ރުކުމާގެ ނަން ނެންގެވުމަށް ރައީސް ނަޝީދު އެދިވަޑައިގެންފި
86 ދާއިރާގެ ތެރެއިން ދެރަ އަޚްލާގެއްގައި ފެނުނީ އެންމެ ކުއްޖެއް
ހެންވޭރު ދެކުނު ދާއިރާގެ މެމްބަރު މުހައްމަދު އަބްދުލްކަރީމް (ރުކުމާ އަހުމަދު)
އެމްޑީޕީގެ ޕްރައިމަރީގައި ނާކާމިޔާބުވެ ވަޑައިގެންނެވި ހެންވޭރު ދެކުނު ދާއިރާގެ މެމްބަރު މުހައްމަދު އަބްދުލްކަރީމް (ރުކުމާ އަހުމަދު) އަމިއްލަ ގޮތުން އިންތިޚާބުގައި ވާދަނުކުރައްވަން އެމްޑީޕީގެ ރައީސް މުހައްމަދު ނަޝީދު އެދިވަޑައިގެންފިއެވެ.
އއ. އުކުޅަހުގައި ބޭއްވި ތޮއްޑޫ ދާއިރާގެ މެމްބަރު ހަސަން ޝިޔާންގެ ކެންޕެއިން ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ ތޮއްޑޫ ދާއިރާއަށް ޝިޔާނާ އެކު ވާދަކުރައްވައި ނާކާމިޔާބުވި ހުސައިން ސަމީރަކީ ނަމޫނާ ދެ ބޭފުޅުން ކަމަށެވެ. އެ ދެ ބޭފުޅުން ފެނުމުން ހަމަތަކެއް ގަބޫލުކުރައްވާ އެ ދެ ބޭފުޅުންގެ އަޚުލާގު އެނގިވަޑައިގެންފި ކަމަށެވެ. އަދި އެމްޑީޕީގެ ޕްރައިމަރީ އިން ބަލިވި ކެންޑިޑޭޓުން ނެރުމަށް އިންތިހާއަށް ސުޕްރީމް ކޯޓު ލައްވާ ބަޔަކު މަސައްކަތް ކުރުވި ކަމަށާއި އެ މަސައްކަތުން އެ ޕާޓީ އިން ހަގީގަތުގައި ނިކުންނެވީ އެންމެ ކެންޑިޑޭޓެއް ކަމަށެވެ. އަދި އެމަނިކުފާނަށް ފެނުނީ އެމްޑީޕީ ކެންޑިޑޭޓުންގެ ތެރެއިން "ދެރަ އަޚުލާގުގެ" އެންމެ ކެންޑިޑޭޓެއް ކަމަށާއި އެކަންތައްތައް ނުކުރެއްވުމަށް އެދިލައްވާ ކަމަށެވެ.
މުހައްމަދު އަބްދުލް ކަރީމް އެދާއިރާއަށް ކުރިމަތިނުލައްވާ އަނބުރާ ނަން ނެންގެވުމަށް ވަނީ އެދިވަޑައިގެންފައެވެ. އަދި އެގޮތަށް ކަންތައްތައް ނުކުރައްވައިފި ނަމަ އެމަނިކުފާނު ހެންވޭރު ދެކުނު ދާއިރާގެ ހުރިހާ ގެއަކަށް އަމިއްލަފުޅަށް ވަންނަވައި އެ ދާއިރާ އިން އެމްޑީޕީ ޕްރައިމަރީ ކާމިޔާބު ކުރެއްވި ހުސެއިން ޝަމީމް (އަނދުން ހުސައިން) އަށް ކެންޕެއިން ކުރައްވާނެ ކަމަށް ވިދާޅުވިއެވެ.
"ހުކުމް ނެރުއްވައިގެން މީހުން ލައްވާ ކުރިމަތިލައްވަން އުޅުއްވައިފި. 86 ދާއިރާގެ ތެރެން ހަގީގަތުގައި ނިކުތީ އެންމެ މީހެއް. އެމްޑީޕީގެ އުސޫލުތަކެއް ގަބޫލުކުރާ އެމްޑީޕީގެ ހަމަތަކެއް ގަބޫލުކުރާ އެންމެ މީހެއް. ހެންވޭރު ދެކުނު އަހުމަދު، އޭނާއަކީ ދާއިރާގެ މީހަކަށް އުޅެ ކައުންސިލަށް އިންތިޚާބުވެ އަދި ރައްޔިތުންގެ މަޖިލީހަށް އިންތިޚާބުވި ބޭފުޅެއް. އަޅުގަނޑު އުފާވަނީ 86 ދާއިރާގެ ތެރެއިން ދެރަ އަޚްލާގެއްގައި ފެނުނީ އެންމެ ކުއްޖެއް. އަޅުގަނޑު އުއްމީދުކުރަން އަހުމަދު ވެސް ވީހާ ވެސް އަވަހަށް އަނބުރާ ނުކުންނަވާ އޭނާ އަނބުރާ އައިސް އެ މަސައްކަތް އަނބުރާ ނުކުރައްވާނެ ކަމަށް. ކުރައްވައިފިއްޔާ ހުރިހާ ގެއަކަށް އަޅުގަނޑު ވަންނާނަން. އިރާދަކުރެއްވިއްޔާ އަޅުގަނޑުމެން އެ ގޮނޑި މާ ބޮޑަށް ނަގާނަން،" ރައީސް ނަޝީދު ވިދާޅުވިއެވެ.
އެމްޑީޕީން ވަކިވެވަޑައިގަތުމަށް ފަހު ރުކުމާ އަމިއްލަ ގޮތުން އިންތިޚާބުގައި ވާދަކުރެއްވީ، ޕްރައިމަރީގައި ބަލިވާ ކެންޑިޑޭޓުންނަށް އިންތިޚާބުގައި ވާދަ ނުކުރެވޭނެ ކަމަށް ސިޔާސީ ޕާޓީތަކުގެ ގާނޫނަށް ގެނެސްފައިވާ އިސްލާހު، ސުޕްރީމް ކޯޓުން ބާތިލް ކުރުމުންނެވެ.
ޕްރައިމަރީގައި ނާކާމިޔާބުވެވަޑައިގަތުމުން، ޕާޓީން ވަކިވެ އަމިއްލަ ގޮތުން އިންތިޚާބުގައި ވާދަކުރެއްވުމަކީ ވަރަށް ބޮޑު ބޭވަފާތެރި ކަމެއް ކަމަށް ނަޝީދު މީގެ ކުރިން ވެސް ވަނީ ވިދާޅުވެފައެވެ.
އެމްޑީޕީގެ ދަފްތަރުގައި ތިއްބެވި ބޭފުޅުންގެ ތެރެއިން ރުކުމާގެ އިތުރުން ޕްރައިމަރީގައި ބަލިވި އިތުރު ތިން ފަރާތެއް ވެސް ވާދަކުރެއެވެ. އެއީ ކާށިދޫ ދާއިރާގެ ޕްރައިމަރީގައި ވާދަކުރެއްވި އަބްދުﷲ ޖާބިރާއި އިހަވަންދޫ ދާއިރާގެ މިހާރު ވެސް މެންބަރު މުހައްމަދު އަބްދުﷲ (މުހައްމާ) އަދި ހިތަދޫ އުތުރު ދާއިރާއަށް އަހުމަދު މުހައްމަދެވެ.
