ޗައިނާއިން ގެންގުޅޭ ވިޔަފާރީގެ ސިޔާސަތުތަކާއި ދެކޮޅަށް ދުނިޔޭގެ ބާރުތަކުން ތެދުވެއްޖެއެވެ.
އާޖެންޓީނާގެ ވެރިރަށް ބޮއިނަސް އައިރިސްގައި މިހާރު ކުރިއަށްދާ ދުނިޔޭގެ ވިޔަފާރި ޖަމްއިއްޔާ، ޑަބްލިޔު.ޓީ.އޯގެ މިނިސްޓީރިއަލް ކޮންފަރެންސްގައި އެމެރިކާ، ވިލާތުގެ އިއްތިހާދު އަދި ޖަޕާނުން ނެރުނު ގުޅިފައިވާ ބަޔާނުގައި ޗައިނާގެ ނަން ސީދާ ބޭނުން ނުކުރިނަމަވެސް، ސަރުކާރުން ސަބްސިޑައިޒްކޮށްގެން ޤައުމުތަކުން ކުންފުނިތައް ހިންގުމާއި، ކުންފުނިތަކަށް މަޖުބޫރުކޮށްގެން ޓެކްނޮލޮޖީތައް ޓްރާންސްފަރކުރުން ހުއްޓުވުމަށް މަސައްކަތްކުރާނެކަމަށް ބުނެފައިވެއެވެ. ޗައިނާގެ ނަން ބޭނުން ނުކުރިނަމަވެސް، މި ބައްދަލުވުމުގައި ޗައިނާއާއި ދެކޮޅަށް މިފަދަ ފިޔަވަޅެއް އަޅާނެކަން މީގެ ކުރިންވެސްވަނީ އެނގިފައެވެ.
ޗައިނާގެ ބޮޑެތި ކުންފުނިތަކަކީ އެޤައުމުގެ ސަރުކާރުން ވަރަށް ބޮޑަށް ސަބްސިޑައިޒްކުރާ ކުންފުނިތަކެކެވެ. އެހެންކަމުން ސިނާޢީ މަސައްކަތްތަކުގައި ކުރިއަރާފައިވާ ޤައުމުތަކުގެ އިޤްތިޞާދަށް ޗައިނާގެ މިސިޔާސަތުގެ ސަބަބުން ވަރަށް ބޮޑަށް އަސަރުކުރެއެވެ.
އެމެރިކާ، އީޔޫ އަދި ޖަޕާނުގެ ގުޅިފައިވާ ބަޔާނުގައިވަނީ ޤައުމުތަކުގެ މިފަދަ ސިޔާސަތުތަކުގެ ސަބަބުން ބައިނަލްއަޤްވާމީ ވިޔަފާރިއާއި، ދުނިޔޭގެ އިޤްތިޞާދުގެ ދެމެހެއްޓެނިވި ކުރިއެރުމަށް އެކަމުގެ ނޭދެވޭ އަސަރުކުރާކަމަށެވެ.
ވިލާތުގެ އިއްތިޙާދުގެ ޓްރޭޑް ކޮމިޝަނަރ ސިސީލިއާ މެލްމްސްޓްރޮމް ވިދާޅުވީ ޗައިނާއިން އެޤައުމުގެ އެލުމިނިއަމް އަދި އެކަތަ އުފައްދާ ކުންފުނިތައް ސަބްސިޑައިޒްކުރުމުގެ ސަބަބުން، ޔޫރަޕްގެ ކުންފުނިތަކަށް ވަރަށް ބޮޑަށް ގެއްލުންވެއެވެ. މީގެ އިތުރުން ބައެއް ޤައުމުތަކުން ވިޔަފާރީގައި ދެފުށް ފެންނަ ސިޔާސަތެއް ނުގެންގުޅޭ މައްސަލައިގައި ކޮންފަރެންސް ހުޅުވުމުގެ ރަސްމިއްޔާތުގައި އެމެރިކާއާއި ޖަޕާނުން ވަނީ ފާޑުކިޔާފައެވެ. އެދެޤައުމުންވެސް ބަހުގެ ޙަމަލާތައް އަމާޒުކޮށްފައިވަނީ ޗައިނާއަށެވެ.
މީގެ އިތުރުން ބައެއް ސިނާޢަތްތަކުގައި ޗައިނާގެ އުފެއްދުންތެރިކަން ހިފެހެއްޓުމެއް ނެތި މަތިވަމުން ދިޔުމުގެ ސަބަބުން ބައެއް ތަކެތީގެ އަގު ބައިނަލްއަޤްވާމީ ބާޒާރުގައި ވަނީ ވަރަށް ބޮޑަށް ވެއްޓިފައެވެ. އަދި އެކަމުގެ ސަބަބުން ކުންފުނިތައް ބަނގުރޫޓުވެ، އެތައް ހާސް ބައެއްގެ ވަޒީފާ ގެއްލެމުންދާކަމަށް ބުނެ، ވިލާތުގެ އިއްތިޙާދާއި އެމެރިކާ އަދި ޖަޕާނުންވަނީ ކަންބޮޑުވުން ފާޅުކޮށްފައެވެ.
ޗައިނާގެ ވިޔަފާރީގެ ސިޔާސަތުތަކަށް ދުނިޔޭގެ ބޮޑެތި ބާރުތަކުން ފާޑުކިޔަމުންދާއިރު، ޗައިނާއިން ގެންދަނީ އެޤައުމުގެ ބެލްޓް އެންޑް ރޯޑް އިނީޝިއޭޓިވްގައި ބައިވެރިވާ ޤައުމުތަކުގެ އިޤްތިޞާދުގެ ކޮންޓްރޯލް ނަގަމުންނެވެ. އަދި މިކަމުގެ ސަބަބުން ދުނިޔޭގެ އިޤްތިޞާދަށް އެކަމުގެ ނޭދެވޭ އަސަރުކުރާނެކަމަށް ބައިނަލްއަޤްވާމީ އިދާރާތަކުން ދަނީ ބުނަމުންނެވެ.
