ރެއާލް މެޑްރިޑަށް ކުޅެމުން އަންނަ ވޭލްސްގެ ކެޕްޓަން ގެރެތް ބޭލް ބޭނުންވަނީ އެ ކްލަބުގައި ރިޓަޔާކުރަން ކަމަށް އޭނާގެ އެޖެންޓް ޖޮނަތަން ބާނެޓް ބުނެފިއެވެ.

ސްޕެއިންގެ ނޫހެއް ކަމަށްވާ ފިޗަޖެސް އަށް ދިން އިންޓަވިއުއެއްގައި ބާނެޓް ބުނީ ބޭލް ބޭނުން ވަނީ އުމުރު ދުވަހު ރެއާލްގައި ހޭދަކުރަން ކަމަށެވެ.

ބޭލްއާ ބެހޭގޮތުން ތަފާތު ވާހަކަތަކެއް މީޑިއާގައި ފެތުރެވުމުންދާ ދަނޑިވަޅެއްގައި ބާނެޓް ބުނީ ބޭލް އެންމެ ލޯބިވާ ކްލަބަކީ ރެއާލް ކަމަށާއި، އޭނާ ބޭނުން ވަނީ އެ ކްލަބުގައި ރިޓަޔާކުރަން ކަމަށެވެ.

ބާނެޓް ވަނީ ސްޕެއިންގެ ނޫސްވެރިންނަށް ވަރަށް ބޮޑަށް ފާޑުކިޔާފައެވެ. އެގޮތުން އޭނާ ބުނީ ސްޕެއިންގެ ބައެއް ނޫސްވެރިންނަކީ ތާކުންތާކު ނުޖެހޭ ވާހަކަ ލިޔާ ބައެއް ކަމަށާއި، އެ މީހުން އެއްޗެހި ލިޔަނީ އެއްވެސް ވަރަކަށް ހަގީގަތް ބެލުމެއް ނެތި ކަމަށެވެ.

ދާދި ފަހުން ބޭލްއާ ބެހޭގޮތުން ރެއާލްގެ ކޯޗު ޒައިނުއްދީން ޒިދާން ބުނީ އޭނާގެ ފަރާތުން ވީހާވެސް އަވަހަށް 100 އިންސައްތަ ކުޅުން ބޭނުންވާ ކަމަށާއި، އެ ކުޅުން ފެންނާނެ ދުވަހަކަށް އިންތިޒާރުކުރަމުން އަންނަ ކަމަށެވެ.

ރެއާލްގައި ބޭލް މުހިންމު ދައުރެއް އަދާކުރަމުން އަންނައިރު އޭނާ ވަނީ އެ ޓީމާއެކު 10 ތަށި ކާމިޔާބުކޮށްފައެވެ. އަދި ރެއާލްއަށް ކުޅުނު 159 މެޗުގައި އޭނާވަނީ 70 ލަނޑު ޖަހާފައެވެ.