ސްރީލަންކާގެ ހުރި ރިއަލް ސްޓޭޓް ފުރުސަތުތަކާ ބެހޭގޮތުން ދިވެހިންނަށް މައުލޫމާތު ދިނުމުގެ ގޮތުން އިންވެސްޓާސް ފޯރަމެއް ބާއްވާ ގޮތަށް ހަމަޖައްސައިފިއެވެ. 

މާޗް މަހުގެ ހަތަރު ވަނަ ދުވަހު ހޮޓެލް ޖެންގައި ބޭއްވުމަށް ހަމަޖެހިފައިވާ މި ސެމިނާ އިންތިޒާމް ކުރަނީ ރިސާޗް އިންޓެލިޖެންސް ޔުނިޓް ޕްރައިވެޓް ލިމިޓެޑް ( އާރްއައިޔޫ) އިންނެވެ.

އިނގިރޭސިވިލާތުގެ ލަންޑަނުގައި 2003 ވަނަ އަހަރު ވުޖޫދަށް އައި އާރްއައިޔޫ ކުންފުންޏަކީ ކުރިއަރާފައިވާ ގައުމުތަކުގެ އިތުރުން ކުރި އަރަމުންދާ ގައުމުތަަކުގެ އިގްތިސާދީ އަދި އިޖްތިމާއި ގޮތުން ދިމާވެފައިވާ ކަންތައްތައް ދިރާސާކުރާ ކުންފުންޏެކެވެ. އާރްއައިޔޫގެ މި ސަރަހައްދުގެ އޮފީސް ލަންކާގައި ހުންނައިރު އެ ކުންފުނީގެ ގޮތްޕެއް ރާއްޖޭގައިވެސް ގާއިމްކޮށްފައިވެއެވެ. 

އާރްއައިޔޫ އިން ބުނީ، މާލޭގައި ބާއްވާ އެކުންފުނީގެ 2019 ވަނަ އަހަރުގެ އިންވެސްޓްމެންޓް ފޯރަމްގެ މައިގަނޑު ބޭނުމަކީ ސްރީލަންކާގެ ވިޔަފާރިތައް ރާއްޖެއާއި ގުޅުވާލުމާއި ވިޔަފާރީގެ ދާއިރާއިން ލަންކާގައި ހުރި ފުރުސަތުތަކުގެ މައުލޫމަތު ފޯރުކޮށްދިނުން ކަމަށެެވެ. 

ލަންކާގެ ވިޔަފާރި ތަކުގެ މައުލޫމާތު ދިނުމަށް މާލޭގައި ފުޅާދާއިރާއެއްގައި ވިޔަފާރި ކުރަމުންދާ ސްރީލަންކާގެ ޖޯން ކިލްސް ހޯލްޑިންސް، ޑިވެލޮޕާސް ބާއީ ސަންކެންގެ އިތުރުން ޕްރައިމް ގްރޫޕްގެ އިސްވެރިން މި ސެމިނާގައި ބައިވެރިވެވަޑައިގަންނަވާނެ ކަމަށް އެކުންފުނިން ބުންޏެވެ.  

ޕެނަލް ޑިސްކަޝަންއާކާއި ޕްރެޒެންޓޭޝަންތަކާއި އެކު ކުރިޔަށް ގެންދިޔުމަށް ހަމަޖެހިފައިވާ މި ސެމިނާގައި ސްރީލަންގެ ރިއަލް އިސްޓޭޓްގެ ދާއިރާއިން ދިވެހިންނަށް ހުރި ފުރުސަތުތައް ހިމެނޭ ކަމަށެވެ. ހާއްސަކޮށް އަލިއަޅުވައިލާނީ ދިވެހިން އެންމެ ގިނައިން ދިރިއުޅޭ ކްލަމްބޯގެ ރިއަލް ސްޓޭޭޓް މާކެޓަށް ކަމަށެެވެ. އަދި މީގެ އިތުރުން ދިވެހިންނަށް އެ ފުރުސަތުތައް ހޯދައިދިނުމަށް މަގުފަހި ކޮށްދެވޭނެ ކަމަށްވެސް އާރްއައިޔޫ އިން މައުލޫމާތުދެއެވެ. 

ސެމިނާގައި ބައިވެރިވާން ޝައުގުވެރިކަން ހުރި ފަރާތްތަކުން މެއިލްގެ ޒަރިއްޔާއިން އެންގުމުން ސެމިނާއަށް ވަނުމަށް ހިލޭ ފާހެއް ލިބޭނެއެވެ. 

އާރްއައިޔޫ އަކީ ވޭތުވެދިޔަ 15 އަހަރުގައި ރިސާޗް އަދީ ކޮންސަލްޓޭޝަންގެ ދާއިރާއިގައި އެންމެ މަތީ ފެންވަރުގެ ހިދުމަތް ފޯރުކޮށްދީފައިވާ ކުންފުންޏެެކެވެ. އެ ކުުންފުނިން ހިދުމަތް  ފޯރުކޮށްދީފައިވާ ދާއިރާތަކުގެ ތެރޭގައި، ރިއެލް އެސްޓޭޓް، ޓޫރިޒަމް، ހެލްތްގެ އިތުުރުން އިސްލާމިކް ފައިނޭންސް ހިމެނެއެވެ. 

އެކުންފުނިން ވަނީ މާލެ އަދި ހުޅުމާލޭގެ ރިއަލް ސްޓޭޓް ލެންޑްސްކޭޕް ރިޕޯޓެއް 2015 ވަނަ އަހަރު ތައްޔާރުކޮށްފައެވެ.