ހައްޔަރު ކުރާނެ ކަމަށް ބުނި ނަމަވެސް ގައިޑޯ ވެނެޒުއޭލާއަށް ވަޑައިގަންނަވައިފި

ގައުމުން ބޭރަށް ދިއުން މަނާކޮށްފައި ވަނިކޮށް ކޮލަމްބިއާއަށް ވަޑައިގެންނެވި ވެނެޒުއޭލާގެ އިދިކޮޅު ލީޑަރު ހުއާން ގައިޑޯ އަނބުރާ ގައުމަށް ވަޑައިގަންނަވައިފިއެވެ.

ގައިޑޯ ވެނެޒުއޭލާގެ ކަރާކާސްގެ ވައިގެ ބަނދަރަށް ވަޑައިގެން ނޫސްވެރިންނާ ބައްދަލުކުރައްވާ ވިދާޅުވީ މިހުރީ އައިސް ކަމަށާއި، ފެށި މަސައްކަތައިގެން ކުރިއަށް ވަޑައިގަންނަވާނެ ކަމަށެވެ.

ގައުމުން ބޭރަށް ދަތުރުކުރުން ގައިޑޯއަށް މަނާކުރީ އެ ގައުމުގެ ސުޕްރީމް ކޯޓުންނެވެ. މަދޫރޯއަށް ވަފާތެރިން ގިނަ ސުޕްރީމް ކޯޓުގެ ނިންމުމަށް ގޮންޖެހުމުން އޭނާ ހައްޔަރު ކުރާނެ ކަމަށް ބެލެވުނު ކަމުގައިވީ ނަމަވެސް، ކަރާކާސް އެއަރޕޯޓުން އޭނާ ހައްޔަރުކޮށްފައެއް ނުވެއެވެ.

އެއަރޕޯޓުން ނިކުމެގެން ގައިޑޯ ވަނީ އޭނާގެ ސަޕޯޓަރުންނާއި މުހާތަބުކޮށް ވާހަކަދައްކަވަން ލެސް މަރސީޑިޒް ޑިސްޓްރިކްޓަށް ވަޑައިގަންނަވާފައެވެ. ސަޕޯޓަރުންނާއި މުހާތަބުކޮށް ދެއްކެވި ވާހަކުފުޅުގައި، އަނބުރާ ގައުމަށް އައިސްފިނަމަ ހައްޔަރުކުރާނެ ކަމަށާއި މަރާލާނެ ކަމަށް ވެސް އިންޒާރު ދީފައިވާ ކަމަށް ވިދާޅުވެފައެވެ. ނަމަވެސް މިއިން އެއްވެސް ކަމަކާ ގުޅިގެން ފަހަތަށް ޖެހިވަޑަ ނުގަންނަވާނެ ކަމަށް އޭނާ ވިދާޅުވިއެވެ.

އަމިއްލަފުޅަށް އޭނާއަކީ ގައުމުގެ ރައީސްކަމަށް ނިންމެވި ގައިޑޯއަކީ ވެނެޒުއޭލާގެ ވަގުތީ ރައީސްކަމަށް 50އަށް ވުރެ ގިނަ ގައުމަކުން ވަނީ ބަލައިގަނެފައެވެ. އޭގެ ތެރޭގައި އެމެރިކާ އަދި ޔޫރަޕުގެ ގައުމުތަކުގެ އިތުރުން، ވެނެޒުއޭލާގެ އަވަށްޓެރި ގިނަ ގައުމުތައް ވެސް ހިމެނެއެވެ.