ސްރީލަންގައި ފެންބޮޑުވުމާއި އަދި ބިންގަނޑު ކަނޑައިގެން ދިޔުމުގެ ހާދިސާތަކުގައި 100 މަރު
27 މެއި 2017 | ހޮނިހިރު 15:08ކުރިއަށް ހުރި ދުވަސްތަކުގައި ވެސް ސްރީލަންކާ އަށް ބޯކޮށް ވާރޭ ވެހޭނެ ކަމަށް ބެލެވޭ
އާންމުންގެ ބަޔަކު ހާލުގައި ޖެހިފައިވާ މީހަކަށް އެހީ ވަނީ
ސްރީ ލަންކާ އަށް ބޯކޮށް ވާރޭވެހި ފެންބޮޑުވުމާއި އަދި ބިންގަނޑު ކަނޑައިގެން ދިޔުމުގެ ސަބަބުން މަދުވެގެން 100 މީހުން މަރުވެ 99 އަށް ވުރެ ގިނަ މީހުން ގެއްލިފައިވާ ކަމަށް ރިޕޯޓުތައް ބުނެފިއެވެ.
މޫސުމީ ވިއްސާރައިގެ ސަބަބުން ސްރީ ލަންކާގެ އެތައް ބަޔަކު ގެދޮރު ދޫކޮށްދާން ޖެހިފައިވާއިރު، އެ ގައުމުގެ އަސްކަރިއްޔާ އިން ދަނީ ބޯޓުތަކުގައާއި އަދި ހެލިކޮޕްޓަރުތަކުގައި މީހުން ސަލާމަތް ކުރުމުގެ ބޮޑު އޮޕަރޭޝަން ހިންގަމުންނެވެ.
ސްރީ ލަންކާގެ ދެކުނު އައްސޭރިފަށުގެ ކަލުޓަރާ ޑިސްޓްރިކްޓް އަކީ އެންމެ ބޮޑަށް ގެއްލުންވި ޑިސްޓްރިކްޓް ކަމަށްވާއިރު، ސްރީ ލަންކާގެ ފުލުހުންގެ ތަރުޖަމާނު ޕްރިއަންތާ ޖަޔަކޮޑީ ވިދާޅުވީ ކަލުޓަރާ ގައި މަދުވެގެން، ބިންގަނޑު ކަނޑައިގެން ދިޔުމުގެ ފަސް ހާދިސާއެއް ރިޕޯޓުކޮށްފައިވާ ކަމަށެވެ.
ލަންކާގެ އަސްކަރިއްޔާ އިން ބުނެފައި ވަނީ 400 ސިފައިން ބޯޓުތަކުގަޔާއި އަދި ހެލިކޮޕްޓަރު ތަކުގައި ރެސްކިއު އޮޕަރޭޝަނުގައި ހަަރަކާތްތެރިވާ ކަމަށެވެ.
އޮފިޝަލުން ބުނީ ބުރާސްފަތި ދުވަހު ސްރީ ލަންކާ އަށް ކުރި ވިއްސާރަ އަކީ 2003 އިން ފެށިގެން ކުރި އެންމެ ބޯ ވިއްސާރަ ކަމަށެވެ.
ވިއްސާރައިގެ ސަބަބުން 200،382 މީހުންނަށް އޭގެ އަސަރުކޮށްފައިވާ ކަމަށް ރިޕޯޓުތައް ބުނެއެވެ.
