ވެނެޒުއޭލާ އަސްކަރިއްޔާގެ ބަޔަކު ކޮލަމްބިއާގެ ހިމާޔަތަށް އެދިއްޖެ

ވެނެޒުއޭލާގެ ނެޝަނަލް ގާޑުގެ ސިފައިންތަކެއް، ކޮލަމްބިއާގެ ބޯޑަރު ކައިރީ އެ މީހުން ފޯރިމަރަމުން ދިޔަ ޕޯސްޓު ދޫކޮށް ދިޔުމަށް ފަހު، ކޮލަމްބިއާގެ ހިމާޔަތަށް އެދިއްޖެއެވެ.

ސިފައިން މިހެން ކަން ކޮށްފައި މި ވަނީ، ވެނެޒުއޭލާއަށް އެހީ ފޮނުވަން އުޅުމާއި ގުޅިގެން އެ ގައުމާއި އިން ވެގެން އޮންނަ ކޮލަމްބިއާގެ ބޯޑަރުގެ ބައެއް ސަރަހައްދުތައް ބަންދުކުރަން ރައީސް ނިކޮލަސް މަދޫރޯ އަމުރުކުރައްވާފައި ވަނިކޮށެވެ. ނަމަވެސް އިދިކޮޅު ލީޑަރު އަދި އެ ގައުމުގެ ރައީސްކަމަށް 50އަށް ވުރެ ގިނަ ގައުމުން ބަލައިގަނެފައިވާ، ހުއާން ގައިޑޯ ވަނީ ބޯޑަރު ބަންދު ކުރި ނަމަވެސް އެހީ އެ ގައުމަށް ވައްދައިދޭނެ ކަމަށް ވައުދުވެވަޑައިގަންފައެވެ.

ގައިޑޯގެ ވައުދުފުޅާއި އެއްގޮތަށް ބްރެޒިލް މަގުން ވެނެޒުއޭލާއަށް މިހާރު އެހީ ލިބިފައިވާ ކަމަށް އޭނާ ވަނީ ޓްވީޓްކުރައްވައިފަ އެވެ. ގައިޑޯ ވަނީ ވެނެޒުއެލާއަށް އެހީ ހޯދުމުގެ ގޮތުން އިނގިރޭސި ބިލިއަނަރު ރިޗަރޑް ބްރެންސަން ކޮލަމްބިއާގައި ބޭއްވި ކޮންސެޓަކަށް ވަޑައިގަންނަވާފައެވެ.

އެހީގެ މައްސަލައާއި ގުޅިގެން ވެނެޒުއޭލާގެ ދެ ލީޑަރުންގެ ދެމެދުގައި ވަރުގަދަ ބަހުގެ ހަމަލާތަކެއް ވަނީ ބަދަލުކުރައްވާފަ އެވެ. އަދި އެހީ ގައުމަށް އެތެރެ ވިޔަސް، އެހެން ގައުމެއްގެ ސިފައިންގެ މީހަކަށް އެ ގައުމަށް އަރަން ފުރުސަތު ނުދެއްވާނެ ކަމަށް މަދޫރޯގެ އަރިސް ބޭފުޅަކު ވަނީ ވިދާޅުވެފައެވެ.

ވެނެޒުއޭލާގެ މަޝްރަހު މިހާ ގޯސްވާން މެދުވެރިވީ މަދޫރޯ ދެވަނަ ދައުރަކަށް އިންތިހާބުވެ ވަޑައިގެން ހުވާ ކުރެއްވުމާއި ގުޅިގެންނެވެ. ގައިޑޯ ވަނީ އެ އިންތިހާބަކީ ބޮޑު އޮޅުވާލުމެއް ކަމަށް ބުނެ އޭގެ ދުވަސްކޮޅެއް ފަހުން އޭނާއަކީ އެ ގައުމުގެ ރައީސްކަމަށް އަމިއްލަފުޅަށް އިއުލާން ކުރައްވާފައެވެ.