އަތޮޅުތައް "ވިއްކާލުމަށްފަހު"، ރައީސް ޔާމީން ފިއްލަވާ ވަޑައިގަންނަވާނެ: ޑރ. ޑީޑީ

އަޑިއަޑިން ޑީލްތައް ހައްދަވައި، ރާއްޖެގެ ހުރިހާ ރަށްތަކާއި ފަރުތައް ވިއްކަވާލެއްވުމަށްފަހު، ރައީސް އަބްދުﷲ ޔަމީން 2018 ވަނަ އަހަރު ޤައުމު ދޫކުރައްވާ ފިއްލަވާ ވަޑައިގަންނަވާނެ ކަމަށް އެމްޑީޕީގެ ކުރީގެ ރައީސް ޑރ. އިބްރާހިމް ދީދީ (ޑރ. ޑީޑީ) ތުހުމަތުކުރައްވައިފި އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ޑރ. ޑީޑީ ވިދާޅުވީ ސަރުކާރުގެ އިސްވެރިން، ހުރިހާ ހިދުމަތެއް ޔަޤީންކޮށްދެއްވުނުކަމަށް ވިދާޅުވެ ފޮނި ވާހަކަތައް ދެއްކެވި ނަމަވެސް އެއްވެސް ކަމެއް ޔަޤީން ނުވާ ކަމަށެވެ. ހަމައެކަނި ޔަޤީންވެފައި ވަނީ ކޮރަޕްޝަނާއި ވައްކަން ކަމަށާއި، މުޅި ސަރުކާރުގައި ވެސް އޮތީ ކޮރަޕްޝަނާއި ވައްކަން ކަމަށް ޑރ. ޑީޑީ ވިދާޅުވި އެވެ.

އޭނާ ވިދާޅުވީ، ސަރުކާރުގެ ހުރިހާ މުއައްސަސާއެއް ފެއިލްވެފައި ވާއިރު، ވައްކަންކުރާ މީހުންނަށް އެކަމުގެ އަދަބު ވެސް ނުލިބޭ ކަމަށެވެ. އަދި ވިދާޅުވީ އެމްއެމްޕީއާރުސީގެ ވައްކަމަކީ ސީދާ ސަރުކާރުގެ ވެރިން ބައިވެރިވެ ހިންގާފައިވާ ބޮޑު ވައްކަމެއް ކަމަށާއި، އެކަމުގެ ޒިންމާ ރައީސް ޔާމީން ސީދާ ގޮތުން ނަންގަންވަންޖެހިވަޑައިގަންނަވާނެ ކަމަށެވެ.

"ރައްޔިތުންނަށް ޔަޤީން ވެފައިވަނީ މިސަރުކާރުން ވައްކަން ކުރާނެކަން. މިސަރުކާރުގެ ހުރިހާ މުއައްސަސާއަކުންވެސް ވައްކަން ކުރަނީ. ވައްކަމުގެ ތުހުމަތު ކުރެވޭ އެއްވެސް ފަރާތަކަށް އެކަމުގެ އަދަބެއް ނުދޭ. އެމްއެމްޕީއާރްސީގެ ވައްކަމަކީ ސީދާ މިސަރުކާރުގެ އިހުމާލުން ކޮށްފައިވާ ކަމެއް. އެކަމުގެ ފުރިހަމަ ޒިންމާ ރައީސް ޔާމިން ނަންގަވަން ޖެހިވަޑައިގަންނަވާނެ." ޑރ. ޑީޑީ ވިދާޅުވި އެވެ.

ޑރ. ޑީޑީ ވިދާޅުވީ ވައްކަންތައްކުރުމަށްފަހު، މިއަދު އަޑުއިވޭ ވާހަކައަކީ ފ. އަތޮޅު ވިއްކާލަން އުޅޭ ވާހަކަ ކަމަށާއި، ރައްޔިތުންނަށް ހަޤީޤަތް ނޭނގޭގޮތަށް މިހާރު ރާއްޖޭގެ ހުރިހާ ރަށަކާއި ފަޅެއްވެސް ވިއްކަލަފާނެކަމަށް ގަބޫލުކުރެއްވޭ ކަމަށެވެ. ފެންނަ މަންޒަރަށް ބަލާއިރު، ޤަބޫލުކުރެވެނީ ސަރުކާރުން ރަށްތައް ވިއްކަވާލެއްވުމަށްފަހު ރައީސް ޔާމީން ޤައުމު ދޫކުރައްވާ ވަޑައިގަންނަވާނެކަން ކަމަށް ޑރ. ޑީޑީ ވިދާޅުވި އެވެ. އެގޮތުން ޑީޑީ ވިދާޅުވީ 2018 ވަނަ އަހަރު ރައީސް ޔާމީން ޤައުމު ދޫކޮށް ފިއްލަވާނެ ކަމަށެވެ.

"މިއީ ރައްޔިތުންގެ ފައިސާ ދެއްތޯ. މިއީ ރައީސް އަބްދުﷲ ޔާމީންގެ ޖީބުން ނަގާ ފައިސާއެއް ނޫން ދެއްތޯ. މިއަދު މި ފެންނަނީ ދަރަނި އަދާކުރަން އަނެއްކާ ލޯނުތައް ނަގާ ތަން. ދަރަނި އަދާކުރަން އަނެއްކާ ދަރަންޏަށް ފައިސާ ނަގާ ވާހަކަ މި ދައްކަނީ. އަނެއް ދުވަހު އަޅުގަނޑުމެންނަށް މި އަޑުއިވެނީ ފ. އަތޮޅު ވިއްކާލުމަށް ޑީލްތައް ހެދި ވާހަކަ. އޭގެ ނާޖާއިޖް ފައިދާ ނަގަމުންދާތަން. އަޅުގަނޑަކަށް ނޭނގޭ މިއަދު އަޑިއަޑިން އެންމެ އަތޮޅެއްވެސް ވިއްކާނުލާ އޮތް ކަމެއް." ޑރ. ޑީޑީ ވިދާޅުވި އެވެ.