މި ސީޒަނަށްފަހު ރެއާލް މެޑްރިޑަށް ކުޅެމުން އަންނަ ޖަރުމަންގެ މިޑްފިލްޑަރ ޓޯނީ ކްރޫސް މެންޗެސްޓާ ސިޓީއަށް ބަދަލުވާން އުޅޭ ކަމަށް ރިޕޯޓްތައް ބުނެފިއެވެ.

ސްޕެއިންގެ ނޫސްތަކުން ބުނާ ގޮތުން މި ސީޒަނަށްފަހު ކްރޫސް ރެއާލް ދޫކޮށްލާނެއެވެ. އަދި އޭނާ ބަދަލުވާނެ ކަމަށް އެންމެ ބޮޑަށް ބެލެވެނީ ސިޓީއަށް ކަމަށްވެސް ރިޕޯޓްތައް ބުނެއެވެ.

ރެއާލްއާއެކު ކްރޫސް ހަދާފައިވާ އެއްބަސްވުން އަންނަ އަހަރު ހަމަވާއިރު، އެ އެއްބަސްވުން އޭނާ އާކުރާނެ ކަމަށް ނުބެލެވެއެވެ.

ބަޔާން މިއުނިކުން ކެރިޔަރު ފެށި ކްރޫސް ހޯދުމަށް ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މަސައްކަތްކުރަމުންނެވެ. އޭގެ ތެރޭގައި އިޓަލީ، ޖަރުމަން އަދި ފްރާންސްގެ ބައެއް ކްލަބްތައް ވެސް ހިމެނެއެވެ.

އެހެންނަމަވެސް ކްރޫސް އެންމެ ފަހުން ބުނެފައި ވަނީ އޭނާ ރެއާލްގައި ދިގުމުއްދަތެއް ވަންދެން މަޑުކުރަން ބޭނުންވާ ކަމަށާއި، އެ ކްލަބަށް ކާމިޔާބު ހޯދައިދޭން ބޭނުންވާ ކަމަށެވެ.

ބަޔާން މިއުނިކް އަށް ކުޅުނު 205 މެޗުގައި 25 ލަނޑު ކާމިޔާބުކޮށްފައިވާ ކްރޫސް ވަނީ އެޓީމާ އެކު ބުންޑަސްލީގާ ތިންފަހަރު، ޖަރުމަން ކަޕް ތިންފަހަރު، ޔުއެފާ ޗެމްޕިއަންސް ލީގު، ޔުއެފާ ސުޕާކަޕް އަދި ފީފާ ކްލަބް ވާރލްޑް ކަޕް ވެސް ކާމިޔާބުކޮށްފައެވެ.

ބަޔާން ދޫކޮށްލުމަށް ފަހު ހަ އަހަރުގެ އެއްބަސްވުމެއްގެ ދަށުން ކްރޫސް 2014 ވަނަ އަހަރު ރެއާލް އަށް ބަދަލުވިއިރު، އޭނާ ވަނީ އެ ކްލަބަށް މިހާތަނަށް ކުޅުނު 224 މެޗުގައި 13 ލަނޑު ކާމިޔާބުކޮށްފައެވެ.

ކްރޫސް ވަނީ ރެއާލްއާއެކު ތިން ޔުއެފާ ޗެމްޕިއަންސް ލީގާއި، ތިން ފީފާ ކްލަބް ވޯލްޑް ކަޕާއި، ދެ ޔުއެފާ ސުޕާ ކަޕާއި، ސްޕެނިޝް ލަލީގާއެއްގެ އިތުރުން ސްޕެނިޝް ސުޕާކަޕެއްވެސް ކާމިޔާބުކޮށްފައެވެ.

ޖަރުމަން ގައުމީ ޓީމާއެކު 2014 ވަނަ އަހަރު ވޯލްޑް ކަޕް ކާމިޔާބުކޮށްފައިވާ ކްރޫސް ވަނީ ގައުމީ ޖޯޒީގައި ކުޅުނު 91 މެޗުގައި 14 ލަނޑު ކާމިޔާބުކޮށްފައެވެ.