އެމެރިކާގައި 2020 ވަނަ އަހަރު ބާއްވާ ރިޔާސީ އިންތިޚާބުގައި ވާދަކުރައްވާނެކަން ސެނޭޓަރ ބަރނީ ސޭންޑަރސް އިއުލާނު ކުރައްވައިފިއެވެ.

މިނިވަން މެމްބަރެއްގެ ގޮތުގައި ވާމޮންޓްގެ ގޮނޑި ތަމްސީލް ކުރައްވާ އުމުރުފުޅުން 77 އަހަރު ފުޅުގެ ސޭންޑަރސް 2016ވަނަ އަހަރު ޑެމޮކްރެޓިކް ޕާޓީގެ ޓިކެޓަށް ވާދަކުރައްވައި ނާކާމިޔާބާ ކުރިމަތިލައްވަން ޖެހިވަޑައިގަތީ ހިލަރީ ކްލިންޓަންއާ ވާދަކުރައްވައެވެ.

ކެމްޕެއިން ލޯންޗް ކުރެއްވުމަށް ނިއުޔޯކްގެ ބްރޫކްލިންގައި ބޭއްވި ބައްދަލުވުމެއްގައި ވާހަކަދައްކަވަމުން ސޭންޑަރސް ވިދާޅުވީ ރައީސް ޑޮނަލްޑް ޓްރަމްޕްއަކީ އެމެރިކާގެ ތާރީޚު ދުށް "އެންމެ ނުރައްކާތެރި"ރައީސް ކަމަށެވެ.

ބަރނީ ސޭންޑަރޒް ދެވަނަ ފަހަރަކަށް ޑިމޮކްރެޓިކް ޓިކެޓަށް ވާދަކުރައްވާނެ ކަން އިއުލާން ކުރައްވަމުން ސޭންޑަރސް ވިދާޅުވީ، ވާދަކުރައްވަން ނިންމެވީ ދެ ސަބަބަކާއި ހުރެގެން ކަމަށެވެ. އެއް ކަމަކީ މިހާރުގެ ރައީސް ޑޮނަލްޑް ޓްރަމްޕްއާއި ދެކޮޅަށް ނިކުތުން ކަމަށާއި، އަނެއް ކަމަކީ 2016 ވަނަ އަހަރުގެ ޑިމޮކްރެޓިކް ޕާޓީގެ ޓިކެޓަށް ވާދަކުރެއްވި މެނިފެސްޓޯގައި ހުރި ކަންކަން ކުރެއްވުމަށް ކަމަށެވެ. ބަރނީ ސޭންޑަރޒްގެ 2016 ވަނަ އަހަރުގެ މެނިފެސްޓޯގައި އެމެރިކާގެ ރައްޔިތުންނަށް ޔުނިވާރސަލް ހެލްތްކެއަރ އަދި މިނިމަން ވޭޖްގެ ގޮތުގައި ގަޑި އިރަކަށް 15 ޑޮލަރު ދޭނެ ކަމަށް ހިމަނާފައި ވެއެވެ.

ޑެމޮކްރެޓިކް ޕާޓީގެ ޓިކެޓަށް އިތުރު 10 ކެނޑިޑޭޓަކު ވާދާކުރައްވާނެކަން އިއުލާނުކުރައްވާފައިވާއިރު އޭގެތެރޭގައި މަސަޗޫސެޓްސްގެ ސެނޭޓަރ އެލިޒަބްތު ވޮރެންއާއި ނިއުޖަރޒީގެ ސެނޭޓަރ ކޮރީ ބުކަރ އަދި  ޓެކްސަސްގެ ސެން އެންޓޯނިއޯގެ މޭޔަރ ޖޫލިއަން ކާސްޓްރޯ ހިމެނިވަޑައިގަންނަވައެވެ.

ސޭންޑރސްވަނީ އޭނާގެ ވެރިކަން ވެގެންދާނީ ރައްޔިތުން އެއްބައިކުރުވާނެވެރިކަމެއްކަމަށް ވިދާޅުވެފައެވެ.

ސޭންޑަރސްގެ ކުރީގެ ވައުދުތައް ތަކުރާރު ކުރައްވާއިރު އެންމެ ދަށް މުސާރައިގެ ގޮތުގައި ގަޑިއަކަށް 7.25 އެމެރިކާ ޑޮލަރުގެ ބަދަލުގައި ގަޑިއަކަށް 15 އެމެރިކާ ޑޮލަރަށް ބަދަލުކުރައްވާނެކަމުގެ ވައުދުވަނީ މިފަހަރުވެސް ހިމަނުއްވާފައެވެ.

މީގެ އިތުރުން ލިޔެކިއުމެއް ނެތި އެމެރިކާގައި ތިބި ރެފިއުޖީން އެގައުމުގައި ތިބެވޭގޮތް ހައްދަވައި އިމިގްރޭޝަނަށް ބަދަލުތަކެއް ގެންނަވާނެކަމަށްވަނީ ވައުދުވެވަޑައިގެންފައެވެ.

ސިއްހީ ދާއިރާއަށް ބަދަލު ގެންނަވައި ޔުނިވާސަލް ހެލްތުކެއަރ ނިޒާމެއް ގާއިމްކުރެއްވުމާއި ކޮލެޖްތަކާއި ޔުނިވާސިޓީތަކުގެ ޓިއުޝަން ފީ ހިލޭ ލިބޭނެ އިންތިޒާމް ހަމަޖައްސަވާނެކަމަށްވެސްވަނީ ވައުދުވެ ވަޑައިގެންފައެވެ.

ނަމަވެސް އެ ފަހަރު ހީކުރި ގޮތާ ހިލާފަށް ސޭންޑަރޒް ވަނީ ވަރުގަދަ ކެމްޕެއިންއެއް ކުރައްވައި ގިނަ ޒުވާން ޑިމޮކްރެޓުންގެ ތާއީދު ހޯދުމަށް ފަހު، 52 ސްޓޭޓްގެ ތެރެއިން 23 ސްޓޭޓް ކާމިޔާބު ކުރައްވާފައެވެ.