ބުރާސްފަތި 22 އޮކްޓޯބަރ 2020
05 ހެއި
1442 ރަބީއުލް އައްވަލް 05
ފަތިސް 04:37
އިރުއަރާ 05:49
މެންދުރު 11:55
އަސްރު 15:11
އިރުއޮއްސޭ 17:53
އިޝާ 19:05
ފްރާންސްގެ އިންތިޚާބު

ރިޔާސީ އިންތިޚާބު ކާމިޔާބު ކުރައްވައި ފްރާންސްގެ އެންމެ ޒުވާން ރައީސްއަކަށް މެކްރޮން

  • ލެޕެން ވަނީ މެކްރޮންއަށް ގުޅުއްވައި ބަލި ގަބޫލުކުރައްވައި މަރުހަބާ ވިދާޅުވެފަ
  • މެކްރޮން ވަނީ ޔޫރަޕާ އޮތްގުޅުންވަރުގަދަ ކުރެއްވުމަށް މަސައްކަތް ކޮށްދެއްވާނެ ކަމަށް ވައުދުވެ ވަޑައިގެންފަ

ކ. މާލެ | 8 މެއި 2017 | ހޯމަ 15:46 | 2,170

އުމުރުފުޅުން 39 އަހަރުފުޅުގެ މެކްރޮންއަކީ ކުރިން އިކޮނޮމިކް މިނިސްޓަރުކަންވެސް އަދާކުރައްވާފައިވާ ބޭފުޅެއް - އޭޕީ

އާދީއްތަ ދުވަހު ފަރަންސޭސި ވިލާތުގައި ބޭއްވި ރިޔާސީ އިންތިޚާބުގައި ކަނާތުފިޔައިގެ ކެނޑިޑޭޓް މެރިން ލެޕެންގެ މައްޗަށް ކުރި ހޯއްދަވައި މެދުމިނުގެ ސިޔާސަތަށް ތާއީދުކުރައްވާ އެމެނުއެލް މެކްރޮން އިންތިޚާބު ކާމިޔާބު ކުރައްވައިފިއެވެ.

އިންވެސްޓްމެންޓް ބޭންކް ހިންގެވުމުގައި ކުރިން އުޅުއްވާފައިވާ އުމުރުފުޅުން 39 އަހަރުފުޅުގެ މެކްރޮންއަކީ ކުރިން އިކޮނޮމިކް މިނިސްޓަރުކަންވެސް އަދާކުރައްވާފައިވާ ބޭފުޅެކެވެ. އެ މަނިކުފާނު ވެގެންދާނީ ނަޕޯލިއަންއަށްފަހު އެގައުމުގައި ވެރިކަންކުރައްވާ އެންމެ ޒުވާން ރައީސަށެވެ.

މެކްރޮން އިންތިޚާބު ކާމިޔާބު ކުރެއްވުމަކީ ޔޫރަޕްގެ ލީޑަރުންނަށް ފިނިކަމެއް ލިބިވަޑައިގެންނެވި ކަމަކަށް ވެގެންދާނެއެވެ.

އިންތިޚާބުގައި ނާކާމިޔާބީއާ ކުރިމަތިވެ ވަޑައިގެންނެވި ކަނާތު ފިޔައިގެ ލީޑަރު ލެޕެން ގެންދެވީ އިނގިރޭސި ވިލާތެކޭ އެއްގޮތަށް ފްރާންސުންވެސް ޔޫރަޕްގެ އިއްތިހާދުން ވަކިވާން ޖެހިދާނެކަމުގެ އިޝާރާތްތައް ކުރައްވަމުންނެވެ.

އިންތިޚާބުގެ ނަތީޖާ މިހާރު ދައްކާގޮތުން ލެޕެންއަށް 35އިންސައްތަ ލިބިވަޑައިގެންނެވިއިރު މެކްރޮންއަށް 65 އިންސައްތަ ލިބިވަޑައިގަންނަވާނެ ކަމަށް ބެލެވެއެވެ.

"އަޅުގަނޑުމެންގެ ތާރީޚުގެ އާ ސަފްހާއެއް މިރޭ މިދަނީ ހުޅުވިގެން"ނަތީޖާ އިއުލާނުކުރުމާއެކު ދެއްވި ކުރު ބަޔާނެއްގައި ވިދާޅުވިއެވެ.

މެކްރޮން ވިދާޅުވީ މި ނަތީޖާ ވާން ބޭނުންފުޅުވަނީ އުއްމީދާ އިތުބާރު ހޯދައިދޭ ނަތީޖާއަކަށް ކަމަށެވެ.

މެކްރޮންވަނީ ފްރާންސްގެ ބައިބައިވުން ނައްތަވާލައްވައި އެ ގައުމުގެ ރައްޔިތުންނާ ޔޫރަޕާ އޮތްގުޅުންވަރުގަދަ ކުރެއްވުމަށް މަސައްކަތް ކޮށްދެއްވާނެ ކަމަށް ވައުދުވެ ވަޑައިގެންފައެވެ.

އިންތިޚާބުގައި ނާކާމިޔާބީ އާއި ކުރިމަތިލައްވަން ޖެހިވަޑައިގަތް ލެޕެން ވަނީ މެކްރޮންއަށް ގުޅުއްވައި ބަލި ގަބޫލުކުރައްވައި މަރުހަބާ ވިދާޅުވެފައެވެ.

އެކަމަނާވަނީ އާ ރައީސަށް ކާމިޔާބީއަށް އެދިވަޑައިގަންނަވާކަމަށް ވިދާޅުވެފައެވެ.

ނަމަވެސް އެ ކަމަނާ ވަނީ އެފްއެން ޕާޓީއިން އެ ޕާޓީއަށް ބަދަލުތައް ގެނެސް އާ ބާރެއް އުފައްދަން ޖެހިވަޑައިގަންނަވާކަމަށް ވިދާޅުވެފައެވެ.

 

 

 

އެންމެ ފަހުން އަޕްޑޭޓް ކުރީ: 7 މަސް ކުރިން | ރިވިއު ކުރީ: އަޒުމޫން އަހުމަދު

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.