ރާއްޖޭގެ ޞިއްޙީ ޚިދުމަތް ތަރައްޤީ ކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ނ. ވެލިދޫ އާއި، ޅ. ހިންނަވަރުން ދެވޭ ޚިދުމަތް އިތުރަށް ފުޅާ ކުރުމުގެ ގޮތުން އެތަންތަން ހޮސްޕިޓަލް ލެވެލް އަށް ތަރައްޤީ ކުރުމަށް ސަރުކާރުން ނިންމާފައިވާ ކަމަށް ހެލްތު މިނިސްޓްރީން ބުނެފި އެވެ. 

ހެލްތު މިނިސްޓްރީ ނެރުނު ނޫސް ބަޔާނެއްގައި ބުނީ އެ ޕްރޮޖެކްޓްތަކުގެ މަސައްކަތް ފެއްޓުމައްޓަކައި ހަދަން ޖެހޭ ޢިމާރާތް ޑިޒައިންކޮށް ކުރެހުންތަކާއި، ބިލް އޮފް ކުއަންޓީޓީ އާއި، ޓެންޑަރ ޑޮކިޔުމެންޓް ހަދާނެ ފަރާތްތަށް ހޯދުމަށް 5 މާރޗް 2018 ގައި އިއުލާންކޮށްފައިވާކަމަށެވެ. އަދި ޖާގައިގެ ދަތިކަން ޙައްލު ކުރުމުގެ ގޮތުން ނ. މަނަދޫ އަތޮޅު ހޮސްޕިޓަލާއި، ބ. އޭދަފުށީ އަތޮޅު ހޮސްޕިޓަލާއި، ދ. ކުޑަހުވަދޫ އަތޮޅު ހޮސްޕިޓަލުގައި އަޅާ އާޢިމާރާތް ޑިޒައިންކޮށް ކުރެހުން ތަކާއި، ބިލް އޮފް ކުއަންޓީޓީ އާއި، ޓެންޑަރ ޑޮކިޔުމެންޓް ހަދާނެ ފަރާތްތަށް ހޯދުމަށްވެސް 5 މާރޗް 2018 ގައި ވަނީ އިޢްލާން ކުރެވިފައިކަމަށް މިނިސްޓްރީން ބުންޏެވެ. 

އޭގެއިތުރުން އަލަށް އަޅާ ހޮސްޕިޓަލްތަކާއި އިތުރަށް ތަރައްޤީ ކުރާ ޞިއްޙީ ޚިދުމަތްދޭ ތަންތަނުގައި އެތަންތަނާއި އެކަށީގެންވާ ވަރަށް ޕްރައިވެޓް ރޫމްތައް އެޅުމަށް ވަނީ ނިންމާފައިކަމަށް މިނިސްޓްރީން ބުނެ އެވެ. އެގޮތުން ނ. ވެލިދޫ، ޅ. ހިންނަވަރު، ދ. ކުޑަހުވަދޫ، ނ. މަނަދޫ އަދި ބ. އޭދަފުށީގައި ޕްރއިވެޓް ރޫމް އެޅިގެން ދާނެކަމަށް މިނިސްޓްރީން ބުންޏެވެ. 

ރައީސް އިބްރާހިމް މުހައްމަދު ސޯލިހް، ރިޔާސީ އިންތިހާބުގައިވެވަޑައިގެންނެވި ވައުދުތަކުގެ ތެރޭގައި ރާއްޖޭގެ ސިއްހީ ނިޒާމް ހަރުދަނާކުރުން ހިމެނެ އެވެ. އެގޮތުން އަތޮޅުތަކުން ލިބޭ ސިއްހީ ހިދުމަތުގެ ފެންވަރު ރަނގަޅުކޮށް، ބޭސް ފަރުވާއަށް ސަލާންޖެހުން ނިމުމަކަށް ގެނައުމަށް މަސައްކަތްކުރައްވާނެކަމަށް އެމަނިކުފާނު ވައުދުވެވަޑައިގެންފައިވެއެވެ.