ބިލްބާއޯގައި ރިޓަޔާކުރަން ސަޅިވާނެ: ލޮރެންޓޭ

އެތުލެޓިކް ބިލްބާއޯގައި ރިޓަޔާކުރަން ސަޅިވާނެ ކަމަށް ޓޮޓެންހަމް ހޮޓްސްޕާއަށް ކުޅެމުން އަންނަ ފެނާންޑޯ ލޮރެންޓޭ ބުނެފިއެވެ.

މާސާއަށް ދިން އިންޓަވިއުއެއްގައި ލޮރެންޓޭ ބުނީ، ބިލްބާއޯއަށް އޭނާ ބަދަލުވާން އުޅޭ ކަމަށް ތަފާތު ވާހަކަތަކެއް ދެކެވެމުން އަންނަ ކަމަށެވެ.

ބިލްބާއޯއަށް ބަދަލުވުން ފަސޭހަނުވާނެ ކަމަށް ފާހަގަކުރަމުން ލޮރެންޓޭ ބުނީ، އެ ކްލަބުގައި ރިޓަޔާކުރުމަކީ "ސަޅިކަމެއް" ކަމަށެވެ. ނަމަވެސް ބިލްބާއޯއަށް ބަދަލުވާނެ ކަން އޭނާ ކަށަވަރެއް ނުކޮށްދެއެވެ.

މީގެ ކުރިން ޔުވެންޓަސް އާއި ސެވިއްޔާ އަދި ސްވަންސީ ސިޓީއަށް ކުޅެފައިވާ އުމުރުން 34 އަހަރުގެ ލޮރެންޓޭ އަންނަނީ ޓޮޓެންހަމްގައި މޮޅު ކުޅުމެއް ދައްކަމުންނެވެ. އޭނާ ވަނީ މި ސީޒަނުގައި މިހާތަނަށް ކުޅުނު 21 މެޗުގައި ހަތް ލަނޑު ކާމިޔާބުކޮށްފައެވެ.

މިވަގުތު ޓޮޓެންހަމްއަށް ކުޅެމުން އަންނަ ލޮރެންޓޭ ވަނީ މިހާތަނަށް އެޓީމަށް ކުޅުނު ޖުމްލަ 51 މެޗުގައި 12 ލަނޑު ކާމިޔާބުކޮށްފައެވެ.

ސެވިއްޔާ ދޫކޮށް 2017 ވަނަ އަހަރު ޓޮޓެންހަމްއަށް 12.1 މިލިއަން ޔޫރޯއަށް ބަދަލުވި ލޮރެންޓޭގެ އެއްބަސްވުން ހަމަވާނީ މިއަހަރުގެ އޯގަސްޓް މަހުވެ. އޭނާގެ އެއްބަސްވުން ޓޮޓެންހަމް އިން އާކުރާނެ ކަމަށް ނުބެލެވޭއިރު، އޭނާ ބަދަލުވާނީ ބިލްބާއޯއަށް ކަމަށް ރިޕޯޓްތައް ބުނެއެވެ.

ޔުވަންޓަސްއާ އެކު ތިން ލީގު ތަށި ކާމިޔާބުކޮށްފައިވާ ލޮރެންޓޭ ވަނީ އެ ކްލަބާއެކު ކޮޕާ އިޓަލިއާ އަދި ދެ އިޓާލިއަން ސުޕާކަޕްވެސް ކާމިޔާބުކޮށްފައެވެ. އަދި އޭނާ ވަނީ ސެވިއްޔާއާއެކު ޔޫރޮޕާ ލީގު ވެސް ކާމިޔާބުކޮށްފައެވެ.

ސްޕެއިން ގައުމީ ޓީމާއެކު 2010 ވަނަ އަހަރުގެ ވޯލްޑް ކަޕް އަދި 2012 ވަނަ އަހަރު ބޭއްވި ޔޫރޯ ކާމިޔާބުކޮށްފައިވާ ލޮރެންޓޭ ވަނީ ގައުމީ ޓީމަށް ކުޅުނު 24 މެޗުގައި ހަތް ލަނޑު ކާމިޔާބުކޮށްފައެވެ.