުކުން ބުނެފިއެވެ.

ހަމަލާދިން ކަމަށް ތުހުމަތު ކުރެވޭ ބްރެންޓަން ޓެރަންޓް ވަނީ އެހަމަލާ ފޭސްބުކުން ލައިވް ކޮށްފައެވެ. އަދި އެކަން ފޭސްބުކަށް އެނގުނީ ނިއު ޒިލެންޑުގެ ފުލުހުން އެކުންފުންޏަށް އެންގުމުންނެވެ.

ފޭސްބުކުން ބުނެފައިވަނީ ނިއު ޒިލެންޑްގެ ކްރައިސްޓްޗަރޗުގައި ހުންނަ ދެ މިސްކިތަށް ދިން ބަޑީގެ ހަމަލާގެ ފޭސްބުކް ލައިވް އެކުންފުނިން ވަނީ 24 ގަޑި އިރު ތެރޭ 1.5 މިލިއަން ކޮޕީ ފޭސްބުކުން ރިމޫވްކޮށްފަ އެވެ. އޭގެ ތެރެއިން 1.2 މިލިއަން ކޮޕީ އަޕްލޯޑު ކުރުމުގެ ކުރިން ވަނީ ހުއްޓުވާފައި ކަމަށެވެ.

ނިއު ޒިލެންޑުގެ ބޮޑުވަޒީރު ޖަސިންދާ އާޑާން ވިދާޅުވީ ދެ މިސްކިތަށް ދިން ހަމަލާއަށް ފަހު ސޯޝަލް މީޑިއާ ކުންފުނިތަކުން ޒިންމާދާރުވާން ޖެހޭ ކަމަށެވެ. ހަމަނުޖެހުމަށް މަގުފަހިވާ އަދި ނަފުރަތު ފެތުރޭ ފަދަ ކޮންޓެންޓް ފެތުރުން ހުއްޓުވުމަށް އެކަމަނާ ވަނީ ސޯޝަލް މީޑިއާ ކުންފުނިތަކަށް ގޮވާލައްވާފައެވެ.

ކްރައިސްޓްޗަރޗުގެ ހަމަލާގައި 50 މީހުން ޝަހީދުވެފައިވާއިރު 38 މީހަކަށް އަދިވެސް ދަނީ ފަރުވާ ދެމުންނެވެ. އޭގެ ތެރެއިން 11 މީހަކު އޮތީ ސީރިއަސް ހާލުގައެވެ. ސީރިއަސް ހާލުގައި ތިބި މީހުންގެ ތެރޭގައި 11 އަހަރުގެ ކުޑަ އަންހެން ކުއްޖެއް ވެސް ހިމެނެއެވެ. ޝަހީދުވި މީހުންގެ ތެރޭގައި ސައުދީ އަރަބިއްޔާ، ތުރުކީ، އުރުދުން، ބަންގްލަދޭޝް، އިންޑޮނީޝިއާ އަދި މެލޭޝިއާއަށް ނިސްބަތްވާ މުސްލިމުން ހިމެނެއެވެ.