މި ސީޒަނަށްފަހު ޗެކް ކުޅުން ހުއްޓާލަނީ!

މި ސީޒަނަށްފަހު އާސެނަލްއަށް ކުޅެމުން އަންނަ ޗެކް ރިޕަބްލިކްގެ ކީޕަރު ޕީޓާ ޗެކް ކުޅުން ހުއްޓާލާނެކަން އިއުލާންކޮށްފިއެވެ.

އުމުރުން 36 އަހަރުގެ ޗެކް ކުޅުން ހުއްޓާލިކަން އިއުލާންކޮށް، ޓުވިޓާގައި ލިޔެފައިވާ ޕޯސްޓެއްގައި ބުނީ، މިއީ އޭނާ ފުޓުބޯޅަ ކުޅޭ 20 ވަނަ ސީޒަން ކަމަށާއި، ފުރަތަމަ ފަހަރަށް ކްލަބަކަށް ކުޅެން އެއްބަސްވުމެއް ހެދިތާ މިހާރު 20 އަހަރު ވެފައިވާ ކަމަށެވެ.

އެގޮތުން ޗެކް ބުނީ، މިއީ އޭނާ ކުޅުން ހުއްޓާލަން އެންމެ މުނާސަބު ވަގުތު ކަމަށާއި، މި ސީޒަނަށްފަހު ކުޅުން ހުއްޓާލާނެ ކަމަށެވެ.

ޕްރިމިއާ ލީގުގައި 15 އަހަރު ކުޅުނުކަން ފާހަގަކޮށް ޗެކް ބުނީ، އެ ލީގުގައި ކާމިޔާބުކުރެވެން އޮތް ހުރިހާ މުބާރާތެއް ކާމިޔާބުކުރެވިފައިވާ ކަމަށާއި، އަދި ކެރިޔަރުގައި ބޭނުންވި ހުރިހާ މުބާރާތެއްވެސް ކާމިޔާބުކުރެވިފައިވާ ކަމަށެވެ.

މީގެއިތުރުން ޗެކް ބުނީ، މި ސީޒަނުގައި އާސެނަލްއަށް ބުރަކޮށް މަސައްކަތް ކޮށްދޭނެ ކަމަށާއި، އަދި އާސެނަލްއާއެކު އިތުރު އެއް ތަށި ކާމިޔާބުކުރަން ބޭނުންވެފައި ހުރި ކަމަށެވެ.

ޗެލްސީއާއެކު 11 ސީޒަން ހޭދަކޮށްފައިވާ ޗެކް ވަނީ އެ ކްލަބަށް 494 މެޗު ކުޅެ، އެ ކްލަބާއެކު ހަތަރު ޕްރިމިއާ ލީގު، ހަތަރު އެފްއޭކަޕް، ތިން ލީގް ކަޕް، ދެ ކޮމިއުނިޓީ ޝިލްޑް، އެއް ޔުއެފާ ޗެމްޕިއަންސް ލީގު އަދި އެއް ޔޫރޮޕާ ލީގު ކާމިޔާބުކޮށްފައެވެ.

ޗެލްސީ ދޫކޮށް ޗެކް އާސެނަލްއަށް ބަދަލުވީ 2015 ވަނަ އަހަރެވެ. އޭނާ ވަނީ މިހާތަނަށް އެޓީމަށް 129 މެޗު ކުޅެ، އެފްއޭ ކަޕް އަދި ކޮމިއުނިޓީ ޝިލްޑް ދެފަހަރު ކާމިޔާބުކޮށްފައެވެ.

ޗެކް ރިޕަބްލިކްއަށް 124 މެޗު ކުޅެ، ގައުމީ ކެޕްޓަންކޮށްފައިވާ ޗެކް ވަނީ 2002 ވަނަ އަހަރު 21 އަހަރުން ދަށުގެ ޔޫރޯ ކާމިޔާބުކޮށްފައެވެ. އަދި އެ މުބާރާތުގެ އެންމެ މޮޅު ކުޅުންތެރިޔާގެ މަގާމުވެސް އޭނާ ވަނީ ހޯދާފައެވެ.

ޕްރިމިއާ ލީގުގެ ގޯލްޑެން ގްލޯވް ހަތަރު ފަހަރު ހޯދާފައިވާ ޗެކް ވަނީ ނުވަ ފަހަރު ޗެކް ރިޕަބްލިކްގެ މޮޅު ކުޅުންތެރިޔާގެ މަގާމު ހޯދާފައެވެ. އަދި ތިންފަހަރު ޔޫރަޕްގެ މޮޅު ގޯލް ކީޕަރުގެ މަގާމު ހޯދާފައިވާ ޗެކް ވަނީ ޗެލްސީގެ މޮޅު ކުޅުންތެރިޔާގެ މަގާމުވެސް އެއްފަހަރު ހޯދާފައެވެ.