އަފްޣާނިސްތާނުގައި މިދިޔަ އަހަރު ރެކޯޑް މިންވަރަކަށް އާއްމުން މަރުވި

ރެކޯޑްތައް ބަލަހައްޓަން ފެށިފަހުން އަފްޣާނިސްތާނުގައި އެންމެ ގިނަ އަދަދަކަށް އާއްމުން މަރުވެފައިވަނީ މިދިޔަ އަހަރު ކަމަށް އދގެ ރިޕޯޓެއްްގައި ބުނެފިއެވެ.

ދިގުދެމިގެން ގޮސްފައިވާ ހަނގުރާމަ ފެށި ފަހުން 2018 ވަނަ އަހަރު އެ ގައުމުގައި 3،804 މީހުން މަރުވެފައިވެއެވެ. އޭގެ ތެރޭގައި 927 ކުޑަކުދިން ހިމެނޭއިރު އެއީ ރެކޯޑް އަދަދެކެވެ.

އަފްޣާނިސްތާން ހަނގުރާމަ ފެށުނީ 2001 ވަނަ އަހަރު ދިން 9/11 ގެ ހަމަލާއަށް ފަހު އެމެރިކާއިން އިސްވެ ތާލިބާނުން ނައްތާލުމަށް ފެށި ހަނގުރާމައިގެ ތެރެއިންނެވެ.

އދ. ގެ މި ރިޕޯޓް އާއްމުކޮށްފައި މިވަނީ އަފްޣާނިސްތާނުގެ ހަމަނުޖެހުން ނިމުމަކަށް ގެނައުމަށް ބާއްވަމުންދާ މަޝްވަރާތަކުގެ ދެވަނަ ބުރު ބޭއްވުމުގެ އެއްދުވަސް ކުރިންނެވެ.

އެމެރިކާގެ ޚާއްސަ މަންދޫބު ޒަލްމޭ ޚަލިލްޒާޑް ތާލިބާނުންގެ ވަފުދާ ހޯމަ ދުވަހު ޤަތަރުގައި ބައްދަލުކުރައްވާނެއެވެ.

މިދިޔަ 2018 ވަނަ އަހަރުވަނީ އާއްމުންނަށް އަމާޒުކޮށްގެންނާ ސަރުކާރާ ދެކޮޅަށް ދެވުނު ޖާނުންފިދާވުމުގެ ހަމަލާތައް އިތުރުވެފަކަމަށް ރިޕޯޓްގައިވެއެވެ.

މީގެ އިތުރުން ޖާނުން ފިދާވުމުގެ ހަމަލާތަކާއި ވައިގެ މަގުން ދެވުނު ހަމަލާކުގައި އެންމެ ގިނަ އަދަަދެއްގެ އާއްމުން ޒަޚަމްވެފައިވާކަމަށް ރެކޯޑްކުރެވިފައި ވަނީވެސް މިދިޔަ އަހަރެވެ. ވައިގެ މަގުން ދެވުނު ހަމަލާތަކުގައި ޢާއްމުންގެ 500 އަށްވުރެ ގިނަ މީހުން މަރުވެފައިވާއިރު މިއީ ވައިގެ މަގުން ދެވުނު ހަމަލާތަކުގައި އާއްމުން މަރުވި އަދަދު ރެކޯޑް ބެލެހެއްޓުނު ފުރަތަމަ ފަަހަރެވެ.

އާއްމުން އެންމެ ގިނައިން މަރުވެފައިވަނީ ސަރުކާރަށް ތާއީދުކުރާ ފައުޖުތަކާއި ސަރުކާރާ ދެކޮޅު ފައުޖުތަކުން އެއްގަމުމަގުން ބަދަލުކުރި ހަމަލާތަކެވެ.

މިއީ އަފްޣާނިސްތާނުގެ ހަނގުރާމައާ ބެހޭގޮތުން އދން ނެރުނު ދިހަވަނަ އަހަރީ ރިޕޯޓެވެ. އަފްޣާނިސްތާން ހަނގުރާމައިގައި ދިހަ އަހަރުގެ ތެރޭގައި 32،000 އަށްވުރެ ގިނަ އާއްމުން މަރުވެ 60،000 އެއްހާ މީހުން ޒަޚްމްވެފައިވެއެވެ.