ރައްޔިތުންގެ މަޖިލިސް ކުރާ ގޭގައި ކުރިއަށް ގެންދާ މަރާމާތުގެ މަސައްކަތްތައް ރައީސުލްޖުމްހޫރިއްޔާ އިބްރާހީމް ސޯލިހް ބައްލަވާލައްވައިފިއެވެ.

އާދިއްތަ ދުވަހުގެ ރޭ މަޖިލިސް ކުރާ ގެއަށް ޒިޔާރަތް ކުރެއްވުމާއި ގުޅިގެން އެމަނިކުފާނަށް މަރުހަބާ ދެންނެވީ މަޖިލީހުގެ ރައީސް ޤާސިމް އިބްރާހިމާއި މަޖިލިސް ނައިބު ރައީސް މޫސާ މަނިކުގެ އިތުރުން އެ އިދާރާގެ ބައެއް އިސް މުވައްޒަފުންނެވެ.

ރައްޔިތުންގެ މަޖިލިސް އިދާރާގެ ބޭރު ފާރު އުސްކުރުމުގެ މަސައްކަތް ފަށާފައިވަނީ މީގެ އެއް މަސް ކުރިންނެވެ. ރާއްޖެ އެމްވީއަށް އެނގިފައިވާ ގޮތުގައި މި މަސައްކަތް ހަވާލުކޮށްފައި ވަނީ ސިފައިންގެ ކުންފުނި، ސިވެކްއާއެވެ.

ރައީސް އަބްދުﷲ ޔާމީންގެ ސަރުކާރުން ސިފައިންނާއި ފުލުހުން ބޭނުންކޮށްގެން މަޖިލިސް ހިސޯރުކޮށްފައި އޮތް ދުވަސްވަރު އަދި މަޖިލީހުގެ 12 މެމްބަރެއްގެ ގޮނޑި ގެއްލިފައިވާ ކަމަށް ކަނޑައަޅާފައި އޮތް ދުވަސްވަރު، ބައެއް މެމްބަރުން ފާރުމަތިން ފުންމާލައިގެން މަޖިލީހަށް ވެންނެވުމަށް މަސައްކަތް ކުރެއްވެވި އެވެ. އެ ދުވަސްވަރު މަޖިލީޙުގެ ނައިބު ރައީސް މޫސަ މަނިކު ވިދާޅުވެފައި ވަނީ މަޖިލީހުގެ އިދާރާއަށް ވަރަށް ގިނަ ބަދަލުތަކެއް ގެންނަން ނިންމާފައިވާ ކަމަށާއި އެގޮތުން މަޖިލީހުގެ ބޭރު ވަށާފާރު ވެސް ވަރަށް އަވަހަށް އުސް ކުރާނެ ކަމަށެވެ.

މަޖިލީހުގެ ވަށައިފާރު އުސްކުރަން ހޭދަވާ ފައިސާގެ އަދަދެއް އަދި ނޭނގެ އެވެ.