ސްއުތުހޭމްޓަން ކޮޅަށް ފަހު ހާފުގައި ޖެހި ލަނޑުތަކާއެކު އިނގިރޭސި ޕްރެމިއަ ލީގުގެ ތިންވަނަ މަގާމުގައި މެންޗެސްޓާ ސިޓީ ހަމަޖެހިލައިފި އެވެ.

ސައުތުހޭމްޓަންގެ އަމިއްލަ ދަނޑުގައި ކުޅުނު މި މެޗު ސިޓީން ކާމިޔާބުކުރީ 0-3 ގެ ނަތީޖާއަކުންނެވެ.

ސިޓީގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި އެޓީމުން ވަނީ ލަނޑުޖެހުމަށް ބުރަކޮށް މަސައްކަތް ކޮށްފަ އެވެ. އެގޮތުން ސާޖިއޯ އަގުއެރޯ އަދި ލެރޯއި ސާނޭ އުފެއްދި ހަމަލާތައް ފާހަގަކޮށްލެވެ އެވެ. އެހެން ނަމަވެސް ފުރަތަމަ ހާފު ނިމިގެންދިޔައީ އެއްވެސް ޓީމަކަށް ލަނޑެއް ނުޖެހި އެވެ.

މެޗުގެ ދެވަނަ ހާފު ފެށިގެން ދެޓީމުންވެސް ލަނޑެއް ޖެހުމަށް ބުރަކޮށް މަސައްކަތް ކުރި އިރު، ސިޓީން ވަނީ ލަނޑެއްޖަހައި ލީޑު ނަގާފަ އެވެ. އެގޮތުން 55 ވަނަ މިނެޓުގައި މިލަނޑު ކާމިޔާބުކޮށްދިނީ ކެޕްޓަން ވިންސެންޓް ކޮމްޕެނީ އެވެ.

މި ލަނޑަށްފަހު ވެސް ރަނގަޅަށް ކުޅެމުންދިޔަ ސިޓީއަށް ނަތީޖާގެ ފަރަގު ބޮޑުކޮށްދިނީ 77 ވަނަ މިނެޓުގައި ލެރޯއި ސާނޭ އެވެ. ސާނޭ ވަނީ މި މެޗުގައި މޮޅު ކުޅުމެއް ދައްކާފަ އެވެ.

މެޗުގައި ސިޓީއަށް ތިން ޕޮއިންޓް ކަށަވަރުކޮށްދިނީ 80 ވަނަ މިނެޓުގައި ސާޖިއޯ އަގުއެރޯ އެވެ.

މި ނަތީޖާއާއެކު ސިޓީ ތިން ވަނައިގައި އޮތީ 64 ޕޮއިންޓާއެކު އެވެ. މެޗުން ބަލިވި ސައުތުހޭމްޓަން އޮތީ 40 ޕޮއިންޓާއެކު 9 ވަނައިގަ އެވެ.