ރައީސް އިބްރާހިމް މުހައްމަދު ސޯލިހާއި، ރައީސް މުހައްމަދު ނަޝީދު، ހުކުރު ދުވަހު އައްޑޫ ސިޓީއަށް ވަޑައިގަންނަވާ ދަތުރުފުޅުގައި އެޖެންޑާ 19 އައްޑޫ ތަސައްވަރު އިފްތިތާހުކުރާނެކަމަށް އެމްޑީޕީން ބުނެފި އެވެ. 

ހޯމަ ދުވަހު ނޫސްވެރިންނާ ބައްދަލުކުރައްވައި އެޖެންޑާ 19 ގެ ކޮމިއުނިކޭޝަންސް ކޯޑިނޭޓަރ މުހައްމަދު ސައިފް ފާތިހް ވިދާޅުވީ ، މި ކެމްޕެއިން ދަތުރުގައި ރައީސުން ބައިވެރިވާ ބޮޑު ޖަލްސާއެއް އައްޑޫ ސިޓީގައި ބާއްވާނެކަމަށާއި އައްޑޫއަށް އެޖެންޑާ 19 އިން ހުށަހެޅިފައިވާ ކަންތަކުގެ ޕްރެޒެންޓޭޝަނެއް ވެސް ހުށަހަޅާނެކަމަށެވެ.

މިއީ ރައްޔިތުންގެ މަޖިލީސް އިންތިހާބުގެ ކެމްޕޭން ހަރަކާތްތައް ރަސްމީކޮށް ފެށިފަހުން ރައީސް ސޯލިހް ބައިވެރިވެވަޑައިގަންނަވާ ފުރަތަމަ ކެމްޕޭން ހަރަކާތްތަކެވެ. އެމަނިކުފާނު މީގެކުރިން ވަނީ، އެމްޑީޕީގެ ޕްރައިމަރީގެ ތެރޭގައި ބައެއް ބޭފުޅުންގެ ކެމްޕޭން ހަރަކާތްތަކުގައި ބައިވެރިވެވަޑައިގެންފަ އެވެ.

ރައީސް ސޯލިހާއެކު، އެމްޑީޕީގެ ކެމްޕޭން ހަރަކާތްތަކުގެ ފޯރި ގަދަކުރާއިރު، އެމްޑީޕީއަށް މެޖޯރިޓީ ލިބުމަކީ މުހިންމުކަމެއް ކަމަށް ރައީސް ސޯލިހް މީގެކުރިން ވަނީ ވިދާޅުވެފަ އެވެ. އަދި ސަރުކާރުގެ ވައުދުތައް ފުއްދުމަށް ވެސް އެމްޑީޕީއަށް މެޖޯރިޓީ މުހިންމުވާކަން އެމަނިކުފާނު ވަނީ ފާހަގަކުރައްވާފަ އެވެ.

މީގެ އިތުރުން ނޫސްވެރިންގެ ބައްދަލުވުމުގައި ވަނީ މި މަހުގެ 13 އިން 15 އަށް ރައީސް މުހައްމަދު ނަޝީދު ކެމްޕެއިން ދަތުރުފުޅެއްގައި ކޮލަމްބޯއަށް ވަޑައިގަންނަވާނެ ކަމަށް އިއުލާނުކޮށްފައެވެ،.