19 ވަނަ ރައްޔިތުންގެ މަޖިލީހުގެ އިންތިހާބަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުރައްވާ ހުރިހާ ކެމްޕެއިން ދަތުރުފުޅުތަކުގެ ހަރަދު ބަލަހައްޓާނީ އެމްޑީޕީން ކަމަށް އެ ޕާޓީން ބުނެފިއެވެ.
އެމްޑީޕީން ސިލްސިލާކޮށް ކޮންމެ ދުވަހަކު ބާއްވަމުން އަންނަ ނޫސްވެރިންގެ ބައްދަލުވުންތަކުގެ ތެރެއިން އަންގާރަ ދުވަހު ބޭއްވި ބައްދަލުވުމުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޑެޕިއުޓީ ސެކްރެޓަރީ ޖެނެރަލް އަފްޝަން ލަތީފް ވިދާޅުވީ މިރޭ ގުރާދޫ ދާއިރާއަށް އެމްޑީޕީގެ ޓިކެޓުގައި ވާދަކުރައްވާ އާދިލް ސަލީމް ގެ ކެމްޕެއިން ޖަލްސާގައި ރައީސް ސޯލިހުގެ އިތުރުން އެ ޕާޓީގެ ރައީސް ބައިވެރިވެވަޑައި ގަންނަވާނެ ކަމަށް ވިދާޅުވިއެވެ. އަދި ރައީސް ސޯލިހު ކުރައްވާ ހުރިހާ ކެމްޕެއިން ދަތުރުފުޅުތަކުގެ ހަރަދުތައް ބަލަހައްޓާނީ އެމްޑީޕީން ކަމަށާއި، ދަތުރާއި، ކެއުމާއި، ހުރުމުގެ ހުރިހާ ހަރަދުތައް ވެސް ކުރާނީ އެމްޑީޕީން ކަމަށް އަފްޝަން ވަނީ ވިދާޅުވެފައެވެ.
" ރައީސުލްޖުމްހޫރިއްޔާ މިރޭ ގުރައިދޫގަ އޮންނަ ބައްދަލުވުމުގައި ބައިވެރިވެވަޑައިގަންނަވާނެ . މިއީ ރައީސުލްޖުމްހޫރިއްޔާ ބައިވެރިވެވަޑައިގަންނަވާ ފުރަތަމަ ދަތުރުފުޅު ، ރައީސް ކުރައްވާ ހުރިހާ ދަތުރުފުޅެއްގެ ހަރަދު ބަލަހައްޓާނީ އެމްޑީޕީއިން ކަމަށް ދަންނަވަން. ދަތުރާ ، އެކޮމޮޑޭޝަންއާއި ފަރިއްކޮޅުގެ ހުރިހާ ހަރަދެއް ކުރަނީ މި ޕާޓީން ކަން ފާހަގަކޮށްލަން " އަފްޝަން ވިދާޅުވިއެވެ.
ރާއްޖެއެމްވީއަށް މައުލޫމަތު ދެއްވަމުން ރައީސް އޮފީހުގެ ތަރުޖަމާނު އިބްރާހިމް ހޫދު ވިދާޅުވީ ގުރާދޫ ދާއިރާއަށް އެމްޑީޕީގެ ޓިކެޓުގައި ވާދަކުރައްވާ އާދިލް ސަލީމް ގެ ކެމްޕެއިން ޖަލްސާގައި ބައިވެރުވުމަށް ރައީސް މިރޭ ފުރާވަޑައިގަންނަވާނެ ކަމަށާއި ދަތުރުފުޅުގައި ވަޑައިގަންނަވާނީ ހަމައެކަނި ކ. ގުރައިދޫއަށް ކަމަށެވެ . ހޫދު ވަނީ ކެމްޕެއިން ދަތުރަކީ އެމްޑީޕީން ހަރަދުކުރާ ދަތުރެއް ކަމަށް ވިދާޅުވެފައެވެ. މި ދަތުރުގައި ބައިވެރިވެވަޑައިގަތުމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވަނީ މިއަދު ހެނދުނު ފުރާވަޑައިގަންނަވާފައެވެ. ގުރައިދޫ އަށް ވަޑައިގަތުމުގެ ކުރިން ހުރާ އާއި މާފުއްޓަށް ރައީސް ނަޝީދު ވަނީ ވަޑައިގަންނަވާފައެވެ.
މި ދަތުރުފުޅަށް ފަހު ރައީސް ސޯލިހު ވަނީ އެމްޑީޕީގެ ކެމްޕެއިން ދަތުރުފުޅެއްގައި އައްޑޫ އަށް ވަޑައިގަތުމަށް ހަމަޖެހިފައެވެ..
