މުސްލިމް ހަ ގައުމަކުން އެމެރިކާ އަށް މީހުން އެތެރެވުން މަނާކުރާ ރިޔާސީ އަމުރަށް އަމަލު ކުރަން ފަށައިފި

މުސްލިމް ހަ ގައުމަކުން އެމެރިކާ އަށް މީހުން އެތެރެވުން މަނާކޮށް މާޗު މަހު ރައީސް ޑޮނަލްޑް ޓްރަމްޕް ނެރުއްވި ރިޔާސީ އަމުރަށް އަމަލު ކުރަން ފަށައިފިއެވެ.

ޓްރަމްޕް ނެރުއްވި ރިޔާސީ އަމުރަށް އަމަލު ކުރަން ފަށައިފައިވާއިރު މިކަމުގެ ސަބަބުން މުސްލިމު ހަ ގައުމެއްގެ ރައްޔިތުންނާއި އަދި ރެފިއުޖީންގެ ގޮތުގައި އެމެރިކާ އަށް އެތެރެވާ ފަރާތްތަކަށް ދަތިތަކެއް ކުރިމަތިވާނެއެވެ. އެގޮތުން އެމެރިކާ އަށް އެތެރެވުން މަނާވެފައިވާ މުސްލިމު ހަ ގައުމަށް ނިސްބަތްވާ ރައްޔިތުންގެ ތެރެއިން މީހަކަށް އެމެރިކާ އަށް އެތެރެވެވޭނީ އެމެރިކާގައި، އެ އެތެރެވާން ބޭނުންވާ މީހެއްގެ "ގާތް" އާއިލީ ގުޅުމެއް ނުވަތަ ވިޔަފާރީގެ ގުޅުމެއް އޮތް ނަމައެވެ.

އެމެރިކާގެ ޝަރުއީ ދާއިރާއިން ޓްރަމްޕްގެ ރިޔާސީ އަމުރަށް ގޮންޖެހުންތަކެއް ކުރިމަތިވިއިރު އެންމެ ފަހުން ޓްރަމްޕަށް ކޮންމެވެސް ވަރެއްގެ ކާމިޔާބީއެއް ލިބިގެން ދިޔައީ ސްޕްރީމް ކޯޓުންނެވެ.

ރައީސް ޓްރަމްޕް ގެ ސަރުކާރުން ވަނީ ރިޔާސީ އަމުރަށް އަމަލު ކުރުމުގެ ކުރިން ފަހު ވަގުތު ކުޑަ ބަދަލެއް ވެސް ގެނެސްފައެެވެ. އެގޮތުން ގާތް އާއިލާ ގުޅުންތަކުގެ ތެރޭގައި ކައިވެނި ކުރަން އެއްބަސްވެފައިވާ އަންހެން މީހާ ނުވަތަ ފިރިހެން މީހާ ހިމެނުމެވެ.

ރައީސް ޓްރަމްޕް މާޗްގައި ނެރުއްވި އަމުރުގައި ވަނީ އީރާން، ލީބިޔާ، ސޯމާލިއާ، ސޫދާން، ސީރިޔާ އަދި ޔަމަނުން އެމެރިކާ އަށް މީހުން އެތެރެވުން 90 ދުވަހަށް މަނާކުރުމެވެ. އަދި ރެފިއުޖީންގެ ގޮތުގައި އެއްވެސް މީހަކު އެތެރެވުން 120 ދުވަހަށް ހިފަހައްޓަން ވެސް އަމުރުގައި ވެއެވެ. ޖެނުއަރީ މަހު އެންމެ ފުރަތަމަ ނެރުނު އަމުރުގައި އިރާގުގެ ރައްޔިތުން ހިމެނުނަސް ފަހުގެ އަމުރުގައި އެ ގައުމުގެ ނަން އޮތީ އުނިކޮށްފަ އެވެ.

ރައީސް ޓްރަމްޕްގެ، މުސްލިމް ހަ ގައުމަކުން އެމެރިކާ އަށް މީހުން އެތެރެވުން މަނާކުރާ އަމުރަށް ސްޕްރީމް ކޯޓުން ކާމިޔާބެއް ލިބުނަސް، އެ ކޯޓުން މުޅި މައްސަލަ އާއި މެދު އަދި ގޮތެއް ނުނިންމައެވެ. ސްްޕްރީމް ކޯޓުން އެ މައްސަލަ އޮކްޓޯބަރު މަހު ބަލާ ހުކުމަކަށް ދާނެއެވެ.