އަދާލަތުގެ ދެ ކެންޑިޑޭޓަކަށް ތާއީދު ކުރުމަށް އެމްޑީޕީން ނިންމައިފި
17 މާރިޗު 2019 | އާދީއްތަ 14:42އަދާލަތު ޕާޓީގެ ނިންމުމަށް އެމްޑީޕީން ވަނީ މަރްހަބާ ކިޔާފައި
އެމްޑީޕީ އާއި އަދާލަތު ގުޅިގެން އެކުގައި މަސައްކަތް ކުރުމަށް ވަނީ ނިންމާފައި | އެމްޑީޕީ
ރައްޔިތުންގެ މަޖިލީހުގެ އިންތިޚާބުގައި އދ. މަހިބަދޫ ދާއިރާ އާއި ފ. ނިލަންދޫ ދާއިރާއަށް ވާދަކުރާ އަދާލަތު ޕާޓީގެ ކެންޑިޑޭޓުންނަށް ތާއީދު ކުރުމަށް އެމްޑީޕީން ނިންމައިފިއެވެ.
ދެ ޕާޓީ އެކުގައި ރައްޔިތުންގެ މަޖިލީހުގެ އިންތިޚާބު ކާމިޔާބު ކުުރުމަށް އެކުގައި މަސައްކަތް ކުރުމަށް ނިންމާފައިވާތީ، އެމްޑީޕީން ނެރެފައިވާ ނޫސް ބަޔާނުގައި ބުނެފައި ވަނީ ސަރުކާރުގެ ވަޢުދުތައް ފުއްދުމަށްޓަކައި "އެޖެންޑާ 19"އަށް ޢަދާލަތު ޕާޓީން ތާއިދު ކުރުމަށް ނިންމަވާފައި ވާތީ އެކަމަށް އެމްޑީޕީން މަރުހަބާ ކިޔާ ކަމަށެވެ.
ރައްޔިތުންގެ މަޖިލީހުގެ އިންތިޚާބުގައި މަހިބަދޫ ދާއިރާގެ އިތުރުން ނިލަންދޫ ދާއިރާއަށް ޢަދާލަތު ޕާޓީއިން ކަނޑައަޅާފައިވާ ކެންޑިޑޭޓުންނަށް އެމްޑީޕީން ތާޢީދުކޮށް އެ ގޮނޑިތައް ކާމިޔާބުކުރުމަށް އެކުގައި މަސައްކަތް ކުރުމަށް ވަނީ ހަމަޖެހިފައެވެ.
މަހިބަދޫ ދާއިރާއަށް އަދާލަތުން ނެރެފައި ވަނީ ގާނޫނީ ވަކީލު އަލީ އާޒިމެވެ. އެ ޕާޓީގެ ފަރާތުން ނިލަންދޫ ދާއިރާއަށް ވާދަ ކުރަނީ މުއްސަބު މުހައްމަދެވެ.
ޢަދާލަތު ޕާޓީއަކީ ރައީސް ޔާމީންގެ ސަރުކާރުގެ އަނިޔާވެރިކަމާއި ޚިޔާނާތާއި ވައްކަމާއި ދެކޮޅަށް އެމްޑީޕީ އާއި އެކީގައި ފެށި މަސައްކަތުގައި މިހާތަނަށް ވެސް އެކުގައި ސިޔާސީ މަސައްކަތް ކުރަމުން އަންނަ ޕާޓީއެއް ކަމަށް އެމްޑީޕީން ނެރެފައިވާ ނޫސް ބަޔާނުގައި ވަނީ ބުނެފައެވެ.
ރައްޔިތުންގެ މަޖިލީހުގެ އިންތިޚާބުގައި ކާމިޔާބު ކުރުމަށް އެމްޑީޕީން ދަނީ ގިނަ މަސައްކަތްތައް ކުރަމުންނެވެ. އެޖެންޑާ 19ގެ ނަމުގައި އެމްޑީޕީން ކެމްޕޭން ފަށާފައިވާއިރު، އެ ޕާޓީން ދަނީ ރާއްޖޭގެ ގިނަ ސަރަހައްދުތަކަށް ކެމްޕޭން ދަތުރުތައް ކުރަމުންނެވެ. އަދި މި ދަތުރުތަކުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ގެންދަވަނީ ބައިވެރިވެވަޑައިގަންނަވަމުންނެވެ. އަދި ސަރުކާރުގެ ވައުދުތައް ފުއްދުމަށް އެމްޑީޕީއަށް މަޖިލީހުގެ މެޖޯރިޓީ ދިނުމަށް ރައީސް ސޯލިހު ގެންދަވަނީ ގޮވާލައްވަމުންނެވެ.
ރައްޔިތުންގެ މަޖިލީހުގެ އިންތިޚާބު ބޭއްވުމަށް ހަމަޖެހިފައިވަނީ އަންނަ މަހު ހައެއްގައެވެ.
