ބިންގަނޑު ކަނޑައިގެން ގޮސް ބަނގްލަދޭޝްގައި 134 މީހުން މަރުވެއްޖެ
14 ޖޫން 2017 | ބުދަ 00:40އިތުރު 30 މީހުންނަށް ދަނީ ފަރުވާ ދެމުން
ބަނގްލަދޭޝްގައި ބިންގަނޑު ކަނޑައިގެން ދިއުމުން ގެއްލުނު މީހުން ހޯދަނީ
ވާރޭ ވެހި ބިންގަނޑު ކަނޑައިގެން ދިއުމުގެ ހާދިސާއެއްގައި ބަނގުލަދޭޝްގައި 134 މީހުން މަރުވެއްޖެއެވެ. ހާދިސާ ހިނގާފައި ވަނީ ބަނގުލަދޭޝްގެ ހުޅަނގު ދެކުނު ސަރަހައްދެއްގައެވެ. މިހާދިސާގައި މިހާތަނަށް 134 މީހުން މަރުވެފައިވާއިރު އިތުރު 30 މީހުންނަށްދަނީ ފަރުވާ ދެމުންނެވެ. އިންޑިއާގެ ބޯޑަރާ ކައިރި ރަންގަމަތީ ޑިސްޓްރިކްޓްގެ ބިންގަނޑު ކަނޑައިގެން ދިޔަ ސަރަހައްދަކީ ފަރުބަދަމަތީ ސަރަހައްދެކެވެ. މޫސުމް ގޯސްވެ އަދިވެސް ވިއްސާރަ ކުރަމުންދާތީ އިތުރު ސަރަހައްދުތަކުން ބިންގަނޑު ކަނޑައިގެން ދިއުމުގެ ހާދިސާތައް ކުރިމަތިވެދާނެ ކަމަށް ކަމާބެހޭ އިދާރާތަކުން ބުނެއެވެ. މި ސަރަހައްދަކީ ތޫނަފުތަކާއި ވިއްސާރާގައި ބިންގަނޑު ކަނޑައިގެން ދިއުން އާއްމު ސަރަހައްދެކެވެ. މީގެ ހަފްތާއެއްކުރިންވެސް މި ސަރަހައްދަށް ތޫފާނެއްގެ އަސަރުކޮށްފައިވާ ކަމަށް ރިޕޯޓްތައް ބުނެއެވެ.
