ނައިޖީރިއާގެ ރައީސް މުހައްމަދު ބުހާރީ ހަތަރު އަހަރުގެ ދެވަނަ ދައުރަކަށް ހޮވިވަޑައިގެންފި ކަމަށް އެގައުމުގެ އިލެކްޝަންސް ކޮމިޝަނުން ބުނެފިއެވެ.

އުމުރުފުޅުން 76 އަހަރުފުޅުގެ ބުޚާރީއާ ވާދަކުރެއްްވި ކުރީގެ ނައިބް ރައީސް އަތިކު އަކުބަރު ބަލިކުރައްވާފައި ވަނީ ހަތަރު މިލިއަން ވޯޓުގެ ބޮޑު ތަފާތަކުންނެވެ.

އަބޫބަކުރުގެ ޕީޕަލްސް ޑިމޮކްރެޓިކް ޕާޓީ (ޕީޑީޕީ) އިން ވަނީ ނަތީޖާ ގަބޫލުނުކުރާ ކަމަށް ބުނެފައެވެ. ވޯޓުގައި ބައިވެރިވި މީހުންގެ ނިސްބަތަކީ 35.6 އިންސައްތައެވެ.

ހޮނިހިރު ދުވަހު ނެގި ވޯޓަށް އިންތިޚާބު ފަސްކުރުމާއި ހަމަނުޖެހުންތަކުގެ ސަބަބުން ދަތިތަކާ ކުރިމަތިވެފައި ވިޔަސް އިންތިޚާބުގައި މަކަރާ ހީލަތް ހަދާފައިވާ ކަމަކަށް މިނިވަން އެއްވެސް އޮބްޒަރވަރަކު ބުނެފައެއް ނުވެއެވެ.

އިލެކްޓޯރަލް ކޮމިޝަނުގެ ނަތީޖާއަށް ބަލާއިރު 36 ސްޓޭޓްގެ ތެރެއިން 19 ސްޓޭޓަކުން ބުހާރީގެ އޯލް ޕްރޮގްރެސިވް ކޮންގްރެސް(އޭޕީސީ) ކާމިޔާބުކޮށްފައިވާއިރު ޕީޑީޕީންވަނީ ވެރިރަށް އަބޫޖާ ހިމެނޭ ގޮތުން 17 ސްޓޭޓެއްގައި ކާމިޔާބު ހޯދާފައެވެ.

ކުރިން ސިފައިންގެ ތެރޭގައި މަސައްކަތްކުރައްވާފައިވާ ބުހާރީ ވަނީ 1980ގައި 20 މަސްދުވަސް ވަންދެން އަސްކަރީ ވެރިއެއްގެ ގޮތުގައި ގައުމު ހިންގަވާފައެވެ. ބުޚާރީ ފުރަތަ ދައުރަކަށް އިންތިޚާބުވެވަޑައިގެންފައިވަނީ 2015 ވަނަ އަހަރުއެވެ. ބުޚާރީވަނީ އެ ގައުމުގައި ރައީސްކަމުގައި ހުންނެވި ބޭފުޅެއްގެ މައްޗަށް ކުރިހޯއްދަވައި އިންތިޚާބު  ކާމިޔާބު ކުރެއްވި ފުރަތަމަ އިދިކޮޅު ކެނޑިޑޭޓަށެވެ.