ޓްރާންސްޕޯޓް އޮތޯރިޓީގެ މަސައްކަތްތައް އެހެން އިމާރާތަކަށް ބަދަލުކުރަނީ
ހުރަވީ ބިލްޑިންއަކީ ދުވަސްވުމުގެ ސަބަބުން ނުރައްކާތެރި ހާލަތެއްގައި ހުރި އިމާރާތެއް
މިނިސްޓަރ ނަހުލާ
ހުރަވީ ބިލްޑިން އަކީ ބަޔަކު މަސައްކަތް ކުރަން ތިބޭ ވަރަށް ވުރެ ހާލަތު ދެރަ އިމާރާތެއް ކަމަށާއި އިމާރާތް ހުރި ހާލަތު ރައީސް އިބްރާހީމް މުހައްމަދު ސޯލިހާ ހިއްސާކުރެއްވުމުން އެކަން އަޑުއެއްސެވުމަށް ފަހު ޓްރާންސްޕޯޓް އޮތޯރިޓީގެ މަސައްކަތްތައް އެހެން އިމާރާތަކަށް ބަދަލުކުރުމަށް ނިންމަވާފައި ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެއެވެ.
ދައުލަތުގެ މީޑިއާ ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން ނަހުލާ ވިދާޅުވީ ޓްރާންސްޕޯޓް އޮތޯރިޓީގެ މަސައްކަތްތައް ކުރިއަށް ގެންދާ ހުރަވީ ބިލްޑިންއަކީ ދުވަސްވުމުގެ ސަބަބުން ނުރައްކާތެރި ހާލަތެއްގައި ހުރި އިމާރާތެއް ކަމަށެވެ.
ބަޔަކު މަސައްކަތް ކުރަން ތިބޭ ވަރަށް ވުރެ ހާލަތު ދެރަ އިމާރާތަކަށްވެ އެތަނުގައި ބަޔަކު މަސައްކަތް ކުރަން ހުއްދަދީފައި ވާތީ ހައިރާންވެ ވަޑައިގަންނަވާ ކަމަށް ވެސް ނަހުލާ ވިދާޅުވިއެވެ.
މީގެ 30 އަހަރު ކުރިން އިމާރާތްކުރި ހުރަވީ ބިލްޑިންގައި ސަރުކާރުގެ އޮފީސްތައް ހިންގަމުން އައި ނަމަވެސް އެތަން ވަނީ ވަރަށް ބޮޑަށް ބާވެ ހަލާކުވެފަ އެވެ. މީގެކުރިން ހުރަވީ ބިލްޑިންގެ ބައެއް ބައިތައް ވެއްޓި މީހަކަށް ވެސް ވަނީ ގެއްލުން ލިބިފައެވެ.
