އިންޑިއާއިން ހަމަލާދީ ގޮއްވާލި ކަމަށް ބުނި ޖައޭޝްގެ ސްކޫލް އަދިވެސް އެބަހުރި
6 މާރިޗު 2019 | ބުދަ 14:25އެ ސަރަހައްދުގައި ހުރި އެއްވެސް ތަނަކަށް ބޮމުން ގެއްލުން ލިބިފައިވާ ކަމަކަށް ސެޓެލައިޓް މަންޒަރުތަކުން ނުދައްކާ
ރޮއިޓާރޒްއިން އާއްމުކުރި ސެޓެލައިޓް ފޮޓޯތައް
އިންޑިއާއިން ބޮންއަޅާ ގޮއްވާލި ކަމަށް ބުނި ޖައޭޝް-އީ-މުހައްމަދު ޖަމާއަތުގެ މަދަރުސާއަށް އެ ހަމަލާތަކުގައި އެއްވެސް ގެއްލުމެއް ނުލިބޭ ކަން ސެޓެލައިޓް މަންޒަރުތަކުން ކަށަވަރުވެއްޖެއެވެ.
ޕާކިސްތާނުގެ ބަލަކޯޓް ސަރަހައްދުގައި ހުރި ޖައޭޝް ޖަމާއަތުގެ މަދަރުސާއަށް ހަމަލާދީ ގިނަ އަދަދެއްގެ ހަނގުރާމަވެރިން މަރާލެވިފައިވާ ކަމަށް އިންޑިއާއިން ވަނީ ބުނެފައެވެ. ނަމަވެސް އެމެރިކާގެ ޕްރައިވެޓް ކުންފުންޏަކުން ނަގާފައިވާ ސެޓެލައިޓް ފޮޓޯތަކުން ދައްކާ ގޮތުގައި، އިންޑިއާއިން ހަމަލާދިން ކަމަށް ބުނާ ސަރަހައްދުގައި ހުރި އެއްވެސް ތަނަކަށް އެއްވެސް ވަރެއްގެ ގެއްލުމެއް ލިބިފައެއް ނުވެއެވެ.
ސެޓެލައިޓް ފޮޓޯތަކާއި ގުޅިގެން މިހާތަނަށް އިންޑިއާގެ ހާރިޖީ ވުޒާރާއިންނާއި އަސްކަރިއްޔާއަކުން ވެސް އަދި މިހާތަނަށް އެއްވެސް އެއްޗެކޭ ބުނެފައެއް ނުވެއެވެ.
ފެބްރުއަރީ މަހުގެ 26 ވަނަ ދުވަހު ޕާކިސްތާނުގެ ވައިގެ ސަރަހައްދުގެ ތެރެއަށް އިންޑިއާގެ އަސްކަރިއްޔާގެ ޖެޓުތައް ވަދެ ދިން ހަމަލާގައި އެއްވެސް ތަނަކަށް ގެއްލުމެއް ނުވާ ކަމަށާއި އެއްވެސް މީހަކު ވެސް މަރުނުވާ ކަމަށް މީގެ ކުރިން ޕާކިސްތާނުގެ އަސްކަރިއްޔާއިން ވަނީ ބުނެފައެވެ. ޕާކިސްތާނުގެ އަސްކަރިއްޔާއިން އާއްމުކޮށްފައިވާ ފޮޓޯތަކުން ފެންނަ ގޮތުގައި އިންޑިއާގެ ބޮންތައް ވެއްޓިފައި ވަނީ ދަނޑަކަށާއި، މީހުން ނޫޅޭ ޖަންގަލީ ސަރަހައްދަކަށެވެ.
އޭގެ ފަހުން އިންޑިއާގެ ދެ ޖެޓެއް ޕާކިސްތާނުން ވައްޓާލާފައިވާ އިރު، ޕާކިސްތާނުން ހައްޔަރު ކުރި އިންޑިއާގެ ޕައިލެޓު ވެސް އެ ގައުމުން ވަނީ އިންޑިއާއާއި ހަވާލުކޮށްފައެވެ.
ޕާކިސްތާނާއި އިންޑިއާގެ ގުޅުން ގޯސްވީ އިންޑިއާގެ ބެލުމުގެ ދަށުގައި އޮތް ކަޝްމީރުގެ ޕުލްވަމާގައި ދިން ޖާނުން ފިދާވުމުގެ ހަމަލާއެއްގައި އިންޑިއާ ޕެރަމިލިޓަރީ ސިފައިންގެ 42 މީހަކު މަރުވުމާ ގުޅިގެންނެވެ. އިންޑިއާއިން ވަނީ މި ހަމަލާ ދިން ޖައޭޝް ޖަމާއަތަށް ޕާކިސްތާނު ސަރުކާރުން ހިމާޔަތްދޭ ކަމަށް ތުހުމަތުކޮށްފައެވެ. ނަމަވެސް ޕާކިސްތާނުން މި ވާހަކަތައް ދޮގުކުރެއެވެ.
