ކަޝްމީރުގައި ބަދަލުކުރެވުނު ހަމަލާތަކުގައި ފަސް މީހަކު މަރުވެއްޖެ

އިންޑިއާގެ ބެލުމުގެ ދަށުގައި އޮތް ކަޝްމީރުގައި، އެ ގައުމުގެ ސިފައިންނާއި ހަނގުރާމަވެރިންނާ ދެމެދު ބަދަލުކުރެވުނު ހަމަލާތަކުގައި އިންޑިއާ ސިފައިންގެ ދެ މީހަކާއި ހަނގުރާމަވެރިންގެ ތިން މީހަކު މަރުވެއްޖެއެވެ.

ހަމަނުޖެހުން ބޮޑު ކުލްގަމް ޑިސްޓްރިކްޓްގައި އިންޑިއާ ސިފައިން ހިންގި އޮޕަރޭޝަނެއްގައި، ހަމަލާދީ މަރާލާފައި ވަނީ ޕެރަމިލިޓަރީ ސިފައިންނަށް ދިން ހަމަލާގެ ޒިންމާ އުފުލި ޖައޭޝް-އީ-މުހައްމަދް ޖަމާއަތުގެ މެމްބަރުން ކަމަށް އެ ސްޓޭޓްގެ ޕޮލިސް ޗީފް ދިލްބާގް ސިންގް ވަނީ ވިދާޅުވެފައެވެ. މީގެ ތެރެއިން ދެ މީހުންނަކީ އެހެން ގައުމުތަކަށް ނިސްބަތްވާ ހަނގުރާމަވެރިން ކަމަށް ވެސް އޭނާ ވިދާޅުވިއެވެ.

މި ހަމަލާތައް ބަދަލުކުރެވުނު ގަޑީގައި އެ ސަރަހައްދަށް އެއްވި އާއްމުންނާ ދެމެދު ހިނގި ކުރިމަތިލުންތަކުގައި، އަށް މީހަކަށް އެކިވަރުގެ އަނިޔާ ލިބިފައިވާ ކަމަށް ވެސް އެ ސަރހައްދުގައި ހަރަކާތްތެރިވާ ހެލްތު އޮފިޝަލުންތަކައް ވަނީ ބުނެފައެވެ.

ޖައޭޝް-އީ-މުހައްމަދު ޖަމާއަތުގެ މެމްބަރަކު ފެބްރުއަރީ 14 ވަނަ ދުވަހު އިންޑިއާ ސިފައިންގެ ގާފިލާއަކަށް ދިން ހަމަލާގައި އެ ގައުމުގެ ޕެރަމިލިޓަރީ ސިފައިންގެ 42 މީހަކު ވަނީ މަރުވެފައެވެ. މި ހަމަލާއާ ގުޅިގެން އިންޑީއާ އާއި ޕާކިސްތާނާ ދެމެދު ބަހުގެ ހޫނު ހަމަލާތަކެއް ބަދަލުކޮށްފައިވާ އިރު، އިންޑިއާ އިން ވަނީ ޕާކިސްތާނަށް ވަރުގަދަ ރައްދެއް ދޭނެ ކަމަށް ބުނެފައެވެ. އިންޑިއާ އިން ހަމަލާދީފި ހާލަތެއްގައި، އެކަމަށް އެކަށީގެންވާ ވަރުގެ ރައްދެއް ދޭނެ ކަމަށް ޕާކިސްތާނުން ވަނީ ބުނެފައެވެ.

އިންޑިއާ އިން ކަޝްމީރުގެ މައްސަލައިގައި ޕާކިސްތާނާ އެކު ގުޅުން ގޯސްވެފައި އޮންނަތާ 60 އަހަރަށް ވުރެ ގިނަ ދުވަސް ވާން ކައިރިވެފައިވާ އިރު، ޕުލްވަމާގައި ދެވުނު ބޮމުގެ ހަމަލާ އެއީ ފަހުގެ ތާރީހެއްގައި ވެސް ދިން އެއްމެ ނުރައްކާތެރި ހަމަލާއެވެ. އިންޑިއާ އިން ޕާކިސްތާނު ސަރުކާރުގެ ބައިވެރިވުން މި ކަމުގައި އޮތް ކަމަށް ބުނި ނަމަވެސް، ޕާކިސްތާނުން ވަނީ އެ ވާހަކަތައް ދޮގުކޮށް، އިންޑިޔާ އަށް އެކަމުގެ ހެކި ދައްކަން ގޮވާލާފައެވެ.