އެމްއެމްޕީއާރުސީގެ ފައިސާ ރައީސް އިބްރާހީމް މުހައްމަދު ސޯލިހް ވެސް ނެންގެވި ކަމަށް ވިދާޅުވެ ކުރެއްވި ތުހުމަތުތަކާ ގުޅިގެން ކެލާ ދާއިރާގެ މެމްބަރު އަލީ އާރިފް ހާޒިރުކޮށް އެންޓި ކޮރަޕްޝަން ކޮމިޝަން (އޭސީސީ) އިން ސުވާލުކޮށްފިއެވެ.

އާރިފްގެ އިތުރުން އޭސީސީން ވަނީ ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ ވެސް ހާޒިރުކުރިކަން ޔަގީންކޮށްދީފައެވެ.

މައުލޫމާތު ލިބޭ ގޮތުގައި އަލީ އާރިފް އޭސީސީއަށް ހާޒިރު ކުރީ އެމްއެމްޕީއާރުސީގެ ޚިޔާނާތުގެ ފައިސާ ރައީސް އިބްރާހިމް މުހައްމަދު ސޯލިހަށް ލިބިވަޑައިގަތް ކަމަށް ވިދާޅުވުމާ ގުޅިގެންނެވެ.

މާފުށީ ޖަލުގައި ހުންނެވި ކުރީގެ ރައީސް އަބްދުﷲ ޔާމީން އައިޖީއެމްއެޗްގައި އެޑްމިޓްކުރުމާ ގުޅިގެން އެތަނަށް އެއްވި މީހުންގެ ތެރޭގައި ހުންނަވައި އަލީ އާރިފް ވިދާޅުވެފައި ވަނީ ރައީސް ސޯލިހު "32 މިލިއަން" ނެންގެވި ކަން އޭނާ އަށް އެނގިވަޑައިގަންނަވާ ކަމަށެވެ.

"އެނގޭތީ މި ބުނަނީ ބައްތިރީސް މިލިއަން ނެގިއޭ އިބޫ، ދެން އެންމެ ގިނަ ލާރި ނެގީ (ފޮރިން މިނިސްޓަރު) އަބްދުﷲ ޝާހިދު" އަލީ އާރިފު އެ ދުވަހު ވިދާޅުވިއެވެ. 

ކޮންގްރެސް ކޯލިޝަނުން ބޭއްވި ނޫސްވެރިންގެ ބައްދަލުވުމެއްގައި އަބްދުއްރަހީމް ވިދާޅުވީ އެމްޑީޕީގެ މެމްބަރުންގެ ތެރެއިން، ފައިސާ ލިބުނު މީހުންގެ ލިސްޓް އޭނާ އަށް އެނގިވަޑައިގަންނަވާ ކަމަށެވެ. އެމްއެމްޕީއާރުސީގެ ފައިސާ މި ސަރުކާރުގެ އިސްވެރިންނާއި އެމްޑީޕީގެ މެމްބަރުން ނެގި ކަމުގެ ތުހުމަތު ވެސް އޭނާ ވަނީ ކުރައްވާފައެވެ.

އެމްއެމްޕީއާރްސީގެ ފައިސާ 155 މީހެއްގެ އެކައުންޓަށް ވަނީ ވަދެފަައެވެ. އޭސީސީ އިން ހާމަކޮށްފައި ވަނީ އެމްއެމްޕީއާރުސީ އަށް ވަންނަން ޖެހޭ ފައިސާ އެސްއޯއެފަށް ޖަމާކޮށް، ޓްރާންސްފާކޮށްފައިވާ ފަރާތްތަކުގެ މައުލޫމާތު އެކަންޏެވެ. ނަގުދު ފައިސާ އަށް ވީ ގޮތެއް އޭސީސީގެ ރިޕޯޓުގައި ނެތެވެ. އެ ރިޕޯޓާ ގުޅިގެން ސަރުކާރުން ވަނީ މި ސަރުކާރުގައި ތިބި ބައެއް ފަރާތްތަކާ ދެކޮޅަށް ފިޔަވަޅު އަޅާފައެވެ.