ޖަލު ބަންދުގައި ހުންނެވި ލުލާ ކާފަ ދަރިފުޅުގެ ޖަނާޒާއަށް ދޫކުރަނީ

ޖަލުބަންދުގައި ހުންނެވި ބްރެޒިލްގެ ކުރީގެ ރައީސް ލުއިސް އިނާޝިއޯ ލޫލާ ޑަ ސިލްވާ، ކާފަ ދަރިފުޅުގެ ޖަނާޒާއަށް ދޫކުރުމަށް ނިންމައިފިއެވެ.

އުމުރުން ހަތް އަހަރުގެ ކާފަ ދަރިފުޅު މަރުވެފައި ވަނީ މެނިންޖައިޓިސް އަށް ފަރުވާ ހޯދަމުންދަނިކޮށް ހުކުރު ދުވަހުއެވެ.

ހޮނިހިރު ދުވަހު ބާއްވާ ޖަނާޒާއަށް ސައޮ ޕޯލޯއަށް ދިއުމަށް ލޫލާ އަށް ވަނީ ހުއްދަ ދީފައެވެ.

ކޮރަޕްޝަނުގެ ދައުވާކޮށް 12 އަހަރުގެ ހުކުމެއް އިއްވައި ލޫލާ ޖަލަށްލާފައި ވަނީ މިދިޔަ އަހަރުއެވެ.

ލޫލާވަނީ އޭނާއަށް އިއްވާފައި ވަނީ ސިޔާސީ ހުކުމެއް ކަމަށް ވިދާޅުވެފައެވެ.

ޔޫނިއަން ލީޑަރެއްގެ ގޮތުގައި ފާހަގަކުރެވިގެންދިޔަ ވާތުފިޔައިގެ ލީޑަރެއް ކަމަށްވާ ލޫލާ އެ ގައުމުގެ ވެރިކަން ކުރައްވާފައި ވަނީ 2003 އިން 2010 އަށެވެ.

ލޫލާވަނީ މިދިޔަ ޖެނުއަރީ މަހު ބޭބެއެއްގެ ޖަނާޒާ އަށް ދިއުމަށް ވެސް އެދިވަޑައިގެންފައެވެ. ނަމަވެސް ޖަނާޒާ ފެށެންްދެން ވެސް ސުޕްރީމް ކޯޓުން ލޫލާއަށް ހުއްދަ ދީފައެއް ނުވެއެވެ. ނަމަވެސް ލޫލާގެ ކާފަ ދަރިފުޅު އަރްތޫރުގެ ޖަނާޒާއަށް ސައޮޕޯލޯއަށް ދިއުމަށް ޕެރަނާގެ ސްޓޭޓް ސަރުކާރުން ވަނީ ހުއްދަ ދީފައެވެ.

މިއީ މިދިޔަ އަހަރުގެ އޭޕްރީލް މަހު ހުކުމްކޮށް ޖަލަށްލީފަހުން ލޫލާ ޖަލުން ނުކުމެވަޑައިގަންނަވާ ފުރަތަމަ ފަހަރެވެ.