އިންޑޮނޭޝިއާގެ މައިނެއްގެ ބިންގަނޑު ކަނޑައިގެން ގޮސް ބަޔަކު ވަޅުލެވިއްޖެ
މިހާތަނަށް 13 މީހަކު ސަލާމަތްކޮށްފައިވާ އިރު، އިތުރު މީހުން ސަލާމަތްކުރުމަށް ދަނީ މަސައްކަތް ކުރަމުން
މައިން ތެރޭގައި ތާށިވެފައިވާ މީހުން ސަލާމަތް ކުރުމުގެ މަސައްކަތް ކުރަނީ
ހުއްދަ ނުނަގާ ހިންގާ އިންޑޮނޭޝިއާގެ މައިނެއްގެ ބިންގަނޑު ކަނޑައިގެން ދިޔުމާއި ގުޅިގެން އެކަކު މަރުވެ، 60އަށް ވުރެ ގިނަ މީހުން މައިން ތެރޭގައި ތާށިވެއްޖެއެވެ.
ސުލަވޭސީ ޕްރޮވިންސްގައި ހިނގި ހާދިސާގައި މިހާތަނަށް 13 މީހަކު ސަލާމަތް ކޮށްފައިވާ އިރު، މީހުން ސަލާމަތް ކުރުމުގައި މަސައްކަތް ކުރާ ފަރާތްތަކުން ދަނީ ތާށިވެފައިވާ މީހުން ސަލާމަތް ކުރުމަށް ކެނޑިނޭޅި މަސައްކަތް ކުރަމުން ކަމަށް އެ ގައުމުގެ ޑިޒާސްޓަރ އެޖެންސީއިން ވަނީ ބުނެފައެވެ.
މައިން ހިންގާ ސަރަހައްދުގެ ބިންގަނޑު ކަނޑައިގެން ދާން މެދުވެރިވީ، އެއްވެސް ބެލުމެއް ނެތި ޝާފްޓްތައް ހެދުމާއި މައިން ތެރޭގައި ޖަހާފައި ހުރި ސަޕޯޓިންގ ބީމްތަކާއި ބޯޑުތައް ބިންދައިގެން ދިޔުމާއި ގުޅިގެން ކަމަށް ޑިޒާސްޓަރ އެޖެންސީގެ ތަރުޖަމާނު ސުޓޮޕޯ ޕުރްވޯ ވިދާޅުވިއެވެ.
އިންޑޮނޭޝިއާގެ މަރުކަޒީ ސަރުކާރުން މިފަދަ މައިންތައް ހިންގުން މަނާ ކޮށްފައިވީ ނަމަވެސް، ސަރަހައްދީ ސަރުކާރުތަކުން މިކަމަށް އަޅާނުލުމުގެ ސަބަބުން މިކަހަލަ ހާދިސާތައް އިންޑޮނޭޝިއާގައި ވަނީ ގިނަވެފައެވެ. އެ ގައުމުގައި ހިންގާ މިކަހަލަ މައިންތަކުގެ ސަބަބުން އެތައް ބަޔަކު މަރުވެފައިވާ އިރު، އެ ތަންތަނުގައި މަސައްކަތް ކުރާ މީހުންނަށް ވިހަ މާއްދާތަކުގެ އަސަރުކުރުމުގެ މައްސަލަ ވެސް ވަނީ ބޮޑުވެފައެވެ.
