މި ސީޒަނަށްފަހު ފެބްރިގާސް ޗެލްސީ ދޫކޮށްލަނީ!

މި ސީޒަނަށްފަހު ސެސް ފެބްރިގާސް ޗެލްސީ ދޫކޮށްލާނެ ކަމަށް ރިޕޯޓްތައް ބުނަން ފަށައިފި އެވެ.

ބެއިން ސްޕޯޓް އިން ބުނީ ކުރިޔަށް އޮތް ސީޒަނަށް ފެބްރިގާސްގެ ސޮއި ހޯދުމަށް ގިނަ ކްލަބްތަކުން އަންނަނީ މަސައްކަތްކުރަމުން ކަމަށާއި، އެގޮތުން ފްރާންސްގެ މާސޭ އަދި އިޓަލީގެ އޭސީ މިލާނުން އޭނާ ހޯދުމަށް ބިޑެއް ހުށަހެޅުމަށްވެސް ތައްޔާރުވަމުން އަންނަ ކަމަށެވެ.

މާސޭ އަދި އޭސީ މިލާންގެ އިތުރުން މެންޗެސްޓާ ޔުނައިޓެޑުންވެސް އަންނަނީ ފެބްރިގާސް ހޯދުމަށް މަސައްކަތްކުރަމުންނެވެ. އެގޮތުން ޖެނުއަރީ ޓްރާންސްފާއާ ދިމާކޮށްވެސް ގިނަ ކްލަބްތަކުން ވަނީ ފެބްރިގާސްއަށް ޝައުގުވެރިކަން ފާޅުކޮށްފައެވެ.

ޗެލްސީގައި ހިތްހަމަޖެހިގެން ހުރި ފެބްރިގާސް އަންނަނީ މި ސީޒަނުގައި އެ ކްލަބުގައި މޮޅު ކުޅުމެއް ދައްކަމުންނެވެ. އޭނާ ވަނީ މި ސީޒަނުގައި ޗެލްސީ އަށް ކުޅުނު 30 މެޗުގައި ހަ ލަނޑު ކާމިޔާބުކޮށްފައެވެ.

އާސެނަލް އިން 2003 ވަނަ އަހަރު ކެރިޔަރު ފެށި އުމުރުން 29 އަހަރުގެ ފެބްރިގާސް ވަނީ އާސެނަލްއާ އެކު އޭނާ ހޭދަކުރި އަށް ސީޒަނުގައި އެޓީމަށް ކުޅުނު 303 މެޗުގައި 57 ލަނޑު ކާމިޔާބުކޮށްފަ އެވެ. އާސެނަލް ދޫކޮށްލުމަށް ފަހު 2011 ވަނަ އަހަރު ފެބްރިގާސް ބާސާ އަށް ވަނީ ބަދަލުވެފަ އެވެ. އެގޮތުން އޭނާ ވަނީ އެޓީމާއެކު ހޭދަކުރި ތިން ސީޒަނުގައި މޮޅު ކުޅުމެއް ދައްކާ ގިނަ ކާމިޔާބީތަކެއް ވެސް އެޓީމާ އެކު ހޯދާފަ އެވެ. ބާސާއާއެކު ލަލީގާ، ކޮޕާޑެލްރޭ، ސްޕެނިޝް ސުޕާކަޕް، ޔުއެފާ ޗެމްޕިއަންސް ލީގު އަދި ކްލަބް ވޯލްޑްކަޕް ކާމިޔާބުކުރި ފެބްރިގާސް ޗެލްސީ އަށް ބަދަލުވީ 2014 ވަނަ އަހަރު އެވެ.

ބާސާއާއެކު ކާމިޔާބު ސީޒަންތައް ހޭދަކުރުމަށް ފަހު ޗެލްސީއާ އެކު ހޭދަކުރި ތިން ސީޒަނުގައި އެޓީމަށް ކުޅުނު 103 މެޗުގައި 13 ލަނޑު ކާމިޔާބުކޮށްފައިވާ ފެބްރިގާސް ވަނީ އެޓީމާއެކު ޕްރިމިއާ ލީގު އަދި ލީގު ކަޕް ކާމިޔާބުކޮށްފަ އެވެ.

ސްޕެއިން ގައުމީ ޓީމާއެކު ވޯލްޑްކަޕް ކާމިޔާބުކުރި ފެބްރިގާސް ވަނީ އެގައުމަށް ދެފަހަރު ޔޫރޯ ފުޓުބޯޅަ މުބާރާތް ވެސް ކާމިޔާބުކޮށްދިނުމަށް މުހިންމު ދައުރެއް އަދާކޮށްފަ އެވެ.