ރައީސް ސޯލިހާއި، ރައީސް ނަޝީދު އައްޑޫ ސިޓީއަށް ވަޑައިގަންނަވަނީ
ރައީސް ސޯލިހާއި، ރައީސް ނަޝީދު އައްޑޫ ސިޓީއަށް ވަޑައިގަންނަވާނީ މިމަހުގެ 8 ވަނަ ދުވަހުން މި މަހުގެ 10 ވަނަ ދުވަހަށް
1 ނޮވެމްބަރު 2018، ރައީސް ނަޝީދު މާލެ ވަޑައިގެންނެވުން
ރައީސް އިބްރާހިމް މުހައްމަދު ސޯލިހާއި، ރައީސް މުހައްމަދު ނަޝީދު، ހުކުރު ދުވަހު އައްޑޫ ސިޓީއަށް ވަޑައިގަންނަވާނެ ކަމަށް އެމްޑީޕީން ބުނެފި އެވެ.
ސަރުކާރު ހިންގާ މައި ޕާޓީ، އެމްޑީޕީން ބުނީ، ރައީސް ސޯލިހާއި، ރައީސް ނަޝީދު އައްޑޫ ސިޓީއަށް ވަޑައިގަންނަވާނީ މިމަހުގެ 8 ވަނަ ދުވަހުން މި މަހުގެ 10 ވަނަ ދުވަހަށް ކަމަށެވެ. އަދި މި ދަތުރުފުޅަކީ، ކުރިއަށް އޮތް މަޖިލީސް އިންތާހުބުގެ ކެމްޕޭން ހަރަކާތްތަކުގައި ބައިވެރިވަޑައިގެންނެވުމަށް ކުރައްވާ ދަތުރުފުޅެއްކަމަށް ވެސް އެމްޑީޕީން ބުންޏެވެ.
އެމްޑީޕީން ބުނީ، ރައީސް ސޯލިހާއި، ރައީސް ނަޝީދުގެ މި ދަތުރުފުޅުގައި އެކި ދާއިރާތަކުގައި ކެމްޕޭންގެ ކުލަގަދަ ހަރަކާތްތަކެއް ކުރިއަށްގެންދާނެ ކަމަށެވެ. އަދި ކެމްޕޭން އެއްވުންތަކާއި، ޖަލްސާތައް ވެސް ބާއްވާނެ ކަމަށް އެ ޕާޓީން ބުނެ އެވެ.
މިއީ ރައްޔިތުންގެ މަޖިލީސް އިންތިހާބުގެ ކެމްޕޭން ހަރަކާތްތައް ރަސްމީކޮށް ފެށިފަހުން ރައީސް ސޯލިހް ބައިވެރިވެވަޑައިގަންނަވާ ފުރަތަމަ ކެމްޕޭން ހަރަކާތްތަކެވެ. އެމަނިކުފާނު މީގެކުރިން ވަނީ، އެމްޑީޕީގެ ޕްރައިމަރީގެ ތެރޭގައި ބައެއް ބޭފުޅުންގެ ކެމްޕޭން ހަރަކާތްތަކުގައި ބައިވެރިވެވަޑައިގެންފަ އެވެ.
ރައީސް ސޯލިހާއެކު، އެމްޑީޕީގެ ކެމްޕޭން ހަރަކާތްތަކުގެ ފޯރިި ގަދަކުރާއިރު، އެމްޑީޕީއަށް މެޖޯރިޓީ ލިބުމަކީ މުހިންމުކަމެއް ކަމަށް ރައީސް ސޯލިހް މީގެކުރިން ވަނީ ވިދާޅުވެފަ އެވެ. އަދި ސަރުކާރުގެ ވައުދުތައް ފުއްދުމަށް ވެސް އެމްޑީޕީއަށް މެޖޯރިޓީ މުހިންމުވާކަން އެމަނިކުފާނު ވަނީ ފާހަގަކުރައްވާފަ އެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ސަރުކާރު ހިންގާ ކޯލިޝަންގެ ޕާޓީތަކުން ވާދަކުރަނީ ވަކިވަކިންނެވެ.
