އައިއެސްގެ އަތްދަށުގައި އެންމެ ފަހުން އޮތް ސަރަހައްދުން އާއްމުން ނެރެފި

އައިއެސްގެ އަތްދަށުގައި މިހާރު އޮތް ހަަމައެކަނި އަވަށުން އާއްމުން ނެރެ ރައްކާތެރި ހިސާބުުތަކަށް ގެންދަން ފަށައިފިއެވެ.

އިރާގުގެ ސަރަހައްދީ ރޮނގުގެ ކައިރީގައި އޮންނަ ބަގޫޒް އަވަށުން ފިރެެހެނުންނާއި އަންހެނުންނާއިި ކުޑަކުދިން ހިމެނޭ ގޮތަށް މަދުވެގެން 15 ލޮރީގައި ނެރެގެން ގެންދާ މަންޒަރު ފެނިފައިވާ ކަމަށް އަލްޖަޒީރާގައި ރިޕޯޓްކޮށްފައި ވެއެވެ.

ރިޕޯޓްތައް ބުނާ ގޮތުގައި އެ އަވަށުގައި 200 އާއިލާ ތިބީ އަވަށުން ނުނިކުމެވި ތާށިވެފައެވެ.

އެމެރިކާގެ މަދަދާ އެކު ހަނގުރާމަކުރަމުންދާ ސީރިއަން ޑިމޮކްރެޓިކް ފޯސަސް (އެސްޑީއެފް) އެލަޔަންސުން ބުނެފައި ވަނީ އަވަށުން ނުކުންނަ އާއިލާތަކުގެ ތެރޭގައި އައިއެސްގެ ހަނގުރާމަވެރިޔަކު ނެތް ކަން ނޭނގޭ ކަމަށެވެ.

މިހާރު އެއަވަށް ހިފުމަށް މަސަކަތްކުރަމުންދަނީ އެސްޑީއެފްގެ އެލަޔަންސުންނެވެ.

އިނގިރޭސިވިލާތުގައި ގާއިމްވެފައިވާ ސީރިއަން އޮބްޒރވޭޓަރީ ފޮރ ހިއުމަން ރައިޓްސް އިން ބީބީސީގައި ބުނެފައި ވަނީ ބަގޫޒްގައި ތިބި ހުރިހާ އާއްމުންނާއި ހަނގުރާމަވެރިން އަވަށް ދޫކޮށް ގޮސްފައިވާ ކަމަށެވެ.

ސީރިއަން އޮބްޒރވޭޓަރީ ފޮރ ހިއުމަން ރައިޓްސް އިން ބުނީ ހަނގުރާމަވެރިން އަމިއްލައަށް އެސްޑީއެފްއާ ހަވާލުވާން އެއްބަސްވެފަައިވާ ކަމަށެވެ. ނަމަވެސް އައިއެސްއާ ދެކޮޅަށް އެމެރިކާ އިސްވެ އުފައްދާފައިވާ ދުނިޔޭގެ ކޯލިޝަނުން އެވާހަކަ ކަަށަވަރެއް ނުކޮށްދެއެވެ.