ޓްރަމްޕްގެ ކެމްޕެއިންގެ އިސްވެރިޔާއަށް އިތުރު 43 މަހުގެ ޖަލުހުކުމެއް
30 މަސް ދުވަސް ހިނގާނީ ދެ ހުކުމް އެކުއެކީގައި
މެނަފޯޓްގެ މައްޗަށް އިއްވަވާފައިވާ ޖަލު ހުކުމުގެ މުއްދަތު 73 މަސް ދުވަހަށް އަރާ
އެމެރިކާގެ މިހާރުގެ ރައީސް ޑޮނަލްޑް ޓްރަމްޕްގެ ރިޔާސީ ކެމްޕެއިނާ ރަޝިއާއާ އޮތް ގުޅުން ތަހުގީގުގެ ތެރެއިން ޓްރަމްޕްގެ ކެމްޕެއިންގެ ކުރީގެ ވެރިޔާ ޕައުލް މެނަފޯޓް އިތުރު 43 މަހަށް ޖަލަށްލުމަށް ހުކުމް ކޮށްފިއެވެ.
މި ހުކުމް އައިސްފައި މިވަނީ އުމުރުން 69 އަހަރުގެ މެނަފޯޓްއަށް އިތުރު މައްސަލައެއްގައި 47 މަހުގެ ޖަލުހުކުމެެއް އިއްވިތާ ހަފްތާއެއްގެ ތެރޭގައެވެ.
މި ފަހަރުގެ ހުކުމް އައިސްފައި މިވަނީ މިދިޔަ އަހަރު ސާބިތުވި ދެ ދައުވާއާއި ގުޅިގެންނެވެ.
ވޮޝިންގޓަން ޑީސީގައި ހުންނަ ފެޑެރަލް ކޯޓުގައި މެނަފޯޓްވަނީ އޭނާއަށް ކުރެވުނު ކުށަށް މައާފަށް އެދެން ބޭނުން ކަަމަށް ބުނެފައެވެ.
"އަޅުގަނޑަށް ކުރެވުނު ކަންތަކަށް އަދި އަޅުގަނޑުމެން މި ހާލަތަށް އައުމަށް ދިމާވި ހުރިހާ ކަމަކަށް އަޅުގަނޑު މައާފަށް އެދެން" ފުރޮޅުލީ ގޮނޑީގައި އިނދެ މެނަފޯޓް ބުންޏެވެ.
މިދިޔަ ހަފްތާގައި ކުރި ހުކުމާއެކު ޑިސްޓްރިކްޓް ކޯޓުގެ ފަނޑިޔާރު އެމީ ބަރމަން ޖެކްސަން މެނަފޯޓްގެ މައްޗަށް އިއްވަވާފައިވާ ޖަލު ހުކުމުގެ މުއްދަތު 73 މަސް ދުވަހަށް އަރައެވެ. މީގެ ތެރެއިން 30 މަސް ދުވަސް ހިނގާނީ ދެ ހުކުމް އެކުއެކީގައެވެ.
ދެ މައްސަލަ ވެސް އައިސްފައިވަނީ 2016 ވަނަ އަހަރުގެ ރިޔާސީ އިންތިޚާބަށް ނުފޫޒު ފޯރުވި މައްސަލައިގެ ތަހުގީގުގެ ތެރެއިންނެވެ.
މިއީ މި މައްސަލައިގެ ތަހުގީގުގެ ތެރެއިން އިއްވުނު އެންމެ ދިގު މުއްދަތުގެ ޖަލުހުކުމެވެ.
